"ހިޔާވެހި ފައިނޭންސިން" ސްކީމަށް ކުރިމަތިލުމުގެ ފުރުޞަތު ހަމަވާތާ ތިން މަސް ދުވަހުގެ ތެރޭގައި ލޯނު ދޫކުރަނީ

 "ހިޔާވެހި ފައިނޭންސިން" ސްކީމަށް ކުރިމަތިލުމުގެ ފުރުޞަތު ހަމަވާތާ ތިން މަސް ދުވަހުގެ ތެރޭގައި ލޯނު ދޫކުރުމުގެ މަސައްކަތް ފައްޓަވާނެކަމަށް ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ."ހިޔާވެހި ފައިނޭންސިން" އަކީ ގެދޮރު އެޅުމަށް ދަތިވެފައިވާ މީހުންނަށް ޚާއްސަކޮށްގެން ސަރުކާރުން އިފްތިތާހުކުރި  ސްކީމެކެވެ.

ގެދޮރު އެޅުމަށް ދަތިވެފައިވާ މީހުންނަށް ޚާއްސަކޮށްގެން ސަރުކާރުން އިފްތިތާހުކުރި "ހިޔާވެހި ފައިނޭންސިން" ސްކީމަށް ކުރިމަތިލުމަށް ފުރުޞަތު ހުޅުވާލާފައިވަނީ ނޮވެމްބަރު މަހުގެ 8 ވަނަ ދުވަހުއެވެ. މި ފެސިލިޓީތަކަށް އެޕްލިކޭޝަން ހުށައެޅުމަށް ހުޅުވާލާފައިވަނީ ހިޔާވެހި ޕޯޓަލް (www.hiyaavehi.housing.gov.mv) މެދުވެރިކޮށެވެ.

ހިޔާވެހި ސްކީމަށް އެދި ހުށައެޅުމަށް ސަރުކާރުން ވަނީ 6 މަސް ދުވަހުގެ މުއްދަތު ދެއްވާފައެވެ. އެހެންކަމުން ސްކީމަށް އެދުމުގެ ފުރުސަތު 08 އޭޕްރީލް 2025 ވާ އަންގާރަ ދުވަހުގެ ރޭ 23:59 އަށް ހަމަވާނެއެވެ.

ހިޔާވެހި ސްކީމުގެ މައުލޫމާތު ހިއްސާ ކުރައްވަމުން ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވީ ރާއްޖޭގައި ބޯހިޔާވަހިކަމެއް ލިބިފައިނުވާ އެންމެނަށް އެކަށީގެންވާ ބޯހިޔާވަހިކަމެއް ހޯދައިދިނުމަކީ ރައީސުލްޖުމްހޫރިއްޔާގެ އެންމެ އިސް އެއް ވަޢުދުފުޅުކަމަށެވެ.

ހިޔާވެހި ސްކީމުގެ އިވެލުއޭޝަން ފަށަން ހަމަޖެހިފައިވަނީ އެޕްލިކޭޝަން ފޯމްތައް ލިބޭ ހިސާބުން ފެށިގެން ކަމަށް ވަޒީރު ވިދާޅުވިއެވެ.

އިރާދުކުރެއްވިއްޔާ ތިން މަސް ދުވަހުގެ ތެރޭގައި އަޅުގަނޑުމެން ފުރަތަމަ ބުރުގެ ލޯނުތައް ދޫކުރުމުގެ މަސައްކަތް ފަށާނަން، އެއީ މޯލްޑިވްސް އިސްލާމިކް ބޭންކާއި ބޭންކް އޮފް މޯލްޑިވްސްއާއި ހައުސިންގ ޑިވެލޮޕްމަންޓް ފައިނޭންސް ކޯޕަރޭޝަން ހިމެނޭގޮތަށް އަޅުގަނޑުމެން މި މަސައްކަތްތައް ކުރަމުންދާނީ. އެއީ އަޅުގަނޑުމެން މި ސްކީމް ރާވާފައި އޮތް ގޮތަކީ. ލޯނު ސްކީމަކީ މުޅި ރާއްޖެއަށް ހުޅުވާލާފައި އޮތް ފުރުސަތެއް

ވަޒީރު ޑރ.ހައިދަރު ވިދާޅުވިއެވެ.

މި ސްކީމަކީ މުޅި ރާއްޖޭގެ އެކި ސަރަޙައްދުތަކަށް އަމާޒުކޮށްގެން ހުޅުވާލާފައިވާ ސްކީމެކެވެ. މިއީ އިސްލާމީ ޝަރީޢާގެ އުސޫލުތަކާއި އެއްގޮތަށް އެންމެ ހެޔޮއަގުގައި ފޯރުކޮށްދޭ ފައިނޭންސިންއެވެ. މި ސްކީމަކީ ރާއްޖޭގެ 3 ބޭންކަކާ ގުޅިގެން އިސްލާމީ އުސޫލުން %5 ފައިދާގައި ކުރިއަށްގެންދާ ފައިނޭންސިން ސްކީމެކެވެ.

ހިޔާވެހި ފައިނޭންސްގެ ދަށުން ލޯން ދޫކުރަން ހަމަޖެހިފައިވަނީ 3 ސްކީމަކަށެވެ.

ފުރަތަމަ ސްކީމަކީ އަތޮޅުތަކުގެ ރަށްރަށަށް ޚާއްޞަ ގެދޮރު ޢިމާރާތްކުރުމުގެ ލޯނު ސްކީމެވެ. ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) މެދުވެރިކޮށް މި ސްކީމުން ލޯން ދޫކުރުމަށް ހަމަޖެހިފައިވާއިރު،  1 މިލިޔަން ރުފިޔާއާއި ހަމައަށް މިސްކީމުން ލޯނުލިބޭނެއެވެ. މިއީ އެއްވެސް އިކުއިޓީއެއް ދައްކަން ނުޖެހޭ ސްކީމެކެވެ.

ދެވަނަ ސްކީމް ޙާއްސަކުރެވިފައިވަނީ ސަރުކާރުން އާބަން ސެންޓަރުތަކުގެ ގޮތުގައި ކަނޑައަޅާ ރަށްރަށަށެވެ. މި ސްކީމްގެ ދަށުން ލޯނު ދޫކުރަން ހަމަޖެހިފައިވަނީ 3 މިލިޔަން ރުފިޔާއާ ހަމައަށެވެ.

ތިންވަނަ ސްކީމު ޚާއްޞަކޮށްފައިވަނީ ފުރަމާލެއަށް ޙާއްސަކުރެވިގެންނެވެ. މިސްކީމުން 6 މިލިޔަން ރުފިޔާއާއި ހަމައަށް ލޯން ދޫކުރާ ގޮތަށްވަނީ ހަމަޖެހިފައެވެ. މި ސްކީމް އަކީ ގެދޮރު ނުހެދިފައިވާ ހުރިހާ ފަރާތްތަކަށާއި، ހަދަން ފަށައި ނުނިމިހުރި ޢިމާރާތްތައް ނިންމުމުގެ އިތުރުން މާލޭގައި ހިމެނޭ ކުދި ބިންތައް އެއްކޮށްލައިގެން ޢިމާރަތްކުރުމުގެ ފުރުޞަތު ފަހިވާގޮތަށް އަމާޒުކުރެވިފައިވާ ސްކީމެކެވެ.  މާލެ ސަރަޙައްދަށް ހުލުވާލި ފުރުޞަތުގައި، ގޭގެ ބެހެނިވެރިންނާއެކު އެކުވެގެން 6 މިލިޔަން ރުފިޔާއިން ފެށިގެން 10 މިލިޔަން ރުފިޔާއާ ދެމެދު ފައިނޭންސަށް އެދެވޭގޮތަށް އުސޫލު ވަނީ އެކުލަވާލާފައެވެ.

ހިޔާވެހި ފައިނޭންސިން ސްކީމްގެ ދަށުން މާލީ އެހީ ފޯރުކޮށްދޭން އަންނަ އަހަރުގެ ބަޖެޓުގައި ވަނީ 1 ބިލިއަން ރުފިޔާ  ކަނޑައަޅާފައެވެ. 1 ބިލިޔަން ރުފިޔާ ސަރުކާރުން ބޭންކުތަކުން މި ސްކީމަށް އިންވެސްޓްކުރިނަމަވެސް، ބޭންކުތަކުން ލޯނު ދޫކުރާއިރު ޖުމްލަ 2 ބިލިޔަން ރުފިޔާއާ ހަމައަށް ފައިނޭންސް ދޭނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. މިއީ 25 އަހަރުން އަނބުރާ ދައްކާގޮތަށް  ހަމަޖައްސައިދޭ ފައިނޭންސިންގ ސްކީމެކެވެ.

ސަރުކާރުގެ މެނިފެސްޓޯއާއި އެއްގޮތަށް، 2028 ވަނަ އަހަރު ނިމޭއިރު، ބޯހިޔާވަހިކަމުގެ މަޝްރޫޢަކުން ފުރުޞަތު ނުލިބޭނެ އެއްވެސް ރައްޔިތަކު ނުހުންނާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ  ދެއްވާފައެވެ. ހިޔާވެހި ސްކީމަކީ މުޅި ރާއްޖެއަށް ހުޅުވާލައިގެން މިހާތަނަށް ކުރިއަށްގެންދާ އެންމެ އަގުހެޔޮ، އަދި އެންމެ ބޮޑު ފައިނޭންސް ސްކީމެވެ.