ޕީއެންސީ އެތެރޭގެ އިންތިޚާބުގެ ވަގުތީ ނަތީޖާ އިޢުލާންކޮށް، ޝަކުވާ ހުށަހެޅުމުގެ ފުރުޞަތު ހުޅުވާލައިފި

ޕީޕަލްސް ނޭޝަނަލް ކޮންގްރެސް، ޕީއެންސީ އެތެރޭގެ އިންތިޚާބުގެ ވަގުތީ ނަތީޖާ އިޢުލާންކޮށް، ޝަކުވާ ހުށަހެޅުމުގެ ފުރުޞަތު ހުޅުވާލައިފިއެވެ.

މިހާތަނަށް ރާއްޖޭގެ ސިޔާސީ ޕާޓީއަކުން ބޭއްވި އެންމެ ބޮޑުއިންތިޚާބު ގެ ގޮތުގައި މިއިންތިޚާބު ވަނީ ވެފައެވެ. މިއިންތިޚާބު ބޭއްވުނީ މިދިޔަ ހޮނިހިރު ދުވަހުއެވެ. މި އިންތިޚާބުގައި އިންތިޚާބުގައި 34،904 މީހަކަށް ވޯޓުދިނުމުގެ ޙައްގު ލިބުނުކަމަށް ޕީއެންސީން ވަނީ ބުނެފައެވެ. 4 ގަޑިއިރަށް ވޯޓްލުން ކުރިއަށްގެންދިޔަ މި އިންތިހާބުގައި  ވޯޓުލުމަށް ރާއްޖޭގެ ހުރިހާ އަތޮޅެއްގައި ޖުމްލަ 143 ފޮށި ބެހެއްޓިއިރު، މި އިންތިޚާބުގައި 667 ކެންޑިޑޭޓުން ވަނީ ވާދަކޮށްފައެވެ.

ވަގުތީ ނަތީޖާ އިޢުލާން ކޮށްފައިވަނީ ވޯޓުލާ މަރުކަޒުތަކުގައި ވޯޓު ގުނައި އެ މަރުކަޒުތަކުގައި އިޢުލާންކުރި ނަތީޖާ ކަށަވަރުކުރުމަށް ފަހުގައި ކަމަށް ޕީއެންސީއިން މަޢުލޫމާތުދެއެވެ.

އަދި މި ނަތީޖާއާމެދު ޝަކުވާއެއް އޮތްނަމަ ހެކިތަކާއެކު އެކަމަށް ހާއްސަ ފޯމާއެކު ޝަކުވާ ހުށަހެޅޭނެ ކަމަށްވެސް އެޕާޓީން ވަނީ ބުނެފައެވެ. އަދި ދާއިމީ ނަތީޖާ އިއުލާނުކުރާޏީ އިންތިޚާބުގައި ބެހެއްޓި ވޯޓުފޮށިތަކުގެ ވޯޓު ކަރުދާސްތަކާއި ނަތީޖާ ޝީޓޫތަކުގެ އަސްލު ޕީއެންސީގެ އޮފީހަށް ލިބި  ހުށައަޅާ ހުރިހާ ޝަކުވާތަކަށް ބަލާ ރިއާޔަތް ކުރުމަސްފަހުގައި ކަމަށް އެޕާޓީން ވަނީ ބުނެފައެވެ.

ވޯޓުން ހޮވުނު މަގާމުތަކާއި ވޯޓަކާއި ނުލައި އިންތިޚާބުވި މަގާމުތައް އަދި މަގާމުގެ ހައިސިއްޔަތުން ކޮމިޓީގައި ހިމެނޭ މެންބަރުގެ މައްޗަށް އެކުލެވޭ ޕާޓީގެ ސްޓިއަރިން ކޮމިޓީތަކުން 72 ގަޑިއިރު ތެރޭގައި ވޯޓަކުން ކަނޑައަޅަންޖެހޭއިތުރު، މަގާމުތައް ކަނޑައެޅުމުގެ މަސައްކަތް ކުރިއަށްދާނީ ދާއިމީ ނަތީޖާ އިއުލާނުކުރުމަށްފަހުގައި ކަމަށް ޕީއެންސީން ހާމަކުރިއެވެ.

މަޤާމުތަކަށް އަލަށް އިންތިޚާބުވި ފަރާތްތަކާއެކު އެޕާޓީގެ ހިންގުން އިތުރަށް ހަރުދަނާކުރެވޭނެކަމަށް ޕީއެންސީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވިއެވެ.