ހަނގުރާމަ ހުއްޓާލުމަށް އެމެރިކާއިން ހުށަހަޅާފައިވާ އެންމެ ފަހުގެ ހުށަހެޅުންތައް ދިރާސާކުރަނީ

އީރާނާއި އެމެރިކާއާ ދެމެދު ކުރިއަށްދާ ހަނގުރާމަ ހުއްޓާލުމަށް އެމެރިކާއިން ހުށަހަޅާފައިވާ އެންމެ ފަހުގެ ހުށަހެޅުންތައް ދިރާސާކުރަމުންދާކަމަށް އީރާނުން ބުނެފިއެވެ.

ތިންމަހާ ގާތްވެފައިވާ މި ހަނގުރާމަ ނިމުމަކަށް ގެނައުމަށްޓަކައި ޕާކިސްތާނުން މެދުވެރިއެއްގެ ދައުރު އަދާކުރަމުންދާއިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ މިއީ އެއްބަސްވުމަކަށް އައުމާއި އަލުން ހަމަލާތައް ފެށުމާ ދެމެދު އޮތް ނާޒުކު ދަނޑިވަޅެއްކަމަށް ވިދާޅުވެ އިންޒާރު ދެއްވާފައެވެ.

އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބަގާއީ ބުދަ ދުވަހުގެރޭ ވިދާޅުވި ގޮތުގައި، އެމެރިކާގެ ހުށަހެޅުންތައް މިހާރު ވަނީ ލިބިފައެވެ. މި މަޝްވަރާތަކަށް ބާރު އެޅުމުގެ ގޮތުން ޕާކިސްތާނުގެ އަސްކަރިއްޔާގެ ވެރިޔާ ފީލްޑް މާޝަލް އާސިމް މުނީރު ބުރާސްފަތި ދުވަހު ތެހެރާނަށް ވަޑައިގަތުމަށް ވަނީ ހަމަޖެހިފައެވެ. މީގެ އިތުރުން ޕާކިސްތާނުގެ އިންޓީރިއާ މިނިސްޓަރު މުހްސިން ނަގްވީ ވެސް ވަނީ މި ހަފުތާގައި ދެވަނަ ފަހަރަށް އީރާނަށް ވަޑައިގެންފައެވެ.

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، ރަނގަޅު ޖަވާބެއް ނުލިބިއްޖެ ނަމަ ވަރަށް އަވަހަށް ފިޔަވަޅު އަޅާނެ ކަމަށާއި، އެމެރިކާ އޮތީ ތައްޔާރީ ހާލަތެއްގައި ކަމަށެވެ. މީގެ ރައްދުގައި އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، އީރާނުން އޮތީ މަޝްވަރާއަށް ވެސް އަދި ހަނގުރާމައަށް ވެސް ތައްޔާރަށް ކަމަށެވެ. "ކޮންމެހެން ހަނގުރާމަ ކުރަން ޖެހިއްޖެ ހާލަތެއްގައި އަހަރެމެން ހަނގުރާމަ ކުރާނަން، އަދި މަޝްވަރާ ކުރަން ޖެހިއްޖެ ނަމަ މަޝްވަރާ ވެސް ކުރާނަން،" އަރަގްޗީ ވިދާޅުވިއެވެ.

އީރާނުން ހުށަހަޅާފައިވާ 14 ނުކުތާގެ ހުށަހެޅުމުގައި ހޮރްމޫޒް ކަނޑުއޮޅީގެ ކޮންޓްރޯލް އީރާނަށް ދިނުމަށާއި، ހަނގުރާމައިގެ ބަދަލު ދިނުމަށާއި، ދަތިކުރުމުގެ ފިޔަވަޅުތައް އުވާލުމުގެ އިތުރުން އެމެރިކާ ސިފައިން އެ ސަރަހައްދުން ފޭބުމަށް ވަނީ ހިމަނާފައެވެ. އީރާނުގެ ރިވޮލިއުޝަނަރީ ގާޑްސް އިން ވަނީ އަލުން ހަމަލާއެއް ދީފި ނަމަ، މި ފަހަރުގެ ހަނގުރާމަ މުޅި ސަރަހައްދަށް ފެތުރިގެންދާނެ ކަމުގެ އިންޒާރު ދީފައެވެ.

ޔުނިވަރސިޓީ ކޮލެޖް ޑަބްލިންގެ ޕްރޮފެސަރު ސްކޮޓް ލޫކަސް ވިދާޅުވި ގޮތުގައި، މިވަގުތު މަޝްވަރާތަކުގެ ބާރު އޮތީ އީރާނުގެ އަތުގައެވެ. އޭނާ ފާހަގަކުރެއްވި ގޮތުގައި އީރާނުން ވަނީ ނިއުކްލިއާ މައްސަލައަށް ވުރެ ބޮޑަށް ހޮރްމޫޒް ކަނޑުއޮޅީގެ މައްސަލައަށް މަޝްވަރާތައް ބަދަލުކޮށްފައެވެ. ނަމަވެސް، ޓްރަމްޕަކީ ލަފާކުރަން ދަތުރު ބޭފުޅަކަށް ވުމުން، އަލުން ހަނގުރާމައަކަށް ދިއުމުގެ ފުރުސަތު ވެސް އެބައޮތް ކަމަށް އޭނާ ވިދާޅުވިއެވެ.

އޭޕްރީލް މަހުގެ މެދުތެރެއިން ފެށިގެން އެމެރިކާއިން ވަނީ އީރާނު ކަނޑުގެ މަގުން ބަންދުކޮށްފައެވެ. މި ބްލޮކޭޑްގެ ދަށުން އެމެރިކާގެ އަސްކަރިއްޔާއިން ދަނީ އީރާނަށް ދަތުރުކުރާ އުޅަނދުތައް ހުއްޓުވައި ބަލައި ފާސްކުރަމުންނެވެ. ބުދަ ދުވަހު ވެސް އެމެރިކާގެ ސެންޓްރަލް ކޮމާންޑުން ވަނީ އީރާނުގެ ބަނދަރަކަށް ދަތުރުކުރަން އުޅުނު އުޅަނދެއް ހުއްޓުވައި ބަލައި ފާސްކޮށްފައެވެ.