ޕެންޝަނާބެހޭ ޤަވާއިދަށް ގެނައި އިސްލާޙް ރައީސް ތަސްދީޤް ކުރައްވައިފި

ދިވެހިރާއްޖޭގެ ޕެންޝަނާބެހޭ ޤާނޫނަށް 6 ވަނަ އިޞްލާޙު ގެނައުމުގެ ބިލު، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ތަސްދީޤުކުރައްވައިފިއެވެ. މި ބިލަކީ 2026 މޭ 14 ވީ ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ 19 ވަނަ ޖަލްސާއިން ފާސްކުރެއްވި ބިލެކެވެ.

މި އިޞްލާޙުގެ ދަށުން އަސާސީ ޕެންޝަނުގެ އުސޫލުތައް މުރާޖާކޮށް، ޕެންޝަން ފަންޑުގައިވާ ފައިސާ ބޭނުންކުރެވޭނެ އައު ހާލަތްތަކެއް ވަނީ ތައާރަފުކޮށްފައެވެ. މީގެ ބޭނުމަކީ ޕެންޝަން އޮފީހާއި ޕެންޝަންގެ ނިޒާމު މިހާރަށްވުރެ އިތުރަށް ހަރުދަނާކުރުމެވެ.

އަލަށް ގެނެވުނު ބަދަލުތަކުގެ ތެރޭގައި، އުމުރުން ދުވަސްވީ މީހުންގެ އަސާސީ ޕެންޝަނުގެ ގޮތުގައި ލިބޭ ފައިސާއަށް ވުރެ ބޮޑު އާމްދަނީއެއް އެ މީހަކަށް ލިބޭ ނަމަ، އެމީހެއްގެ އަސާސީ ޕެންޝަން ލިބިނުދެވޭނެކަމަށް ބަޔާންކޮށްފައިވެއެވެ. މީގެ އިތުރުން، ގެދޮރު ޢިމާރާތްކުރުމާއި މަރާމާތުކުރުމުގެ ބޭނުމަށް ޕެންޝަން ފަންޑުގައިވާ ފައިސާ ކޮލެޓަރަލައިޒް ކުރެވޭނެ އިންތިޒާމުވެސް މި ބިލުން ވަނީ ހަމަޖައްސައިދީފައެވެ.

އިންސާނީ އެހީތެރިކަމަށް ބަލައި، ޓަރމިނަލް އިލްނަސް ނުވަތަ ފަރުވާ ނެތް ބަލިތަކުގެ ހާލަތުގައިވާ ފަރާތްތަކަށް ޕެންޝަން ފަންޑުގައިވާ ފައިސާ ދޫކުރެވޭނެ އުސޫލުތަކެއްވެސް މި އިޞްލާޙުގައި ހިމަނާފައިވެއެވެ. އަދި ހަމައެއާއެކު، ޙައްޖުގެ މާތް އަޅުކަން އަދާކުރުމަށްޓަކައި ކުރިޔާލައި ޖާގަ ރިޒާވް ކުރުމަށް ޕެންޝަން ފަންޑުގެ ފައިސާ ބޭނުންކުރުމުގެ ފުރުސަތު މިހާރު ވަނީ ހުޅުވާލެވިފައެވެ.

ޕެންޝަނާބެހޭ ޤާނޫނު ހިންގުން ހަރުދަނާކުރުމަށް މުހިންމު ބަދަލުތަކެއް ހިމެނޭ މި ބިލު، ރައީސުލްޖުމްހޫރިއްޔާ ތަސްދީޤުކުރައްވައި ސަރުކާރުގެ ގެޒެޓުގައި ޝާއިޢުކުރެއްވުމާ ގުޅިގެން، މިހާރު ވަނީ މި އިޞްލާޙުތަކަށް ޢަމަލުކުރަން ފަށާފައެވެ.