ޖޮކޮވިޗްގެ ކޯޗަކަށް ކުރިން އޭނާގެ ވާދަވެރި މުރޭ ހަމަޖައްސައިފި

މިއަންނަ އަހަރުގެ ޖެނުއަރީގައި ފެށުމަށް ހަމަޖެހިފައިވާ ޓެނިހުގެ އެންމެ ބޮޑު އެންމެ މުބާރާތް ކަމުގައިވާ، އޮސްޓްރޭލިއަން އޯޕަންގައި ވާދަކުރުމަށް ތައްޔާރުވަމުން އަންނަ ސާރބިއާގެ ނޯވަކް ޖޮކޮވިޗްގެ ކޯޗިން ޓީމަށް، ގިނަ ދުވަސްތަކެއް ވަންދެން އޭނާގެ ވާދަވެރި ކުޅުންތެރިއެއްގެ ގޮތުގައި ކޯޓު މަތިން ފެނުނު އެނޑީ މުރޭ ހަމަޖައްސައިފިއެވެ. ކެރިއަރުގެ 25 ވަނަ ގްރޭންޑް ސްލޭމް ކާމިޔާބު ކުރުމަށް ތައްޔާރުވަމުން އަންނަ ޖޮކޮވިޗްގެ ކޯޗިން ޓީމާ ގުޅެން ނިންމިއިރު، މުރޭ ރިޓަޔާ ކޮށްފައިވަނީ މި އަހަރު ޕެރިހުގައި ބޭއްވި އޮލިމްޕިކްސްއަށް ފަހުއެވެ. 

މިކަމާ ގުޅިގެން ޖޮކޮވިޗް ނެރުނު ބަޔާނެއްގައި ބުނެފައިވަނީ، ގިނަ ދުވަސްތަކެއް ވަންދެން އޭނާގެ ވާދަވެރި ކުޅުންތެރިއަކު ކޯޗެއްގެ ގޮތުގައި ހަމަޖައްސައި، ޓެނިސް ކޯޓުގައި އޭނާއާއި އެއްފަޅިއެއްގައި ހުރުމަކީ ލިބިގެންދާ ބޮޑު އުފަލެއް ކަމުގައެވެ. އަދި މެލްބަން ގައި އޮންނަ އޮސްޓްރޭލިއަން އޯޕަންއަކީ މުރޭއާއެކު އޭނާ ފުރަތަމަ ނިކުންނާނެ މުބާރާތްކަމަށް ހާމަކޮށް ޖޮކޮވިޗް ބުނީ، ނެޓުގެ ދެ ފަރާތުގައި ތިބެ ކުޅުނުއިރު އޮސްޓްރޭލިއަން އޯޕަންއަކީ ދެ ކުޅުންތެރިންގެ ގިނަ ހަނދާންތަކަކާއި ގުޅިފައިވާ މުބާރާތެއް ކަމަށެވެ. 

މި ބަދަލާ ގުޅިގެން ތިން ގްރޭންޑް ސްލޭމް ކާމިޔާބުކޮށްފައިވާ މުރޭ ބުނީ، މިއީ އޭނާ ބޭނުންވި ބަދަލެއް ކަމަށާއި ޖޮކޮވިޗް އާއި ކޯޓުގެ އެއްފަރާތުގައި ހުރެ، ތަފާތު ދައްކަން ބޭނުންވާ ކަމަށެވެ. އަދި ޖޮކޮވިޗް 2025 ވަނަ އަހަރު ގްރޭންޑް ސްލޭމްތަކެއް ކާމިޔާބު ކުރުމަށް ނިކުންނައިރު، އޭނާއަށް އެހީތެރިވެދިނުމުގެ ފުރުސަތު ލިބުމަކީ ޝުކުރުވެރިވާ ކަމެއް ކަމަށް ވެސް ފާހަގަކޮށްފައިވެއެވެ.

ޖޮކޮވިޗްގެ ކޯޗިން ޓީމާ މުރޭ ގުޅުނުކަން ހާމަކުރުމަށް އޭނާ ވަނީ އާދީއްތަ ދުވަހު އެކްސްގައި ވީޑިއޯ އެއް ޕޯސްޓު ކޮށްފައެވެ. އެ ވީޑިއޯއިން ފެންނަނީ މުރޭ އާއި ޖޮކޮވިޗްގެ ކޯޓުމަތީގެ ކުރިމަތިލުން ތަކެކެވެ. އަދި 20 އަހަރަށް ވުރެން ގިނަ ދުވަހު އިދިކޮޅުގައި ހުރެ، ގިނަ ފައިނަލްތަކެއްގައި އިދިކޮޅަށް ވާދަކުރި މުރޭ އޭނާއާއި އެކު މަސައްކަތް ކުރަން ނިންމާފައިވާކަން ވެސް އެ ވީޑިއޯގައި ވަނީ ހާމަކޮށްފައެވެ. 

އުމުރުން 37 އަހަރުގެ ޖޮކޮވިޗްއަކީ އޮސްޓްރޭލިއަން އޯޕަން އެންމެ ގިނައިން ކާމިޔާބު ކުރި ކުޅުންތެރިޔާއެވެ. އޭނާ ވަނީ މި މުބާރާތް 10 ފަހަރު ކާމިޔާބުކޮށްފައެވެ. އަދި އޭގެތެރެއިން 4 ފައިނަލެއްގައި އޭނާ ވަނީ މުރޭ ބަލިކޮށްފައެވެ. 

މިހިނގާ 2024 ވަނަ އަހަރުގެ ބޮޑު އެއްވެސް މުބާރާތެއް ޖޮކޮވިޗްއަށް ކާމިޔާބު ކުރެވިފައެއް ނުވެއެވެ. ނަމަވެސް ޕެރިހުގައި ބޭއްވި އޮލިމްޕިކްސްގެ ސިންގަލްސް ގޯލްޑް މެޑަލް ވަނީ ކާމިޔާބުކޮށްފައެވެ. ޖޮކޮވިޗް މާނާ ކުރަނީ، އެ މެޑަލަކީ އޭނާއަށް މިހާތަނަށް ލިބުނު އެންމެ ބޮޑު ކާމިޔާބީގެ ގޮތުގައެވެ. 

މިހާރު ދުނިޔޭގެ 7 ވަނައިގައި ސީޑް ކޮށްފައިވާ ޖޮކޮވިޗަށް މި އަހަރުގެ އޮސްޓްރޭލިއަން އޯޕަން އާއި އަލްވަދާއު ކިޔަން ޖެހުނީ ސެމީފައިނަލްގައި މިހާރުގެ 1 ވަނަ ކުޅުންތެރިޔާ، ޖެނިކް ސިނާއަތުން ބަލިވުމުންނެވެ. އަދި ވިމްބަލްޑަން ފައިނަލުގައި ސީދާ 3 ސެޓުން އޭނާ ބަލިވީ ކާލޯސް އަލްކަރޭޒްއާ ވާދަކޮށްގެންނެވެ.