ހުޅުމާލެ ފަޅުތެރެއަށް ފޭބި މީހާ މަރުވެފައި އޮއްވާ ފެނިއްޖެ

ބުރާސްފަތި ދުވަހުގެ އިރުއޮއްސެނިކޮށް ހުޅުމާލެ ފަޅުތެރެއަށް ވަލެއް އެއްސުމަށް ފޭބި މީހާ މަރުވެފައި އޮއްވާ މިއަދު ފެނިއްޖެއެވެ.

އެމްއެންޑީއެފްއިން ބުނީ، އޭނާ ހޯދަމުން ދަނިކޮށް ފެނިފައި ވަނީ ހުޅުލޭ ސީޕްލޭން ޓާރމިނަލްގެ ފަޅުތެރެއިން ކަމަށެވެ.

މި ހާދިސާގައި މަރުވެފައި ވަނީ އުމުރުން 48 އަހަރުގެ ދިވެހި ފިރިހެނެކެވެ. އަދި އޭނާއަކީ ތެޔޮ ބާޖެއްގެ ފަޅުވެރިއެކެވެ. 

އެ އޮޕަރޭޝަންގައި އެމްއެންޑީއެފްގެ އިތުރުން ފުލުހުންނާއި އެއާޕޯޓްގެ ރެސްކިޔު ޓީމު ވެސް ބައިވެރިވިއެވެ.

މި ހާދިސާގެ ރިޕޯޓު ފުލުހުންނަށް ލިބުނީ ބުރާސްފަތި ދުވަހުގެ އިރުއޮއްސި 6:30 ހާއިރުކަމަށް ފުލުހުން ހާމަކޮށްފައި ވެއެވެ.