ސަރުކާރުގެ އިސް އޮފިޝަލުންގެ ނަމުގައި ފޭކް އެކައުންޓް ހަދައިގެން ދޮގު ފަތުރަނީ

ސަރުކާރުގެ ބައެއް އިސް އޮފިޝަލުންގެ ނަމުގައި ބަޔަކު ފޭކް އެކައުންޓް ތަކެއް ތައްޔާރުކޮށް ދޮގު މައުލޫމާތާއި ޚަބަރު ފަތުރަމުން ދާތީ އެކަމަށް ސަމާލުވުމަށް އިލްތިމާސްކޮށްފިއެވެ.

މިގޮތުން ރައީސް އޮފީހުގެ ޑެޕިއުޓީ އަންޑަރ ސެކްރެޓަރީ އިބްރާހީމް އަބާން އަބްދުލް ލަތީފް ، ޕީއެންސީގެ ހުޅުމާލެ އުތުރު ދާއިރާގެ ނައިބް ރައީސް އަދި ޕީއެންސީގެ އެކްޓިވިސްޓް މަލްޝާ ޝަރީފްގެ އިތުރުން މަރިޔަމް ޝިއުނާގެ ނަމުގައިވެސް ވަނީ ފޭކް އެކައުންޓް ހަދާފައެވެ.

އަބާން އެކްސްގައި ހާމަކޮށްފައިވަނީ މިއީ އާންމުންނަށް އޮޅުވާލުމުގެ ނިޔަތުގައި އުފައްދާފައިވާ އެކައުންޓެއްކަމަށެވެ. IbraahimAbaan@  މި އެކައުންޓަކީ އަބާންއާ އެއްވެސް ގުޅުމެއް ހުރި އެކައުންޓެއް ނޫންކަމަށެވެ. އަދި އަބާންގެ  ފޮޓޯ ޖަހައިގެން މި އެކައުންޓުން އަންނަނީ ހަގީގަތާ ހިލާފު ދޮގު ވާހަކަތައް ފަތުރަމުންކަމުގައެވެ.

އަބާން ގެ އަސްލު އެކައުންޓް ގެ ނަމުގައި އިބްރާހީމް ޖެހުމަށް އެންމެ "އ" އަކުރެއް އިންނައިރު ، ފޭކް އެކައުންޓް ތައްޔާރުކޯސްފައިވަނީ އިބްރާހީމްގެ ނަން އިނގިރޭސިން ލިޔާއިރު އެއަށް ދެ "އޭ" އަކުރު އިތުރުކޮށްގެނެވެ. އަދި ފޮލޮވަރުންގެ އަދަދުވެސް ދެއެކައުންޓުގައި ވަރަށް ބޮޑަށް ތަފާތެވެ. އަބާންގެ އަސްލު އެކައުންޓުގައި ފޮލޮވަރުންގެ އަދަދު 3000 ހުން މަތީގައި އުޅޭއިރު ފޭކް އެކައުންޓުގައި އިނީ 3 ފޮލޮވަރުންނެވެ. މީގެއިތުރުން "ޕެރޮޑީ" މިފަދައިން އެކައުންޓުގައި ވަނީ ޖަހާފައެވެ.

އާންމުންނަށް އޮޅުވާލުމުގެ ނިޔަތުގައި އުފައްދާފައިވާ @IbraahimAbaan މި އެކައުންޓަކީ އަޅުގަނޑާ އެއްވެސް ގުޅުމެއް ހުރި އެކައުންޓެއް ނޫނެވެ.

އަޅުގަނޑުގެ ފޮޓޯ ޖަހައިގެން މި އެކައުންޓުން އަންނަނީ ހަގީގަތާ ހިލާފު ދޮގު ވާހަކަތައް ފަތުރަމުންނެވެ. @IbrahimAbaann ✅@IbraahimAbaan ❌ pic.twitter.com/DAX8qypW23

— Ibrahim Abaan Abdul Latheef (@IbrahimAbaann) November 26, 2024

މީގެއިތުރުން މަލްޝާވެސް ވަނީ އަސްލު އެކައުންޓާ ވައްތަރުގޮތަކަށް ހަދާފައިވާ "ފޭކް އެކައުންޓެއް"  ދައުރުވާކަމަށް ބުނެ އޭނާގެ އަސްލު އެކައުންޓުން އާންމުންގެ ސަމާލުކަމަށް އެކަން ގެނެސްފައެވެ. އަދި ވީހާވެސް ގިނަ ފަރާތްތަކުން އެކައުންޓު ރިޕޯޓްކުރުމަށް މަލްޝާވަނީ އެދިފައެވެ. މަލްޝާ ގެ ނަމުގައިވާ ފޭކް އެކައުންޓުގައިވެސް ޝަރީފް ޖަހާފައިވަނި އިތުރު "އެފް" އަކުރެއް ބޭނުން ކޮށްގެންނެވެ.

މިހުރިހާ އެކައުންޓްތައް ތައްޔާރުކޮށްގެން ދޮގު މައުލޫމާތު ފަތުރަނީ ކޮންބައެއްކަން ނުވަތަ ކާކުކަން ހޯދިފައެއް ނުވެއެވެ. ފަހަކަށް އައިސް ރާއްޖޭގައި ސައިބަރ ކްރައިމްގެ މައްސަލަތައް އަންނަނީ އިތުރުވަމުންނެވެ. މިފަދަ އެކައުންޓްތައް ދައުރުވަމުން ދާއިރު ކޮންމެ ކޮންމެ އެކައުންޓަކަށް ފޮލޯނުކުރުމަށް ސަމާލުކަން ދޭން ވާނެއެވެ. އެގޮތުން އަސްލު އެކައުންޓާއި ފޭކް އެކައުންޓް ވަކި ކުރުމަށް ކޮންމެ އެކައުންޓެއްގެވެސް ނަމާއި ، އެހެނިހެން މައުލޫމާތު ރަނގަޅަށް ބެލުން މުހިންމެެވެ.