Ads by Exprox

ޚަބަރު

އަންހެން ވިޔަފާރިވެރިންނަށް ޙާއްސަ 3 ދުވަހުގެ ކޯހެއްގައި ބައިވެރިވުމުގެ ފުރުސަތު ހުޅުވައިފި!

އަންހެން ވިޔަފާރިވެރިންނަށް ޙާއްސަ 3 ދުވަހުގެ ކޯހެއްގައި ބައިވެރިވުމުގެ ފުރުސަތު ހުޅުވައިފި!

އަންހެން ވިޔަފާރިވެރިންނަށް ޙާއްސަ 3 ދުވަހުގެ ކޯސް

އާމިނަތު ޔުމްނާ

އާމިނަތު ޔުމްނާ

26 ނޮވެމްބަރު 2024، 01:40

26 ނޮވެމްބަރު 2024، 01:40

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ އިސްނެގުމުގެ މަތިން، ޔޫ.އެން އެސްކޭޕްގެ އޭޝިއަން އެންޑް ޕެސިފިކް ޓްރެއިނިނގް ސެންޓރ ފޮރ އިންފޮމޭޝަން އެނޑް ކޮމިއުނިކޭޝާން ޓެކްނޮލޮޖީ ފޮރ ޑިވަލޮޕްމަންޓް (އޭޕީސީއައިސީޓީ) އާއި ގުޅިގެން ދިވެހިރާއްޖޭގައި "އެމްޕަވަރިންގް ވިމެން އެންޓަޕްރެނަރސް ތްރޫ ޑިޖިޓަލް ޓްރާންސްފޮރމޭޝަން" ގެ ނަމުގައި ތަމްރީން ޕްރޮގްރާމެއް ހިންގުމަށް ނިންމައިފިއެވެ.

މި ޕްރޮގްރާމުގައި ބައިވެރިވުމުގެ ފުރުޞަތު މިހާރު ވަނީ ހުޅުވާލެވިފައިކަމަށާއި ، ބައިވެރިވާން ބޭނުންވާ ފަރާތްތަކުން https://forms.gle/Mz1wrLnWoV2ZCyQ89 މި ލިންކު މެދުވެރިކޮށް ރެޖިސްޓަރ ކުރަންޖެހޭނެއެވެ. ރެޖިސްޓަރ ކުރެވޭނެ އެންމެ ފަހުގެ ތާރީޚަކީ ޑިސެމްބަރު މަހުގެ 7 ވަނަ ދުވަސްކަމުގައި ވަނީ ހާމަކޮށްފައެވެ.

އޭޕީސީއައިސީޓީގެ ވިމެން އައިސީޓީ ފްރޮންޓިއަރ އިނީޝިއޭޓިވްގެ ތެރެއިން ކުރިއަށް ގެންދާ މި ޕްރޮގްރާމް ޚާއްސަ ކޮށްފައިވަނީ 100 އަންހެން ވިޔަފާރިވެރިންނަށެވެ. މި ޕްރޮގްރާމް ކުރިއަށް ގެންދިއުމަށް ހަމަޖެހިފައިވަނީ 3 ދުވަހަކަށް ބަހައިލައިގެން، ޑިސެމްބަރު މަހުގެ 14 ވަނަ ދުވަހުން 16 ވަނަ ދުވަހުގެ ނިޔަލަށެވެ. އަދި ސެޝަންތައް ނަގައި ދެއްވާނީ އިނގިރޭސި ބަހުން، އޭޕީސީއައިސީޓީގެ ފަންނީ މާހިރުންނެވެ. ޕްރޮގްރާމް ފުރިހަމަ ކުރާ ބައިވެރިންނަށް ސެޓްފިކެޓް ހަވާލުކުރެވޭނެކަމަށް ވުޒާރާއިން މައުލޫމާތު ދެއެވެ.

އަންހެނުންނަށް ވިޔަފާރިކުރުމުގައި ދިމާވާ ގޮންޖެހުންތަކަކީ އަދި ބޭނުންވާ އެހީތެރިކަމަކީ ކޮބައިތޯ އޮޅުން ފިލުވުމަން ފާހަގަވެފައިވަނީ ވިޔަފާރިއެއް ކުރިއެރުވުމަށްޓަކައި ބޭނުންވާ ފައިނޭންޝަލް ލިޓްރެސީ، ފައިދާ އަދި ގެއްލުން، ނުވަތަ އިންވެސްޓްމަންޓް ކަހަލަ ކަންކަން ކުރިއަށް ގެންދިއުމަށް ނޭގޭ ކަމާއި ވިޔަފާރިއެއް ކުރިއަރުވަންވީ ގޮތާއި، ހަދަން ޖެހޭ ރިޕޯޓްތަކާއި ހިސާބުތައް ހަދަން ފައިނޭންޝަލް ބުކްކީޕިންގްގައި ދަތިތަކާއި ކުރިމަތިލާންޖެހޭކަންކަމުގައި ވުޒާރާއިން ވަނީ ހާމަކޮށްފައެވެ.

މީގެއިތުރުން އިންފޯރމަލް ސެކްޓަރގައި ގިނަ އަދަދެއްގެ އަންހެނުން ހަރަކާތްތެރިވާއިރު، ގިނަ ފަހަރަށް އިޤްތިޞާދީ ލޮޅުންތަކުގެ އަސަރު ބޮޑަށް ކުރަނީ ވެސް މިފަދަ ކުދި ވިޔަފާރިތަކަށް ކަމަށާއި ކޮވިޑް-19 ތެރޭގައި ސަރުކާރުން އިންކަމް ސަޕޯޓް އެލަވަންސް ދޫކޮށްފައިވާއިރުވެސް، އިންފޯރމަލް ސެކްޓަރގައި ހަރަކާތްތެރިވި ގިނަ އަންހެނުންނަށް އެލަވަންސް ހޯދުމުގައި ދަތިތައް ދިމާވީ މި ސަބަބާއި އެކު ކަން ވަނީ ހާމަކޮށްފައެވެ.

އެހެންކަމުން،  އަންހެން ވިޔަފާރިވެރިންނަށް އެހީތެރިވުމަށް، ޚާއްޞަކޮށް އެންމެ ކުދި،  އަދި މެދު ފަންތީގެ ވިޔަފާރިތަކުގައި ހަރަކާތްތެރިވާ ފަރާތްތަކަށް، ސުމޭކު (ޑިޖިޓަލް) ވަސީލަތްތަކާއި ޕްލެޓްފޯމްތަކުގެ ބޭނުން ހިފުމުގައި އެހީތެރިވުމަކީ ވިޔަފާރީގެ ދާއިރާގައި މިންތީގެ ހަމަހަމަކަން ޤާއިމުކުރުމަށް އެޅޭ މުހިންމު ފިޔަވަޅެއްގެ ގޮތުގައި ވުޒާރާއިން ވަނީ ހާމަކުރައްވާފައެވެ.

މި ކޯހުގެ ޒަރީޢާއިން އަންހެން ވިޔަފާރިވެރިންނަށް މާލީ ހުނަރާއި ތަޙްލީލުކުރުމުގެ ޤާބިލުކަން އިތުރުކޮށްދޭނެކަމަށާއި މީގެ ސަބަބުން އެ ފަރާތްތަކުގެ މާލީ ޙާލަތު ވަޒަންކުރުމާއި މަޢުލޫމާތު އެކަށީގެންވާ ގޮތެއްގައި މާނަކުރުމުގެ ބާރު ލިބިގެންދާނެ ކަމަށް ވުޒާރާއިން ދެކެއެވެ. އަދި ވިޔަފާރި ދެމެހެއްޓުމުގެ ރޭވުމުގެ ތެރެއިން އަންހެން ވިޔަފާރިވެރިންނަށް އެމީހުންގެ ވިޔަފާރީގައި ދިމާވާ ހުރަސްތަކާއި ކުއްލި ޙާލަތްތައް ރާވައި، ސްޓްރެޓެޖީ އެކުލަވާލައި އަދި މެނޭޖްކުރުމަށް ބޭނުންވާ ޢިލްމާއި ހުނަރު ލިބިގެންދާނެކަމަށް ވަނީ ބުނެފައެވެ.

މި ކޯހުގެ ސަބަބުން، ވިޔަފާރިކުރާ ފަރާތްތަކަށް ވިޔަފާރި ހިންގުމުގައި ދިމާވެދާނެ ނުރައްކާތަކަށް ތައްޔާރުވެ، އެފަދަ ޙާލަތްތަކުގައި ވިޔަފާރި ހުއްޓުމެއްނެތި ކުރިއަށް ގެންދިއުމަށް މަގުފަހިވެގެންދާނެކަމަށާއި  އަދި މީގެ އިތުރުން، ކުއްލި ޙާލަތްތަކުގައި އަވަސް ނިންމުންތައް ނިންމުމުގެ ޤާބިލުކަން އިތުރުވެ، ވިޔަފާރީގެ ދެމެހެއްޓެނިވިކަން ކަށަވަރުކުރުމަށް މަގުފަހިވެގެންދާނެކަމަށް ވަނީ ބުނެފައެވެ.

ހަމައެހެންމެ ޕްރޮފިޓް އެނޑް ލޮސް ސްޓޭޓްމަންޓްތައް ހެދުމާއި ޕްރޮފިޓް އިތުރުކުރާނެ ގޮތްތަކާއި ޕްރޮފިޓް މާޖިންސް، ވޭރިއަބަލް ކޮސްޓްސް އަދި ވިޔަފާރިއެއްގައި ހަދާނެ ޕްރޮފިޓް ލޮސް އެނެލިސިސް ސުމޭކު ވަސީލަތްތައް ބޭނުންކޮށްގެން ހަދާނެ ގޮތުގެ މަޢުލޫމާތު މިކޯހުގެ ޒަރިއްޔާއިން ލިބިގެންދާނެއެވެ.

މި ޕްރޮގްރާމަކީ  އިޤްތިޞާދީގޮތުން ބާރުވެރިވެފައިވާ އަންހެނުން އިތުރުވެ، އެ ފަރާތްތަކުގެ ވިޔަފާރި ކުރިއަރުވަން ބާރު ލިބި، ފުޅާ ވެގެން ދިއުމުގެ މަޤްޞަދުގައި އަދި ވިޔަފާރީގައި އަންހެނުންނަށް ދިމާވާ ހުރަސްތައް ގިރާކޮށް ކުރިއަށްދާ އަންހެނުންތަކެއް ފެނިގެން ދިއުމުގެ މަޤްސަދުގައި ހިންގޭ ކޯހެކެވެ.

މި ލިޔުން ކިޔާލުމުން

Ads by MSS