މާސްގައި އިންސާނުން އާބާދު ކުރުމަށް ބޮޑެތި ގޮންޖެހުންތަކެއް ހުރިކަމަށް މާހިރުން ބުނެފި

ސްޕޭސްއެކްސްގެ ސީއީއޯ އަދި ބިލިއަނަރ އެލޮން މާސްކު 30 އަހަރު ދުވަހުން ޕްލެނެޓް މާސްގައި އިންސާނުން އާބާދު ކުރުމަށް ދެކެމުން އަންނަ ހުވަފެނުގައި ބޮޑެތި ގޮންޖެހުންތަކެއް ހުރިކަމަށް، ފަލަކީ އިލްމު ދިރާސާކުރާ ފަރާތްތަކަކުން ހާމަކޮށްފިއެވެ. އަދި މިއީ މި މުއްދަތުގެ ތެރޭގައި ވުމަށް ވުރެން ނުވުން ގާތްކަމެއް ކަމަށްވެސް، އެމީހުންގެ ދިރާސާތަކުގެ އަލީގައި ބުނެފައިވެއެވެ.

ކެލީ އާއި އޭނާގެ ފިރިމީހާ، ޒެކް ވެއިނަސްމިތު ޕްލެންޓް މާސްއާ ގުޅޭގޮތުން ލިޔެފައިވާ ފޮތް، 'އަ ސިޓީ އޮފް މާސް: ކޭން ވީ ސެޓްލް ސްޕޭސް، ޝުޑް ވީ ސެޓްލް ސްޕޭސް، އެންޑް ހޭވް ވީ ރިއަލީ ތޯޓް ދިސް ތްރޫ؟' ގައި ޕްލެނެޓް މާސްގައި އިންސާނުން ވަޒަންވެރިވުމުގައި ދިމާވާނެ ގޮންޖެހުންތަކަށް ވަރަށް ބޮޑަށް އަލިއަޅުވާލާފައިވެއެވެ. އަދި މި ފޮތަށް ވަނީ 2024 ވަނަ އަހަރުގެ ރޯޔަލް ސޮސައިޓީ ޓްރިވެޑީ ސައިންސް ބުކް ޕްރައިޒް އެވޯޑު ވެސް ލިބިފައެވެ. 

އެ ފޮތުގައި ލިޔެފައިވާ ގޮތުން، ޕްލެނެޓް އާތު އާ ހިލާފަށް ޕްލެނެޓް މާސްގައި އޮންނަނީ ތުނި ޖައްވެކެވެ. މި ޖައްވުގެ ތުނި ކަމުގެ ސަބަބުން ނުރައްކާތެރި ކޮސްމިކް އަދި ސޯލާ ރޭޑިއޭޝަންތަކުން ރައްކާތެރިކަމެއް ނުލިބޭއިރު، މިއީ ކެންސަރުގެ ނުރައްކާ އިތުރުވެ، ގިނަ ދުވަސްވީ ވަރަކަށް އިތުރު މައްސަލަތައް ކުރިމަތިވާނެ ސަބަބެކެވެ. އަދި މި ދުނިޔެއާ ހިލާފަށް މާސްގައި ގްރެވިޓީގެ ބާރު ދަށްވުމަކީ، އެ ދުނިޔެއަށް ބަދަލުވާ އިންސާނުންނަށް ނުރައްކާތެރިކަމަށް ވެގެންދާނެކަމަށް ވެސް ބުނެފައިވެއެވެ. 

މީގެ އިތުރުން މާސްގެ ފަސްގަނޑަކީ ވިހަ ފަސްގަނޑެއް ކަމުން، ޕަރކްލޮރޭޓްސް - ހޯރމޯންތަކަށް ބުރޫއަރާ އަދި އިންސާނާގެ ހެދިބޮޑުވުމަށް ގެއްލުން ލިބިދާނެ ކެމިކަލް ކޮމްޕައުންޑްތަކެއް އެ ފަސްގަނޑުގައި އެކުލެވިގެންވެއެވެ.

ބަޔޮލޮޖިސްޓެއް ކަމަށްވާ ކެލީ ވައިނަރސްމިތު އެ ފޮތުގައި ފާހަގަކޮށްފައިވާ ގޮތުން، މި ވިހަތަކުގެ ސަބަބުން ކާނާ އުފެއްދުމާއި އިންސާނާގެ ދިރިއުޅުން ދެމެހެއްޓުމަށް ދަތި އުނދަގޫތަކާ ކުރިމަތިވެދާނެއެވެ.

އޭނާ އިތުރަށް ފާހަގަ ކޮށްފައިވާ ގޮތުގައި ގިނަ ބަޔަކު މަރުނުވެ ކުރިއަށް އޮތް 30 އަހަރު ތެރޭގައި މަސްކްއަށް މިލިއަނެއްހާ މީހުން މާސްއަށް ގެންދެވޭނެ ގޮތެއް ނެތް ކަމަށެވެ. ގްރެވިޓީ ދަށްވުމުން މާސްގައި އިންސާނުންނަށް ލިބޭނެ ގެއްލުންތައް ފާހަގަ ކުރަމުން ކެލީ ބުނީ، އިންސާނާ ގިނަ ދުވަހު ލޯ ގްރެވިޓީއަށް ހުށަހެޅުމުން ކަށިތައް ވިރިގެން ދިއުމާއި، މަސްތައް ބަލިކަށިވެ، ވިހެއުމުގެ މަރުހަލާގައި ގިނަ ގޮންޖެހުންތަކާއި ކުރިމަތިވާނެއެވެ. 

އަދި ދުނިޔޭގެ ބޮޑެތި ތޫފާންތަކާއި، ފިނިހޫނުމިން އިންތިހާއަށް ބަދަލުވުމާއި، ވައިގެ ތެރޭގައި އުފެދޭ ނުރައްކާތެރި ތަކެތީގެ  ސަބަބުން ތަކެއްޗާއި ތަންތަނަށް ގެއްލުން ލިބި، އިންސާނާގެ ފުއްޕާމޭއަށް ގެއްލުން ލިބިދާނެކްމަށް ބެލެވުމަކީ، މާސްގައި ކުރިމަތިވާނެ ކަންކަމެވެ.

މީގެ އިތުރުން، މާސް އާއި ދުނިޔެއާއި ދެމެދު އޮތް ދުރުމިން އިތުރުވުމަކީ ވެސް، އެ ތާނގައި މީހުން އާބާދު ކުރުމަށް އޮތް ހުރަހެކެވެ. މާސްއާއި ދުނިޔެއާއި ދެމެދު 225 މިލިއަން ކިލޯމީޓަރު އޮތުމުގެ ސަބަބުން، މުވާސަލާތީ ގުޅުންތަކަށް ގިނަ ވަގުތު ހޭދަވެ، އެމަޖެންސީ ހާލަތްތަކުގައި ހަރަކާތްތެރިވުމަކީ ގޮންޖެހުމެކެވެ.