ފިލިޕީންސްގައި އިމާރާތެއް ވެއްޓި 3 މީހުން މަރުވެ، 17 މީހަކު ގެއްލިއްޖެ

ފިލިޕީންސްގެ އެންޖެލްސް ސިޓީގައި ހަދަމުންދިޔަ މަލްޓި-ސްޓޯރީ އިމާރާތެއް ވެއްޓި ހިނގި ނުރައްކާތެރި ހާދިސާގައި މިހާތަނަށް ތިން މީހަކު މަރުވެ، 17 މީހަކު ގެއްލިފައިވާ ކަމަށް އެގައުމުގެ ކަމާބެހޭ އިދާރާތަކުން ހާމަކޮށްފިއެވެ.

ވެރިރަށް މެނީލާގެ އުތުރުގައި އޮންނަ އެންޖެލްސް ސިޓީގައި ހިނގި މި ހާދިސާއާ ގުޅިގެން މީހުން ސަލާމަތްކުރުމުގެ މަސައްކަތް ކުރަމުންދާ ޓީމުތަކުން ބުނި ގޮތުގައި، އިމާރާތުގެ ކުނިތަކުގެ ދަށުން ދެ މީހަކު ވަނީ ނެރެފައެވެ. ނަމަވެސް އޭގެ ތެރެއިން އެކަކު ނެރުނުއިރު ދިރި ހުރި ނަމަވެސް ފަހުން ވަނީ މަރުވެފައެވެ. އަދި އަނެއް މީހާ މަރުވީ ކުނިތަކުގެ ދަށުގައި ތާށިވެފައި ވަނިކޮށް ހާޓް އެޓޭކެއް ޖެހިގެން ކަމަށް ބިއުރޯ އޮފް ފަޔަރ ޕްރޮޓެކްޝަންގެ އޮފިޝަލެއް ކަމަށްވާ މާރިއާ ލިއާ ސަޖިލީ މައުލޫމާތު ދެއްވިއެވެ.

މީގެ އިތުރުން، އިމާރާތުގެ ދަށުގައި އިތުރު މީހަކު މަރުވެފައި އޮތްކަން ފާހަގަކުރެވިފައިވާ ކަމަށާއި، ނަމަވެސް އެ މީހާގެ ހަށިގަނޑު ނެރެވެންދެން ރަސްމީކޮށް މަރުވި މީހުންގެ އަދަދުގައި އެމީހާ ނުގުނާނެ ކަމަށް އޮފިޝަލުން ބުނެއެވެ.

ގެއްލިފައިވާ 17 މީހުން ހޯދުމުގެ މަސައްކަތް ވަރަށް ހަލުވިކަމާއެކު ކުރިއަށްދާއިރު، ތާމަލް ސްކޭންތަކުން ދައްކާ ގޮތުގައި ކުނިތަކުގެ ދަށުގައި ތާށިވެފައި ތިބި ބައެއް މީހުންގެ ނޭވާލުމާއި ހިތުގެ ވިންދުގެ ނިޝާންތައް ވަނީ ފެނިފައެވެ. މިއީ މީހުން ސަލާމަތްކުރުމަށް ކުރާ މަސައްކަތަށް ލިބުނު ބޮޑު އުންމީދެކެވެ.

މި ހާދިސާ ހިނގިއިރު އެ ސައިޓުގައި 70 އެއްހާ މީހުން މަސައްކަތް ކުރަމުންދިޔަ ނަމަވެސް، ހަފްތާ ބަންދުވުމާއެކު ގިނަ ބަޔަކު ތިބީ ގެއަށް ގޮސްފައެވެ. ގެއްލިފައިވާ މީހުންގެ ތެރޭގައި ގިނައީ އެ ވަގުތު ޑިއުޓީގައި ތިބި ކޮންސްޓްރަކްޝަން މަސައްކަތްތެރިންނެވެ.

މި ހާދިސާ ހިނގަން މެދުވެރިވި ސަބަބެއް އަދި މިހާތަނަށް ދެނެގަނެވިފައެއް ނުވެއެވެ. އެންޖެލްސް ސިޓީގެ މޭޔަރު ކާމެލޯ ލަޒާޓިން ވިދާޅުވީ، އިމާރާތުގެ ވެރިފަރާތް ހޯދުމުގެ މަސައްކަތް ކުރަމުންދާ ކަމަށާއި، އިމާރާތް ވެއްޓުނު ސަބަބާއި އެތަނުގައި ތިބި މީހުންގެ ސީދާ އަދަދު ސާފުކުރުމަށް މަސައްކަތް ކުރަމުންދާ ކަމަށެވެ.

މީހުން ސަލާމަތްކުރުމުގެ މަސައްކަތް ލަސްވަމުންދާތީ، ގެއްލިފައިވާ މީހުންގެ އާއިލާތަކުން ދަނީ ކަންބޮޑުވުން ފާޅުކުރަމުންނެވެ. ނަމަވެސް ސަލާމަތީ ބާރުތަކުން ބުނަނީ، ކުނިތައް ކޮންނަމުންދާއިރު ކުޑަވެސް ގުޑުމެއް އެރިޔަސް އަޑީގައި ތިބި މީހުން ފިތިގެން މަރުވުމުގެ ފުރުސަތު އޮތުމުން، މި މަސައްކަތް ކުރަންޖެހެނީ ވަރަށް ބަލައިގެން، މެޝިނަރީސް ބޭނުންނުކޮށް އަތުން ކަމަށެވެ.