ޚަބަރު
މިފާއިތުވި އެއް އަހަރު ދުވަސްތެރޭ 178 ކައުންސިލާއި ބައްދަލުކުރެވިފައިވޭ: ވަޒީރު އާދަމް ޝަރީފް ޢުމަރު

ވަޒީރު އާދަމް ޝަރީފް ޢުމަރު ޖަލްސާގައި ވާހަކަފުޅު ދައްކަވަނީ. ފޮޓޯ: ވުޒާރާ
މިފާއިތުވި އެއް އަހަރު ދުވަސްތެރޭ 178 ކައުންސިލާއި ބައްދަލުކުރެވިފައިވާ ކަމަށް ސިޓީތަކާ އިދާރީދާއިރާތަކާ ޢާންމު މަސައްކަތްތަކާ ބެހޭ ވުޒާރާގެ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.
ވަޒީރު އާދަމް ޝަރީފް މިހެން ވިދާޅުވީ އިދާރީ ދާއިރާތައް ހިންގުމާބެހޭ ވުޒާރާގެ މަސައްކަތްތައް އިތުރަށް ހަރުދަނާކުރުމަށް ބާއްވާ މަސައްކަތު ބައްދަލުވުން ފެށުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
ވަޒީރު އާދަމް ޝަރީފް ވިދާޅުވީ ސަރުކާރަށް އަހަރެއްވެގެން ދިޔައިރު 178 ކައުންސިލަކާއި ބައްދަލުކޮށް ކައުންސިލް ތަކުގެ ކަންބޮޑުވުންތައް އަޑުއައްސަވައިފައިވާ ކަމަށެެވެ. ހަމަމިއާއިއެކު ކައުންސިލްތަކަށް ދިމާވާ މައްސަލަތައް ޙައްލުކުރުމަށް އެވުޒާރާއިން ވޭތުވެދިޔަ އަހަރު ދުވަހުގެ ތެރޭގައި ގިނަ މަސައްކަތްތަކެއް ކުރެއްވިކަމަށް އެމަނިކުފާނު ވިދާޅުވިއެވެ.
މީގެއިތުރުން ވަޒީރު ވިދާޅުވީ މުޅި ރާއްޖެ ކަވަރު ކުރެވޭނެ ގޮތަށް ކްލަސްޓަރ ނިޒާމެއް މިހާރު ޤާއިމްކޮށްފައިވާނެ ކަމަށެވެ. މިގޮތުން 7 ސަރަހައްދެއްގައި ވުޒާރާގެ ފަރާތުން އެގްޒެކެޓިވް މީހަކާއި ކޯޑިނޭޓަރެއް ހުންނާނެ ކަމަށާއި، މިއީ އަތޮޅުތަކާ ގާތުން މަސައްކަތްކުރުމަށް ޤާއިމްކޮށްފައިވާ ނިޒާމެއް ކަންވެސް ވަޒީރު އާދަމް ޝަރީފް ޢުމަރު ފާހަގަކުރެއްވެވިއެވެ.
އެގޮތުން ރާއްޖޭގެ ގިނަ ކައުންސިލްތަކަކާއެކު ގިނަ ބައްދަލުވުންތަކެއް ބޭއްވިކަމަށާއި، ކައުންސިލްތަކުގެ ޙާލަތު ދެނެގަނެވިފައިވާކަމަށާއި ކުރެވުނު މަސައްކަތްތަކުން ޢިމާރާތްތައް ބައުވެފައިވާ ކައުންސިލް ޢިމާރާތްތައް ގިނަ ޢަދަދަކަށް ހުރިކަން ދެނެގަނެވިފައިވާ ކަން ވަޒީރު ފާހަގަކުރެއްވެވިއެވެ.
އެކަން ފާހަގަކުރައްވާ ވަޒީރު އާދަމް ޝަރީފް ވިދާޅުވީ، ކައުންސިލްތަކުގެ އައު ޢިމާރާތްތައް އެޅުމުގެ ޢަމަލީ މަސައްކަތް ފެށުމަށް ވަރަށް އަވަހަށް އެއްބަސްވުމެއްގައި ސޮއިކުރެވޭނެކަމަށެވެ. މީގެއިތުރުން ވަޒީރު ވިދާޅުވީ ކައުންސިލްތަކުން ފާހަގަކުރާ ކަންބޮޑުވުންތަކަށް ހައްލު ހޯދައިދޭން މަސައްކަތްކުރަމުންދާކަމަށެވެ.
އިދާރީ ދާއިރާތައް ހިންގުމާބެހޭ ވުޒާރާއިން ފަށާފައިވާ މަސައްކަތު ބައްދަލުވުމުގައި ކުރިއަށްއޮތް އަހަރު ވުޒާރާގެ މަސައްކަތްތައް އިތުރަށް ހަރުދަނާކުރުމަށް މަޝްވަރާކުރާނެކަމަށް އެވުޒާރާއިން ބުނެފައިވެއެވެ.
އަދި މުވައްޒަފުންގެ ކަންބޮޑުވުންތައް އަޑުއަހާ، ވުޒާރާގެ މަސައްކަތްތައް ތަރުތީބުވެފައިވާގޮތް އިޞްލާޙުކުރުމަށާއި އުޞޫލްތައް އިސްލާޙުކުރުމަށް މަސައްކަތު ބައްދަލުވުމުގައި ޚިޔާލު ބަދަލުކުރާނެކަމަށްވެސް ސިޓީތަކާއި އިދާރީ ދާއިރާތައް ހިންގުމާބެހޭ ވުޒާރާއިން ހާމަކޮށްފައިވެއެވެ.