ފުޓުބޯޅައަކީ ދުނިޔެ ބަދަހިކޮށްދޭ ވަސީލަތެއް، މިއީ ޒިންމާދާރު ރައްޔިތުން ބިނާކުރާ ކުޅިވަރެއް: މެޑަމް ސާޖިދާ

ފުޓުބޯޅައަކީ ހަމައެކަނި ކުޅިވަރެއް ނޫން ކަމަށާއި، އެއީ މުޅި ދުނިޔެ ބަދަހިކޮށްދޭ ވަސީލަތެއް ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

ދުނިޔޭގެ ފުޓުބޯޅަ ދުވަހާ ގުޅިގެން މިއަދު ސޯޝަލް މީޑިއާގައި ކުރެއްވި ޕޯސްޓެއްގައި އެކަމަނާ ވަނީ، ދިވެހިރާއްޖޭގެ ކޮންމެ ރަށެއްގައި ދިރިއުޅޭ ކޮންމެ ދިވެއްސެއްގެ ހިތުގައިވެސް ފުޓުބޯޅައަށް ޚާއްސަ މަގާމެއް ދެވިފައިވާކަން ފާހަގަކުރައްވާފައެވެ.

މެޑަމް ސާޖިދާ ވިދާޅުވި ގޮތުގައި، ފުޓުބޯޅައަކީ ތަފާތު އުމުރުފުރާތަކާއި، އެކި ސަގާފަތްތަކާއި، ދުނިޔޭގެ އެކި ކަންކޮޅުތަކުން އަންނަ މީހުން އެކުވެރިކޮށް ބަދަހިކޮށްދޭ ހަރަކާތެކެވެ. އަދި މިއީ ދުޅަހެޔޮ، އުފާވެރި، އަދި މާނަވީ ދިރިއުޅުމަކަށް ބާރު ލިއްބައިދޭ ކަމެއްގެ ގޮތުގައި އެކަމަނާ ސިފަކުރެއްވިއެވެ.

މީގެ އިތުރުން، ފުޓުބޯޅައިގެ ތެރެއިން ރިވެތި އަޚުލާގާއި، ޓީމްވޯކާއި، ގަވާއިދުތަކަށް ބޯލެނބުމުގެ މުހިންމުކަން ދަސްކޮށްދޭކަން ފާހަގަކުރައްވަމުން އެކަމަނާ ވިދާޅުވީ، މި ކުޅިވަރުން ބިނާކުރަނީ ހަމައެކަނި ކުޅުންތެރިން ނޫން ކަމަށާއި، މިއީ މުޖުތަމައަށް ބޭނުންތެރި ޒިންމާދާރު ރައްޔިތުންތަކެއް ބިނާކޮށްދޭ ހަރަކާތެއް ކަމަށެވެ.

ފުޓުބޯޅަ ދުވަހާ ގުޅޭގޮތުން އެކަމަނާ ކުރެއްވި އުއްމީދަކީ، މި ކުޅިވަރުގެ ތެރެއިން އަމާން އަދި ބަދަހި މުޖުތަމައުއެއް ބިނާވެ، މިއީ ޒުވާނުންނަށް ހިތްވަރުދޭ، ފާގަތި މުސްތަގުބަލެއް ބިނާކުރުމަށް މަގުފަހިވާ ކަމަކަށް ވެގެންދިއުމެވެ.

ދުނިޔޭގެ ފުޓުބޯޅަ ދުވަހުގެ ގޮތުގައި ކޮންމެ އަހަރެއްގެ މެއި މަހުގެ 25 ވަނަ ދުވަސް ފާހަގަކުރަން އދ. އިން ނިންމާފައިވަނީ 2024 ވަނަ އަހަރުއެވެ. މި ދުވަސް ފާހަގަކުރަން ފެށީ ތާރީޚުގައި ބޭއްވުނު ފުރަތަމަ ބައިނަލްއަގުވާމީ ފުޓުބޯޅަ މުބާރާތަށް 100 އަހަރު ފުރުމާ ގުޅިގެންނެވެ.

On World Football Day, we celebrate the beautiful game that lives in the hearts of Maldivians across every island.

Football is more than just a sport. It is a universal language that brings together people of all ages and backgrounds, inspiring healthier, happier lives and a… pic.twitter.com/tEVIxittaa

— First Lady Sajidha Mohamed (@sajidhaamohamed) May 25, 2026