ޚަބަރު
ތަދު ކަނޑުވަން ބޭނުންކުރާ ދެބޭހެއް ބޭނުންކުރުން މަނާކޮށްފި
ވަގުތީ ގޮތުން ބޭނުންކުރުން މަނާކޮށްފައިވާ ދެބޭސް.
ތަދު ކަނޑުވަން ބޭނުންކުރާ ދެބޭހެއް ވަގުތީ ގޮތުން ބޭނުން ކުރުން މަނާކޮށްފިއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ އިން މިކަމާ ގުޅިގެން ނެރެފައިވާ ބަޔާނެއްގައި ބުނެފައިވަނީ ރާއްޖޭގައި ލިބެން ހުންނަ ބޭހަކީ ފެންވަރު ރަނގަޅު ބޭސްކަން ކަށަވަރުކުރުމަށް މާކެޓުން ބޭހުގެ ސާމްޕަލް ނަގާ ޓެސްޓުކުރުމުގެ މަސައްކަތް އެއޮތޯރިޓީ އިން މެދު ކެނޑުމެއްނެތި ކުރަމުންދާ ކަމަށެވެ.
މި މަސައްކަތުގެ ތެރެއިން ރާއްޖޭގެ މާކެޓުން ސާމްޕަލް ނަގައި ސްކްރީން ކުރި، ތަދުކެނޑުވުމަށް ބޭނުންކުރާ 2 ބޭސް ކަމަށްވާ އެކްސެލް މެފެނަމިކް އެސިޑް ސަސްޕެންޝަން އަދި
މެފްނެކްސް ނުރައްކާތެރި ދެ ކެމިކަލް އަކަށް ޕޮޒިޓިވް ވެފައިވާކަމަށެވެ.
އެގޮތުން މި ދެބޭސް ޕޮޒިޓިވް ވެފައިވަނީ ޑައިއީތައިލިން ގްލައިކޯލް އަދި އިތައިލީން ގްލައިކޯލްއަށެވެ. އަދި އެކަން އިތުރަށް ކަށަވަރުކުރުމަށް ރާއްޖޭން ބޭރަށް ސާމްޕަލް ފޮނުވައިގެން ޓެސްޓުކުރުމުގެ މަސައްކަތް މިހާރު ކުރަމުންދާކަމަށް ވެސް މޯލްޑިވްސް ފުޑް އެންޑް ޑްރަގް އޮތޯރިޓީ އިން ވަނީ ބުނެފައެވެ.
— MFDA (@MFDA_mv) November 26, 2024
ރައްކާތެރިކަމުގެ ފިޔަވަޅެއްގެ ގޮތުން މިދެބޭހުގެ އެއްވެސް ބެޗެއް އެމްއެފްޑީއޭއިން ވަކި ގޮތެއް އަންގަންދެން ރާއްޖެއަށް އެތެރެކުރުމާއި، ވިއްކުމާއި ބޭނުން ކުރުން ވަގުތީގޮތުން މަނާކޮށްފައިވާކަމަށް އެއޮތޯރިޓީ އިން ބުނެފައިވެއެވެ. އަދި މިވަގުތު ބޭސްފިހާރަތަކުގެ ގުދަންތަކުގައި ހުރި މިދެބާވަތުގެ ބޭސް ވަކިކޮށްފައި ބެހެއްޓުމަށްވެސް ވަނީ އަންގާފައެވެ.
