ރާއްޖޭގެ ޤައުމީ ޔުނިވަރސިޓީގެ މެޑިކަލް ސްކޫލުގައި ކިޔެވުމަށް ބޭރު ޤައުމުތަކުގެ ތަރުހީބް

ދިވެހިރާއްޖޭގެ ޤައުމީ ޔުނިވަރސިޓީގައި ޤާއިމްކޮށްފައިވާ މެޑިކަލް ސްކޫލުގައި ކިޔެވުމަށް ބޭރު ޤައުމުތަކުން ވަރަށް ބޮޑު ޝައުޤުވެރިކަމެއް ފާޅުކުރަމުންދާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ހާމަކޮށްފިއެވެ.

މި ވުޒާރާގެ ސްޓޭޓް މިނިސްޓަރ ޑރ. ޢަބްދުﷲ ނަޒީރު ވިދާޅުވި ގޮތުގައި، މި އަހަރުގެ ޖަނަވަރީ މަހު އެއް ޤައުމަކުން އެކަނިވެސް 500 އެޕްލިކޭޝަން ހުށަހަޅާފައިވެއެވެ. މި މަޢުލޫމާތު ހާމަކުރެއްވީ ޕީއެސްއެމުން ގެނެސްދިން "ކާމިޔާބުގެ 52 ހަފްތާ" ޕްރޮގްރާމްގައި، ވުޒާރާއިން މިދިޔަ އެއް އަހަރު ތެރޭ ކުރެއްވި މަސައްކަތްތައް ތަފްސީލްކޮށްދެއްވަމުންނެވެ.

ޑރ. ނަޒީރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ފުރަތަމަ އަހަރު ތެރޭގައި މީހުން ބިނާކުރުމަށް މުހިންމު އަދި ގިނަ މަސައްކަތްތަކެއް ކުރައްވާފައިވާ ކަމަށެވެ. އަދި ރާއްޖޭގެ މަތީ ތަޢުލީމު ހޯދުމަށް ރާއްޖޭގެ ދަރިވަރުން ރާއްޖޭން ބޭރަށް ދާ އުަށް ދާ އުސޫލުން، ރާއްޖޭން ބޭރުގެ ދަރިވަރުން ރާއްޖޭގައި ކިޔެވުމުގެ ޝައުޤުވެރިކަންވެސް އިތުރުވަމުންދާ ކަމަށް ފާހަގަކުރެއްވިއެވެ.

ނަމަވެސް، ޤައުމީ ޔުނިވަރސިޓީގެ މިހާރުގެ މެޑިކަލް ސްކޫލުގައި ޖާގައިގެ ދަތިކަން ހުރުމާއި، ރާއްޖޭގެ ދަރިވަރުންގެ ޑިމާންޑް ބޮޑުވުމާ ގުޅިގެން، މި ވަގުތު ބޭރުގެ ދަރިވަރރުގެ ދަރިވަރުންނަށް ފުރުސަތު ދެވިފައިނުވާކަން ޑރ. ނަޒީރު ފާހަގަކުރެއްވިއެވެ. އެހެންނަމަވެސް، ސަރުކާރުގެ އަމާޒަކީ ހުޅުމާލޭގައި ޖާގަ ތަނަވަސް މެޑިކަލް ސްކޫލެއް ޤާއިމްކޮށް، ވީހާވެސް ގިނަ ދަރިވަރުންނަށް ފުރުސަތު ފަހިކުރުން ކަމަށް އޭނާ ވިދާޅުވިއެވެ.

ބޭރުގެ ދަރިވަރުންނަށް ރާއްޖޭގައި ކިޔެވުމުގެ ފުރުސަތު ފަހިކުރުމަށްޓަކައި، އިންޓަރނޭޝަނަލް ސްޓޫޑަންޓް ވިސާ ފަސޭހަކަމާއެކު ލިބޭނެ ގޮތް ހަމަޖެއްސުމާއި، މިކަމަށް ޚާއްޞަ ޤާނޫނެއް ވުޖޫދުކުރުމަށް މަސައްކަތްކުރަމުންދާ ކަމަށްވެސް ސްޓޭޓް މިނިސްޓަރ ވިދާޅުވިއެވެ. މީގެ އިތުރުން، ބޭރުގެ ދަރިވަރުންނަށް ފަސޭހަކަމާއެކު ދިރިއުޅެވޭނެ ގޮތް ހަމަޖެއްސުމަށް ހުޅުމާލޭގައި ދަނާލެއް އެޅުމުގެ މަސައްކަތްވެސް ކުރިއަށްދާ ކަމަށް އޭނާ ހާމަކުރެއްވިއެވެ.

އަޅުގަނޑުމެންގެ އަމާޒަކީ މި 5 އަހަރުގެ ދައުރުގެ ތެރޭގައި ރާއްޖޭގައި މަތީ ތަޢުލީމު ހާސިލްކުރާ 20,000 ކުދިންގެ ތެރެއިން 5 އިންސައްތައަކީ ރާއްޖޭން ބޭރުގެ ދަރިވަރުންނަށް ހެދުން

ޑރ. ނަޒީރު ވިދާޅުވިއެވެ.

މީގެ އިތުރުން، ބޭރުގެ ދަރިވަރުންނަށް އެކަމަޑޭޝަން ފަސޭހަކަމާއެކު ލިބޭނެ ގޮތް ހަމަޖެއްސުމަށް ހުޅުމާލޭގައި ދަނާލެއް އެޅުމުގެ އިތުރުން، މާލޭގައި އެއް ދަނާލާއި އަތޮޅުތަކުގައި 5 ދަނާލު އެޅުމަށް ރޭވިފައިވާ ކަމަށް ސްޓޭޓް މިނިސްޓަރ ހާމަކުރެއްވިއެވެ. މިގޮތުން، މިހާރުވެސް 3 ރަށެއްގައި ދަނާލު އެޅުމުގެ މަސައްކަތް ފެށުމަށް ބަޖެޓް ކުރެވިފައިވާ ކަމަށް އޭނާ ވިދާޅުވިއެވެ.

ޑރ. ނަޒީރު ވިދާޅުވީ މިއީ އިޤްތިޞާދު ސިންދަފާތުކުރުމަށްޓަކައި މަތީ ތަޢުލީމުގެ ދާއިރާއިން ކުރެވޭނެ ވަރަށް މުހިންމު މަސައްކަތެއް ކަމަށެވެ. މި މަސައްކަތްތަކުގެ ސަބަބުން ރާއްޖޭގެ މަތީ ތަޢުލީމުގެ ދާއިރާ އިތުރަށް ކުރިއަރައި، ބައިނަލްއަޤްވާމީ ފެންވަރުގައި ރާއްޖޭގެ ތަޢުލީމީ ދާއިރާގެ ނަން މަޝްހޫރުވެގެންދާނެ ކަމަށް އުންމީދުކުރެވެއެވެ.