ހަމަލާތަކުގެ ސަބަބުން ޣައްޒާގެ 1410 އާއިލާއެއް މުޅިން ފަނާވެގެންގޮސްފައިވޭ

ފަލަސްޠީނުގެ ޣައްޒާއަށް އިޒްރާއިލުން ދެމުންދާ ހަމަލާތަކުގެ ސަބަބުން 1410 އާއިލާއެއް މުޅިން ފަނާވެގެންގޮސްފައިވާ ކަމަށް ފަލަސްޠީނުގެ ޞިއްޙީ ވުޒާރާއިން ބުނެފިއެވެ. 

ފަަލަސްޠީނުގެ ޞިއްޙީ ވުޒާރާއިން ނެރެފައިވާ ތަފާސްހިސާބުތަކުގައި ބުނެފައިވަނީ 1410 ޢާއިލާއެއް މުޅިން ފަނާވެގެން ގޮސްފައިވާއިރު 3463 ޢާއިލާއެއްގެ އެންމެ މެމްބަރެއް ސަލާމަތްވެފައިވާ ކަމަށެވެ. 

މީގެއިތުރުން 2287 ޢާއިލާއެއްގެ އެތައް މެމްބަރަކު ޝަހީދުވެ ގިނަ ބަޔަކު ސަލާމަތްވެފައިވާ ކަމަށް ފަލަސްޠީނުގެ ޞިއްޙީ ވުޒާރާއިން ވަނީ ބުނެފައެވެ. 

އަލްޖަޒީރާގައި ބުނެފައިވަނީ ފާއިތުވި 24 ގަޑިއިރުތެރޭގައިވެސް ފަލަސްޠީނުގެ 14 މީހަކު ޝަހީދުވެފައިވާއިރު 108 މީހަކު ޒަޚަމްވެފައިވާ ކަމަށެވެ. 

އިޒްރާއިލްގެ ހަމަލާތަކުގައި ފަލަސްޠީނުގެ ކުށެއް ނެތް ރައްޔިތުން ގިނަ ޢަދަދަކަށް ޝަހީދުވަމުން އަންނައިރު މިއަދުވެސް ޣައްޒާކައިރީގައި ހުންނަ ބޭކަރީއަކަށް ވަނީ ވަރުގަދަ ހަމަލާތަކެއް ދީފައެވެ. މިހަމަލާ އެބޭކަރީއަށް ދީފައިވަނީ އެބޭކަރީ ކައިރީގައި ބަޔަކު އެއްވެފައި ތިބި ވަގުތެއްގައެވެ. 

މިހަމަލާގައި އެތައް ބަޔަކު ޝަހީދުވެ އެތައް ބަޔަކު ޒަޚަމްވެފައިވާ ކަމަށް ފަލަސްޠީނުގެ ވަފާ ނިއުސްއިން ވަނީ ބުނެފައެވެ. 

އިޒްރާއިލުން ފަލަސްޠީނުގެ ރައްޔިތުންނަށް އަމާޒުކޮށް ދެމުންދާ ހަމަލާތަކުގައި މިހާތަނަށް 44،246 މީހަކު މިހާތަނަށް ޝަހީދުވެފައިވާއިރު، 104،746 މީހަކަށް އެކިވަރުގެ އަނިޔާތައް ލިބިފައިވާ ކަމަށް އަލްޖަޒީރާގައި ފަލަސްޠީނުގެ ޞިއްޙި ވުޒާރާ އާއި ހަވާލާދީ ވަނީ ބުނެފައެވެ.