އިސްލާމްއާބާދުގައި ހިނގި ހަމަނުޖެހުންތަކުގައި ފުލުހަކު މަރުވެއްޖެ

ޕާކިސްތާނުގެ ވެރިރަށް އިސްލާމްއާބާދުގެ ރަށްބޭރުގައި ހިނގި ކުރިމަތިލުންތަކެއްގައި ފުލުހަކު މަރުވެއްޖެއެވެ. މި ހަމަނުޖެހުންތައް ފެށުނީ، އެ ޤައުމުގެ ކުރީގެ ބޮޑުވަޒީރު އިމްރާން ޚާނަށް ތާއީދުކުރާ މީހުން ބާއްވަން އުޅުނު މުޒާހަރާއަކަށް ފުލުހުން  ހުރަސްއެޅުމާ ގުޅިގެންނެވެ.

މުޒާހަރާގައި ބައިވެރިވުމަށް އިސްލާމްއާބާދަށް ދަތުރުކުރި ޚާނަށް ތާއީދުކުރާ މީހުންނަށް ހުރަސްއެޅުމުގެ ގޮތުން ފުލުހުން ވަނީ އެ ރަށަށް ވަދެނިކުމެ ހެދެން އޮތް މަގުތައް ބަންދުކޮށްފައެވެ. މި ހަމަނުޖެހުންތަކުގައި ޢާންމުންގެ 12 މީހަކު ޒަޚަމުވިއެވެ.

މުޒާހަރާއަށް ހުރަސްއެޅުމުގެ ގޮތުން ފުލުހުން އިސްލާމްއާބާދު ބަންދުކޮށްފައި ވަނީ މީގެ ދެ ދުވަސް ކުރިންނެވެ. ޚާނަށް ތާއީދުކުރާ މީހުންނާއި އޭނާގެ ޕާކިސްތާން ތަހްރީކް އިންސާފް (ޕީޓީއައި)ގެ މެންބަރުން ރާވާފައި އޮތީ، އިސްލާމްއާބާދުގައި ހުންނަ ޤާނޫނު ހަދާ މަޖިލީހުގެ އިމާރާތް ކައިރިއަށް އެއްވުމަށެވެ. މި މުޒާހަރާގެ މަޤްޞަދަކީ ޖަލުގައި ހުންނެވި ޚާން މިނިވަންކުރުމަށް ސަރުކާރަށް ބާރުއެޅުމެވެ.

މުޒާހަރާތަކަށް ހުރަސްއެޅުމުގެ ގޮތުން ފުލުހުން ވަނީ އިސްލާމްއާބާދަށް ވަދެނިކުމެ ވެވެން އޮތް ބޮޑެތި މަގުތައް ބަންދުކޮށް، މުޒާހަރާގައި ބައިވެރިވުމަށް ދަތުރުކުރަމުންދިޔަ މީހުން ހުއްޓުވުމަށް އެތަކެއް ހާސް ފުލުހުންނާއި ސިފައިން ހަރަކާތްތެރިކޮށްފައެވެ. އަދި ބޭރު ރަށްތަކުން އިސްލާމްއާބާދަށް ދަތުރުކުރާ ރޭލުތަކާއި ބަސްތައް ވެސް ހުއްޓުވާފައިވެއެވެ.

މުޒާހަރާތައް ހުއްޓުވުމުގެ ގޮތުން ފުލުހުން ވަނީ 80 އަށްވުރެ ގިނަ މީހުން ހައްޔަރުކޮށްފައެވެ. ފުލުހުންނާއި މުޒާހަރާގެ ބައިވެރިންނާ ދެމެދު ހިނގި ކުރިމަތިލުންތަކުގައި މުޒާހަރާގެ ބައިވެރިންގެ ތެރެއިން 12 މީހަކު ވަނީ ޒަޚަމުވެފައެވެ. އަދި 70 އެއްހާ ފުލުހުންނަށް ވެސް އެކިވަރުގެ އަނިޔާތައް ލިބިފައިވާ ކަމަށް އެ ސަރަހައްދުގެ ޕްރޮވިންޝަލް ސަރުކާރުގެ މުއާޞަލާތާ ބެހޭ ވަޒީރު އުޒްމާ ބުޚާރީ ވިދާޅުވިއެވެ.

ޕާކިސްތާނުގެ ބޮޑުވަޒީރުގެ އޮފީހުން ބުނެފައިވަނީ، އިސްލާމްއާބާދަށް ވަދެނިކުމެ ހެދެން އޮތް މަގުތައް ބަންދުކޮށް، ސަލާމަތީ ފިޔަވަޅުތައް ހަރުދަނާކޮށްފައި ވަނީ ބެލަރުސްގެ ރައީސް އަލެކްސާންދްރަ ލުކަޝެންކާ އެ ޤައުމަށް ކުރެއްވުމަށް ހަމަޖެހިފައިވާ ރަސްމީ ދަތުރުފުޅާ ދިމާކޮށް ކަމުގައެވެ.