ކުވައިތަށް އަމާޒުކޮށް އީރާނުން ދިން ހަމަލާތައް އެ ޤައުމުން ކުށްވެރިކޮށްފި

އީރާނުން ކުވައިތުގެ ސަރަޙައްދަށް އަމާޒުކޮށް ދިން މިސައިލް އަދި ޑްރޯން ހަމަލާތަކަކީ ނުރައްކާތެރި ހަމަނުޖެހުމެއްގެ ފެށުން ކަމަށް ސިފަކޮށް، ކުވައިތު ސަރުކާރުން އެކަން ހަރުކަށި އިބާރާތުން ކުށްވެރިކޮށްފިއެވެ.

މި ހަމަލާއަކީ މެދުއިރުމަތީގައި އޮތް ނާޒުކު ހަނގުރާމަ ހުއްޓާލުމުގެ އެއްބަސްވުމަށް އޮތް ބޮޑު ގޮންޖެހުމެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.

ކުވައިތުގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، އީރާނުން ކުވައިތުގެ ސަރަޙައްދަށް އަމާޒުކޮށް ދިން "ޖިނާއީ ހަމަލާތައް" އެންމެ ހަރުކަށި އިބާރާތުން ކުށްވެރިކުރާ ކަމަށެވެ. މިއީ ގައުމުގެ އިސްތިޤުލާލަށް އަރައިގަތުން ކަމަށާއި، މީގެ ސަބަބުން ސަރަހައްދީ މަސްރަހު އިތުރަށް ގޯސްވެގެންދާނެ ކަމަށްވެސް އެ ބަޔާނުގައި ފާހަގަކޮށްފައިވެއެވެ.

އެމެރިކާގެ އަސްކަރިއްޔާއިން ބުނި ގޮތުގައި، އީރާނުން ކުވައިތަށް ދިން މި ހަމަލާއަކީ ހަނގުރާމަ ހުއްޓާލުމުގެ އެއްބަސްވުމާ ހިލާފަށް ދީފައިވާ ވަރަށް ބޮޑު ހަމަލާއެކެވެ. ޔޫއެސް ސެންޓްރަލް ކޮމާންޑުން ހާމަކުރި ގޮތުގައި، ހޯމްޒް ކަނޑުއޮޅި ކައިރިން އީރާނުން ފޮނުވާލި ފަސް ޑްރޯންއެއް އެމެރިކާ ސިފައިން ވަނީ ހުއްޓުވާފައެވެ. އަދި ހަވަނަ ޑްރޯންއެއް ފޮނުވާލުމުގެ ކުރިން އެކަންވެސް ވަނީ ހުއްޓުވާފައެވެ.

ކުވައިތުގެ އަސްކަރިއްޔާއިން ބުނެފައިވަނީ، އެ ޤައުމުގެ ވައިގެ ދިފާއީ ނިޒާމުން ދުޝްމަނުންގެ މިސައިލްތަކާއި ޑްރޯންތައް ހުއްޓުވައި ނައްތާލާފައިވާ ކަމަށެވެ. ގައުމުގެ އެކި ސަރަޙައްދުތަކަށް ގޮވުމުގެ އަޑު އިވިފައިވަނީ މި ދިފާއީ ނިޒާމުގެ މަސައްކަތުން ކަމަށްވެސް އަސްކަރިއްޔާއިން ބުނެއެވެ. އަދި ރައްޔިތުން ސަލާމަތީ ފިޔަވަޅުތަކަށް ސަމާލުވުމަށް ވަނީ އިލްތިމާސްކޮށްފައެވެ.

މި ހަމަލާއާ ގުޅިގެން ސަރަޙައްދީ ޤައުމުތަކުންވެސް ދަނީ ކަންބޮޑުވުން ފާޅުކުރަމުންނެވެ. ސައުދީ އަރަބިއްޔާ، ޔޫއޭއީ އަދި ޖީސީސީގެ ސެކްރެޓަރީ ޖެނެރަލް ޖާސިމް އަލް ބުދައިވީ ވަނީ މި ހަމަލާ ކުށްވެރިކުރައްވާފައެވެ. ޔޫއޭއީން ބުނި ގޮތުގައި މިއީ ކުވައިތުގެ މިނިވަންކަމަށް އަރައިގަތުމުގެ އިތުރުން، ބައިނަލްއަގުވާމީ ގާނޫނުތަކާވެސް ހިލާފު އަމަލެކެވެ.

އީރާނުން ބުނެފައިވަނީ މި ހަމަލާއަކީ އެމެރިކާއިން ބަންދަރު އައްބާސް އެއާޕޯޓް ކައިރިއަށް ދިން ހަމަލާއެއްގެ ރައްދުގައި ދިން ހަމަލާއެއް ކަމަށެވެ. ނަމަވެސް، މި ހަމަލާތަކުގެ ސަބަބުން މެދުއިރުމަތީގައި ގާއިމުކޮށްފައިވާ ހަނގުރާމަ ހުއްޓާލުމުގެ އެއްބަސްވުން އުވިގެން ހިނގައިދާނެ ކަމުގެ ބިރު މިހާރު ވަނީ ބޮޑުވެފައެވެ.