ގެއްލޭ ހައްޖުވެރިން ހޯދުމާއި އާއިލާތަކާ ގުޅުވައިދިނުމުގެ ބުރަ މަސައްކަތް!

އެތައް މިލިއަން މީހުން އެއްތަނަކަށް އެއްވާ ހައްޖުގެ މޫސުމުގައި، ހޫނުގަދަވުމާއި ވަރުބަލިކަމުގެ ސަބަބުން މަގުއޮޅުމާއި އާއިލާއާ ވަކިވުމަކީ ވަރަށް ގާތުގައި އޮންނަ ކަމެކެވެ.  މިނާގެ ފޭލިގެތަކުގެ ތެރޭގައާއި މުގައްދަސް ބިންތަކުގައި ހަރަކާތްތެރިވާ ދެ މިލިއަނެއްހާ މީހުންގެ ތެރޭގައި، އެކަކު އަނެކަކާ ވަކިވެ، މަގުއޮޅުމަށް ހޭދަވަނީ މަދު ސިކުންތުކޮޅެކެވެ.

މިކަމަށް ހައްލެއް ގެނެސް ގެއްލޭ މީހުން އަވަހަށް ހޯދައި އާއިލާތަކާ ގުޅުވައިދިނުމަށް ސައުދީ އަރަބިއްޔާގެ ކަމާބެހޭ ފަރާތްތަކުން މިހާރު ވަނީ އާޓިފިޝަލް އިންޓެލިޖެންސް (AI) އާއި ޑިޖިޓަލް ނިޒާމުތައް ބޭނުންކޮށްގެން ހައްޖުވެރިން ބެލެހެއްޓުމުގެ މަސައްކަތް ވަރުގަދަކޮށްފައެވެ.

ނުސުކް (Nusuk) ޕްލެޓްފޯމާއި، ކިއުއާރު ކޯޑު ޖަހާފައިވާ ސްމާޓް ކާޑުތަކުގެ އެހީގައި ގެއްލޭ މީހުން ދެނެގަތުން ވަނީ ފަސޭހަވެފައެވެ. ނަމަވެސް، މި ހުރިހާ ޓެކްނޮލޮޖީއަކަށްވުރެ ބޮޑަށް ހައްޖުވެރިންނަށް އެހީތެރިވަނީ އެތަނުގައި ހަރަކާތްތެރިވާ ހިލޭސާބަހަށް މަސައްކަތްކުރާ ވޮލަންޓިއަރުންނެވެ.

އަސަރުގަދަ ބައެއް ހާދިސާތައް
ވޮލަންޓިއަރެއްގެ ގޮތުގައި މަސައްކަތްކުރި ބަކުރު ހެމްދީ ކިޔައިދިން ގޮތުގައި، އޭނާގެ ހަނދާނުން ދުވަހަކުވެސް ފިލައިގެން ނުދާނެ އެއް ހާދިސާއަކީ 2013 ވަނަ އަހަރު ދިމާވި މިސްރުގެ އުމުރުން ދުވަސްވީ އަންހެން ހައްޖުވެރިއެއްގެ ހާދިސާއެވެ. "މަގުއޮޅި، ވަރުބަލިވެފައި ހުރި އެ އަންހެން މީހާ އަހަރެން ގާތު ބުނީ ދަރިފުޅާއޭ، ދެން އިތުރަށް ހިނގޭނެ ހަކަތައެއް ނެތޭ،" ހެމްދީ ކިޔައިދިނެވެ. އޭނާ ވަނީ ފުރޮޅުލީ ގޮނޑިއެއް ހޯދައިގެން އެ އަންހެން މީހާ އޭނާގެ ފޭލިގެއާ ހަމައަށް ގެންގޮސްދީފައެވެ.

މީގެ އިތުރުން މުޢާމަލާތު ކުރެވޭ ބަހުގެ ތަފާތުކަމުގެ ސަބަބުން ދިމާވާ ދަތިތަކާއި އެކުވެސް ހައްޖުވެރިންނަށް އެހީތެރިވުމުގައި ވޮލަންޓިއަރުން ބުރަ މަސައްކަތްތަކެއް ކުރެއެވެ. ޗައިނާގެ ހައްޖުވެރިއަކު ގޫގަލް ޓްރާންސްލޭޓް ބޭނުންކޮށްގެން ހަ ގަޑިއިރު ވަންދެން މަގުއޮޅިފައި ހުރިކަން އެންގުމުން، ހެމްދީ ވަނީ ފޯނުން މުއާމަލާތްކޮށް، އޭނާ ދާންވީ މަގު ސިފަކޮށްދީ ކިޔައިދީފައެވެ.

ނަފްސާނީ އެހީތެރިކަމާއި ރައްކާތެރިކަން
ސައުދީ ރެޑް ކްރެސެންޓްގެ ވޮލަންޓިއަރުން ބުނާ ގޮތުގައި، މަގުއޮޅިފައި ހުންނަ މީހަކާ ބައްދަލުވުމުން އެންމެ ފުރަތަމަ ކުރާ ކަމަކީ އެމީހަކަށް ހިތްހަމަޖެހުން ހޯދައިދިނުމެވެ. ބިރުގަނެ، ހާސްވެފައި ހުންނަ ހައްޖުވެރިޔާގެ ނަފްސާނީ ދުޅަހެޔޮކަން ކަށަވަރުކުރުމަށްފަހު، ކަމާބެހޭ މަރުކަޒުތަކަށް ގެންގޮސް، އެމީހަކު ނިސްބަތްވާ ގްރޫޕާ ހަވާލުކުރެވެއެވެ.

މިނާގެ އެކި ސަރަހައްދުތަކުގައި ގާއިމުކޮށްފައިވާ ގައިޑަންސް ސެންޓަރުތަކުން، ގެއްލޭ މީހާ ފޭލިގެއަށް ވައްދައި، އެ ގްރޫޕެއްގެ އިދާރާއިން އެކަން ކަށަވަރުކުރަންދެން ވޮލަންޓިއަރުން އެމީހަކާއެކު މަޑުކުރެއެވެ. މިއީ އެތައް މިލިއަން ބައެއްގެ ތެރޭގައި އިންސާނިއްޔަތުކަމުގެ ރީތި ނަމޫނާއެއް ފެނިގެންދާ ބުރަ މަސައްކަތެކެވެ.

ޙައްޖާއި އުމްރާގެ އަޅުކަމުގެ ތެރޭގައި ސަލާމަތާއި ރައްކާތެރިކަން އިތުރުކުރުމަށް ކުރެވޭ މަސައްކަތްތަކުގެ ތެރެއިން، މޫނު ދެނެގަންނަ ނިޒާމުތަކާއި ގެއްލޭ މީހުން ހޯދުމަށް ބޭނުންކުރާ ކޮމްޕިއުޓަރައިޒްޑް ޕްލެޓްފޯމްތައް ބޭނުންކުރުމާ ބެހޭގޮތުން ދިރާސާވެރިންނާއި އޮފިޝަލުން ދަނީ ގިނަ އަހަރުތަކެއް ވަންދެން މަސައްކަތް ކުރަމުންނެވެ.

ނަމަވެސް، ޓެކްނޮލޮޖީއަށް އަންނަމުންދާ ހަލުވި ކުރިއެރުންތަކާއެކުވެސް، އިންސާނީ ގުޅުމަކީ އަދިވެސް އެންމެ މުހިންމު އަސާސެވެ. މި މޫސުމުގައި މިލިއަނުން މީހުން މުގައްދަސް ބިންތަކުގައި ހަރަކާތްތެރިވަމުންދާއިރު، އެކަކު އަނެކަކާ ވަކިވުމާއި އަލުން ބައްދަލުވުމުގެ ހާދިސާތައް ހަމަ ހިނގަމުންދާނެއެވެ. މިކަން ތަހައްމަލުކުރާ ހައްޖާޖީންނަށް ނުދަންނަ އެތައް ހާސް ބައެއްގެ ތެރެއިން، އަލުން ދަންނަ މޫނަކާ ބައްދަލުވުމަކީ ދުވަހަކުވެސް ހަނދާނުން ފޮހެވިގެންދާނެ ކަމެއް ނޫނެވެ.