ގެދޮރުވެރިޔާ ސްކީމްގެ ރީ-އިވެލުއޭޝަނަށް މަޖިލިސް މެމްބަރުން ނުފޫޒު ފޯރުވާ ވާހަކަ ދޮގުކޮށްފި

ގެދޮރުވެރިޔާ ސްކީމްގެ ރީ-އިވެލުއޭޝަނަށް ރައްޔިތުންގެ މަޖިލީހުގެ މެމްބަރުން ނުފޫޒު ފޯރުވާކަމަށް ބުނެ ސޯޝަލް މީޑިއާ ޕްލެޓްފޯމު ތަކުގައި ދައުރު ވަމުންދާ ވާހަކަތައް ގެދޮރުވެރިކަމާ ބިމާއި ޢުމްރާނީ ތަރައްޤީއާ ބެހޭ ވުޒާރާ އިން ދޮގުކޮށްފިއެވެ.

އެވުޒާރާއިން މީގެ އިރުކޮޅެއް ކުރިން ނެރެފައިވާ ނޫސްބަޔާނެއްގައި ބުނެފައިވަނީ ގެދޮރުވެރިޔާ ސްކީމާއި ގުޅިގެން އެކި ފަރާތްތަކުން އެވުޒާރާ އާއި މެދު ނުބައި ތަޞައްވުރެއް އުފެދޭ ގޮތަށް ހަޤީޤަތާއި ޚިލާފު ވާހަކަތަކެއް ސޯޝަލް މީޑީއާ ގައި ފަތުރަމުންދާ ކަމަށެވެ. 

މި ސްކީމާއި ގުޅިގެން ކުރިއަށްދާ ރީ-އިވެލުއޭޝަންގެ މަސައްކަތަށް ރައްޔިތުންގެ މަޖިލީހުގެ މެމްބަރުންނާއި ބައެއް ސިޔާސީ ފަރާތްތަކުން ނުފޫޒު ފޯރުވާ ކަމަށްބުނެ ރައްޔިތުންގެ ހިތްތަކުގައި ނުތަަނަވަސްކަން އުފެދޭ ގޮތައް ދެކެވެމުންދާ ވާހަކަ ތަކަކީ ކަނޑައެޅިގެން ދޮގު ވާހަކަ ތަކެއް ކަމަށް އެވުޒާރާއިން ވަނީ ބުނެފައެވެ.

މީގެ އިތުރުން މި ސްކީމާއި ގުޅިގެން ކުރިއަށްގެންދާ ރީ-އިވެލުއޭޝަނުގެ މަސައްކަތަށް އެއްވެސް ސިޔާސީ ފަރާތަކުން ނުފޫޒެއް ނުފޯރުވޭނެ ކަމުގެ ޔަޤީންކަން ރައްޔިތުންނަށް ދޭކަމަށް ގެދޮރުވެރިކަމާ ބެހޭ ވުޒާރާއިން ވަނީ ބުނެފައެވެ. 

މިވުޒާރާގެ މަޤްޞަދަކީ މި ސްކީމުގެ ދަށުން ފްލެޓްތައް ލިބިގެންދާނީ އެެންމެ ހައްޤުވެރި ފަރާތްތަކަށްކަމުގައި ކަނޑައެޅިގެން ދިޔުން

ގެދޮރުވެރިކަމާ ބެހޭ ވުޒާރާ އިން ބުނެފައިވެއެެވެ.

ހަމަމިއާއި އެކު މިމަސައްކަތަކީ ވަރަށްގިނަ ރައްޔިތުންގެ ބޯހިޔާވަހިކަމާ ގުޅިފައިވާ ވަރަށް ޚައްސާސް މައްސަލައަކަށް ވާތީ މިކަމުގެ އެވުޒާރާގެ ރަސްމީ ބަހެއް ހޯދުމެއް ނެތި ސިޔާސީ ބޭނުމަށް ހަޤީޤަތާ ޚިލާފު ޚަބަރު ނުފެތުރުމަށް އެވުޒާރާއިން ވަނީ އިލްތިމާސްކޮށްފައެވެ. 

ގެދޮރުވެރިޔާ ސްކީމްގެ ރީ-އިވެލުއޭޝަނުގެ މަސައްކަތަށް ރައްޔިތުންގެ މަޖިލީސް މެމްބަރުން ނުފޫޒު ފޯރުވާކަމަށްބުނެ، މީސްމީޑިއާގައި ފަތުރަމުންދާ ވާހަކަތަކާ ގުޅޭ. pic.twitter.com/rv8iQupYsT

— Ministry of Housing, Land and Urban Development (@MHLUDmv) November 26, 2024

ގެދޮރުވެރިޔާ ސްކީމްގެ ފުރަތަމަ 4000 ފްލެޓް ލިބޭ މީހުންގެ ލިސްޓު އާންމު ކޮށްފައިވަނީ މިދިޔަ ސަރުކާރު ނިމެން ކުޑަދުވަސްކޮޅަކަށް ވެފައި ވަނިކޮށެވެ. ލިސްޓު އާންމު ކުރުމާއި ގުޅިގެން އާންމުންގެ ގިނަ ޝަކުވާތަކެއް އައުމާއި ގުޅިގެން އޭސީސީއިން ވަނީ ފްލެޓް ހަވާލުކުރުން ހުއްޓުވައިފައެވެ. 

އާންމުންގެ ޝަކުވާތަކާއި އެކު އޭސީސީއިން ވަނީ މައްސަލަ ތަހްޤީޤު ކޮށްފައެވެ. ތަހުޤީޤަށް ފަހު އޭސީސީއިން ބުނެފައިވަނީ ލިސްޓުގައި ހިމެނޭ މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާމީހުން ކަމަށެވެ. 

ލިސްޓުގައި ހިމެނޭ ޝަރުތު ހަމަވާމީހުންނަށް ފްލެޓް ދިނުމަށް އޭސީސީއިން ވަނީ ގެދޮރުވެރިކަމާ ބެހޭ ވުޒާރާއަށް ހުއްދަދީފައެވެ.