މިހާތަނަށް 3200އަށްވުރެ ގިނަ މީހުން ހިލޭ މެޑިކަލް ޗެކްއަޕްގެ ޚިދުމަތް ހޯދައިފައިވޭ: އެންސްޕާ

މިހާތަނަށް 3200އަށްވުރެ ގިނަ މީހުން ހިލޭ މެޑިކަލް ޗެކްއަޕްގެ ޚިދުމަތް ހޯދައިފައިވާ ކަމަށް ނޭޝަނަލް ޕްރޮޓެކްޝަން އޭޖެންސީ (އެންސްޕާ) އިން ބުނެފިއެވެ. 

ހަފްތާ 52 އަކާއި ހަމައަށް ހާސިލްކުރެވިފައިވަ ކަންކަން ހާމަކޮށް އެންސްޕާއިން ޢާންމު ކޮށްފައިވާ މަޢުލޫމާތުތަކުގައި އެއެޖެންސީ އިން ބުނެފައިވަނީ ހިލޭ މެޑިކަލް ޗެކަޕްގެ ފުރުސަތަށް ހުޅުވާލިފަހުން އެކި އުމުރުފުރާތަކުން 3238 މީހުން ވަނީ ޚިދުމަތް ހޯދާފައިވާ ކަމަށެެވެ. އޭގެ ތެރޭގައި ހިމެނެނީ 1411 ފިރިހެނުންނާއި، 1827 އަންހެނުންނެކެވެ.

އެންސްޕާގެ ތަފާސްހިސާބުތަކުން ދައްކާގޮތުން މިޚިދުމަތް އެންމެ ގިނައިން ހޯދާފައިވަނީ، 40 އަހަރުން މަތީގެ މީހުންނެވެ. އެގޮތުން 40 އަހަރުން މަތީގެ 2428 މީހުންވަނީ މިޚިދުމަތް ހޯދާފައިވެއެވެ. އުމުރުން 40 އަހަރުން މަތީގެ ކޮންމެ މީހަކަށް ހިލޭ ކެންސަރަށް ސްކްރީންކުރެވޭނެ ގޮތްވެސް ސަރުކާރުންވަނީ ހަމަޖައްސާފައިވާ ކަން ފާހަގަކޮށްލަން ޖެހެއެވެ.  އެގޮތުން މިވީ މުއްދަތުގެ ތެރޭގައި 512 މީހުން މިޕެކޭޖް ނަގާފައިވާކަން އެންސްޕާގެ ތަފާސްހިސާބުތައް ދައްކައެވެ.

މިމުއްދަތުގެ ތެރޭގައި 19 އަހަރާއި 39 އަހަރާއި ދެމެދު އުމުރުފުރާއިން 278 މީހުންވަނީ މެޑިކަލް ޗެކަޕް ހަދާފައެވެ. އަދި 18 އަހަރުން ދަށުގެ ކުދިންގެ ތެރެއިން 20 ކުއްޖަކު ސްކޫލް ހެލްތު ސްކްރީނިން ހަދާފައިވާކަމަށް އެއެޖެންސީގެ ތަފާސްހިސާބުތައް ބުނެއެވެ. 

ރާއްޖޭގައި އިތުރުވަމުންދާ ދާއިމީ ބޮޑެތި ބަލިތައް ދުރާލާ ދެނެގަތުމަށް އާސަންދަ މެދުވެރިކޮށް ހިލޭ މެޑިކަލް ޗެކަޕް ހުރިހާ އުމުރުފުރާއަކަށް ހެދޭ ގޮތަށް ސަރުކާރުން ހުޅުވާލީ މިދިޔަ ޖުލައި މަހުއެވެ. 

އެގޮތުން މިއަހަރުގެ ޖެނުއަރީ މަހުގެ ފުރަތަމަ ދުވަހުން ފެށިގެން އުމުރުން 50 އަހަރުން މަތީގެ މީހުންނަށް، އަދި އޭޕްރީލް މަހުގެ ފުރަތަމަ ދުވަހުން ފެށިގެން އުމުރުން 35 އަހަރާއި 49 އަހަރާއި ދެމެދުގެ އުމުރުފުރައިގެ މީހުންނަށާއި އުމުރުން 19 އަހަރުން ދަށުގެ ކުދިންނަށް އާސަންދައިގެ ދަށުން މެޑިކަލް ޗެކަޕް ހެދޭނެ އިންތިޒާމްވަނީ ހަމަޖައްސަވާފައެވެ. 

އޭގެ ފަހުން ޖުލައި މަހު ހުރިހާ އެންމެންނަށް މެޑިކަލް ޗެކަޕް ހެދޭ ގޮތަށްވަނީ ހަމަޖައްސަވާފައެވެ.