ބައްސާމްގެ މައްޗަށް މަނީ ލޯންޑަރ ކުރުމުގެ ދަޢުވާ ކުރުމަށް ފޮނުވައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް މަނީ ލޯންޑްރިންގ ކުށުގެ ދަޢުވާ ކޮށްދިނުމަށް އެދި ޕްރޮސިކިއުޓަރ ޖެނެރަލްގެ އޮފީހަށް މިއަދު ފޮނުވައިފިއެވެ. 

ބައްސާމްގެ މައްޗަށް މަނީ ލޯންޑަރިންގެ ކުށުގެ ދަޢުވާ ކުރުމަށް ފޮނުވާފައި ވަނީ އެމްއެމްޕީއާރުސީގެ ހިޔާނާތުގެ މައްސަލައިގައެވެ. އެގޮތުން މި ހިޔާނާތުގައި ބޭނުންކުރި އެސް.އޯ.އެފް ޕްރައިވެޓް ލިމިޓެޑް (އެސް.އޯ.އެފް) ނަމަކަށް ކިޔާ ކުންފުނީގެ ބޭންކު އެކައުންޓުން ބައްސާމްގެ ބޭންކް އެކައުންޓަށް 29,000  (ނަވާވީސް ހާސް) އެމެރިކާ ޑޮލަރު ޖަމާކޮށްފައިވާކަން ތަޙުޤީޤަށް ސާބިތުވެފައިވާކަމަށް އެންޓި ކޮރަޕްޝަން ކޮމިޝަން (އޭސީސީ)އިން ވަނީ ހާމަކޮށްފައެވެ. އަދި މި ފައިސާ ބައްސާމްގެ އަމިއްލަ ބޭނުންތަކަށް ބޭނުންކޮށްފައިވާކަން ސާބިތުވެފައިވާކަމަށް ވެސް އޭސީސީއިން ބުނެއެވެ.

މީގެއިތުރުން މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރު.ސީ) މެދުވެރިކޮށް ރަށްތަކާއި ފަޅުތައް ވިއްކުމުގެ ކަންކަމުގައި ބައްސާމް ބައިވެރިވެރިވެފައިވާކަމަށް ވެސް އޭސީސީން ފާހަގަ ކުރެއެވެ. އެގޮތުން އެ ކުންފުނީގެ ބައެއް އެއްބަސްވުންތަކުގައި އެ ކުންފުނީގެ ފަރާތުން ހެއްކެއްގެ ގޮތުގައި ބައްސާމު ވަނީ ސޮއިކޮށްފައެވެ.

ބައްސާމު ޢަދީލް ޖަލީލްގެ މައްޗަށް މަނީ ލޯންޑްރިންގގެ ދައުވާ ކުރަން ނިންމައިފި https://t.co/Anuhs45wbr

— ACC-MALDIVES (@ACC_Maldives) June 1, 2026

މިމައްސަލައިގައި ބައްސާމުގެ މައްޗަށް ދައުވާ ކޮށްދިނުމަށް އެދި ފޮނުވާފައިވަނީ، މަނީ ލޯންޑްރިންގ އަދި ޓެރަރިޒަމްއަށް ފައިނޭންސްކުރުން ހުއްޓުވުމުގެ ޤާނޫނުގެ ދަށުންކަމަށް އެކޮމިޝަނުން ވިދާޅުވެއެވެ.