ގޯލްޑް ކަޕް: ތުޅާދޫ ބަލިކޮށް މާލޭ ސިޓީ ދެވަނަ ބުރަށް

ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގެ ގްރޫޕް-ބީގައި މާލޭ ސިޓީ އާއި ތުޅާދޫ ބައްދަލުކުރި މެޗު ބޮޑު ތަފާތަކުން މާލޭ ސިޓީ ކާމިޔާބުކޮށް، އެ ޓީމުން ދެވަނަ ބުރުގެ ޖާގައެއް ކަށަވަރުކޮށްފިއެވެ. އަންގާރަ ދުވަހުގެރޭ ގަލޮޅު ދަނޑުގައި ކުޅުނު މި މެޗު މާލޭ ސިޓީ ކާމިޔާބުކުރީ 5-0 އިންނެވެ.

މުބާރާތުގައި މިހާތަނަށް ކުޅުނު ދެ މެޗު ވެސް މާލޭ ސިޓީއިން ތަފާތު ބޮޑުކޮށް ކާމިޔާބުކޮށްފައިވާއިރު، އަދި މިހާތަނަށް އެއްވެސް ޓީމަކަށް އެ ޓީމުގެ ގޯލު ފޫއަޅުވާލެވިފައެއް ނުވެއެވެ. ފުރަތަމަ މެޗުގައި އެ މީހުން ތިމަރަފުށި ބަލިކުރީ 4-0 އިންނެވެ.

ތުޅާދޫއާ ދެކޮޅަށް ކުޅުނު މެޗުގައި މާލޭ ސިޓީއަށް ލީޑު ލިބުނީ ތުޅާދޫގެ ޝަމްވީލް މުހައްމަދު (ބޮންޑާ) އަތުން ބައިކޮޅަށް ވަތް ގޯލަކުންނެވެ. މާލޭ ސިޓީގެ ހަމަލާއެއް ކްލިއަރ ކޮށްލުމަށްޓަކައި ބޮންޑާ ބޮލުން ޖައްސާލި ބޯޅަ ފަހަތަށް ގޮސް ގޯލަށް ވަނީ ކީޕަރުގެ ބޯމަތިންނެވެ. 

މާލޭ ސިޓީގެ ދެވަނަ ގޯލު ކާމިޔާބުކޮށްދިނީ ދިވެހި ޕްރިމިއާ ލީގުގައި ޓީސީ ސްޕޯޓްސްއަށް ކުޅޭ މިޑްފީލްޑަރު، ޔަޒްދާންއެވެ. އޭގެ ފަހުން ލީޑު ފުޅާ ކުރުމަށް މާލޭ ސިޓީއަށް ލިބުނު ޕެނަލްޓީ ވަނީ ބޭކާރުވެފައެވެ. ތުޅާދޫގެ އޭރިޔާ ތެރެއިން ކުރި ފައުލަކަށް ލިބުނު ޕެނަލްޓީ ފޮނުވާލަން ނިކުތީ ޓީމުގެ ކެޕްޓަން ރިލްވާން ވަހީދު (ރިލޭ)އެވެ. ނަމަވެސް ތުޅާދޫގެ ކީޕަރު، އަލީ ރަމީޒް ވަނީ ރިލޭގެ ޕެނަންކާ ހުޝިޔާރުކަމާއެކު މަތަކޮށްފައެވެ. 

މާލޭ ސިޓީގެ ތިން ވަނަ ގޯލު ކާމިޔާބުކުރީ، ޒުވާން ގައުމީ ޓީމަށް ކުޅެމުން އަންނަ، އަދި ދިވެހި ޕްރިމިއާ ލީގުގައި ޓީސީއަށް ކުޅެމުން އަންނަ އަހުނަފް މުހައްމަދު ތަސްނީމް (ނަފްކޮ)އެވެ. އަދި އެ ޓީމުގެ ހަތަރުވަނަ ގޯލާއި ފަސްވަނަ ގޯލު ކާމިޔާބުކޮށްދީފައި ވަނީ، ބަދަލު ކުޅުންތެރިއެއްގެ ގޮތުގައި ކުޅެން ނިކުތް މުހައްމަދު ނާއިލްއެވެ. 

މާލޭ ސިޓީއަށް ދެވަނަ ބުރު ޔަގީން މިވީ 6 ޕޮއިންޓާއެކުއެވެ. ދެވަނަ ބުރަށް ދަތުރު ކުރާނީ ކޮންމެ ގްރޫޕަކުން އެންމެ ރަގަޅު ނަތީޖާ ހޯދާ 3 ޓީމެވެ. ދެވަނަ ބުރުގައި 3 ޓީމު ހިމެނޭހެން 4 ގްރޫޕަށް ބަހާލުމަށްފަހު އަނެއްކާ ވެސް މެޗުތައް ކުޅޭނީ ލީގު އުސޫލުންނެވެ. އަދި އެއަށްފަހު ކުއާޓާ ފައިނަލަށް ދަތުރު ކުރާނީ ކޮންމެ ގްރޫޕަކުން 2 ޓީމެވެ.

މުބާރާތުގެ މެޗުތައް ބުދަ ދުވަހު ވެސް އޮންނާނެއެވެ. ފުރަތަމަ މެޗުގައި ބައްދަލުކުރާނީ ތިމަރަފުއްޓާއި ހުރާއެވެ. އަދި ދެވަނަ މެޗުގައި ނައިފަރުން ނިކުންނާނީ އަލިފުއްޓާ ދެކޮޅަށެވެ.