މާލެ ޓެކްސީ ލައިންގެ އެޕްލިކޭޝަން އެޕަލް އެޕް ސްޓޯރަށް

މާލެ ސަރަހައްދުގައި ދަތުރުފަތުރުގެ ހިދުމަތް ދިނުމަށް ހާއްސަކޮށްގެން އުފައްދާފައިވާ "މާލެ ޓެކްސީ ލައިން" (އެމް.ޓީ.އެލް) ގެ މޮބައިލް އެޕްލިކޭޝަން އައިފޯން ބޭނުންކުރާ ފަރާތްތަކަށް އެޕަލް އެޕް ސްޓޯރުން މިހާރު ލިބެން ފަށައިފިއެވެ.

މި އެޕްލިކޭޝަން މެދުވެރިކޮށް ގްރޭޓަރ މާލެ ރީޖަން (މާލެ، ހުޅުމާލެ އަދި ވިލިމާލެ) ގެ ކޮންމެ ސަރަހައްދަކުންވެސް ފަސޭހަކަމާއެކު ޓެކްސީ ބުކް ކުރެވޭނެ އެވެ. މާލެ ޓެކްސީ ލައިނުން ބޭނުންކުރަނީ ތިމާވެއްޓާ ރައްޓެހި އިލެކްޓްރިކް ޓެކްސީތަކެއް ކަމަށްވާތީ، މިއީ ތިމާވެއްޓަށް ލިބޭ ގެއްލުން ކުޑަ، ރައްކާތެރި އަދި އިތުބާރު ހުރި ހިދުމަތެކެވެ.

އެމް.ޓީ.އެލް އިން ހާމަކޮށްފައިވާ ގޮތުގައި، އައިފޯން ގެންގުޅޭ ފަރާތްތަކަށް ކިއުއާރު ކޯޑު ސްކޭން ކޮށްގެން ނުވަތަ އެޕް ސްޓޯރުގެ ލިންކް މެދުވެރިކޮށް މިހާރު އެޕްލިކޭޝަން ޑައުންލޯޑް ކުރެވޭނެ އެވެ. އަދި އެންޑްރޮއިޑް ފޯނު ބޭނުންކުރާ ފަރާތްތަކަށް ހާއްސަ ގޫގުލް ޕްލޭ ސްޓޯރުގެ ވަރޝަން ވަރަށް އަވަހަށް ތައާރަފު ކުރެވޭނެ ކަމަށްވެސް އެ ކުންފުނިން ބުނެއެވެ.

އެންޑްރޮއިޑް އެޕްލިކޭޝަން ލިބެންދެން، އެންޑްރޮއިޑް ފޯނު ބޭނުންކުރާ ފަރާތްތަކަށް އެމް.ޓީ.އެލް ގެ ވެބް އެޕްލިކޭޝަން މެދުވެރިކޮށް ދަތުރުތައް ބުކް ކުރެވޭނެ އެވެ. މީގެ އިތުރުން، އެ ކުންފުނީގެ ހޮޓްލައިން ނަންބަރު 1655 އަށް ގުޅައިގެންވެސް ޓެކްސީގެ ހިދުމަތަށް އެދެވޭނެ އެވެ.

މި އާ އެޕްލިކޭޝަންގެ ސަބަބުން މާލެ ސަރަހައްދުގައި ދިރިއުޅޭ ރައްޔިތުންނަށް އެންމެ ޒަމާނީ ވަސީލަތްތަކާއެކު، ފަސޭހަކަމާއެކު ޓެކްސީގެ ހިދުމަތް ހޯދުމުގެ މަގު ފަހިވެގެންދާނެ އެވެ.

The Malé Taxi Line App is now available on the App Store! 📱🚖

Book safe, reliable and environmentally friendly electric taxis across the Greater Malé Region with just a few taps.

📲 Scan the QR code or visit the link below to download the app and start your journey today.… pic.twitter.com/GjDJvYao05

— MTCC Plc (@MTCCPlc) June 2, 2026

މާލޭ ޓެކްސީ ލައިންގެ ޚިދުމަތް ސަރުކާރުން ރަސްމީކޮށް އިފްތިތާޙުކުރީ 2 އެޕްރީލްގައެވެ. މިއީ މާލޭ ސަރަޙައްދަށް ކުރިމަތިވެފައިވާ ޓެކްސީގެ ދަތިކަމަށް ވަށާޖެހޭ ޙައްލެއް ހޯއްދަވައިދެއްވުމުގެ މަޤުޞަދުގައި، ރައީސުލްޖުމްހޫރިއްޔާގެ އިސްނެންގެވުމުގެ މަތީން، ފަރުމާކުރެއްވި މަސައްކަތެކެވެ.

މާލެ ޓެކްސީ ލައިންގެ ޚިދުމަތް ފެށިތާ ފުރަތަމަ މަހުގެ ތެރޭގައި 13،000 އަށްވުރެ ގިނަ ދަތުރުކޮށްފައިވާ ކަމަށް ޚިދުމަތް ދެމުންދާ އެމްޓީސީސީއިން ވިދާޅުވެއެވެ. ޓެކްސީގެ ޚިދުމަތް ދިނުމަށް ތިމާވެއްޓާ ރައްޓެހި 150 އުޅަނދު ވަނީ ގެނެސްފައެވެ. މީގެ ތެރޭގައި 3 ސައިޒެއްގެ އުޅަނދުތައް ހިމެނެއެވެ. އަދި މި ޚިދުމަތަށް ބޭނުންކުރާނީ %100 ތިމާވެއްޓާ ރައްޓެހި އުޅަނދުތަކެކެވެ.