Ads by Exprox

ޚަބަރު

ރާއްޖޭގައި ހެލިކޮޕްޓަރު އޮޕަރޭޓްކުރަން ފަށާނީ އަންނަ އަހަރުގެ މާރިޗު މަހު: ވަޒީރު އަމީން

ރާއްޖޭގައި ހެލިކޮޕްޓަރު އޮޕަރޭޓްކުރަން ފަށާނީ އަންނަ އަހަރުގެ މާރިޗު މަހު: ވަޒީރު އަމީން

ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ފޮޓޯ:އެޑިޝަން

އާމިނަތު ޔުމްނާ

އާމިނަތު ޔުމްނާ

27 ނޮވެމްބަރު 2024، 09:07

27 ނޮވެމްބަރު 2024، 09:07

ރާއްޖޭގައި ހެލިކޮޕްޓަރު އޮޕަރޭޓް ކުރަން ފަށާނީ އަންނަ އަހަރުގެ މާރިޗު މަހުގެ ތެރޭގައި ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްއިން ގެނެސްދޭ "ހަފްތާ 52" ޕްރޮގްރާމްގައި ވާހަކަފުޅު ދައްކަވަމުންނެވެ.

ވަޒީރު އަމީން ވިދާޅުވި ގޮތުގައި، ކުރިއަށް އޮތް 10 ނުވަތަ 15 ދުވަހުގެ ތެރޭގައި ހެލިކޮޕްޓަރު އޮޕަރޭޓްކުރާނެ ފަރާތަކާއެކު އެއްބަސްވުމުގައި ސޮއިކުރެވޭނެއެވެ. އަދި ރާއްޖޭގައި މި ޚިދުމަތް ފެށިގެންދާނީ ސިވިލް އޭވިއޭޝަންގެ ހުރިހާ މިންގަނޑުތަކަކަށް ފެތޭ ގޮތަށް ކަމަށްވެސް އޭނާ ވިދާޅުވިއެވެ.

މިދިޔަ އޮގަސްޓު މަހު، ރާއްޖޭގައި ހެލިކޮޕްޓަރުގެ ޚިދުމަތް ދިނުމަށް ޝައުޤުވެރިވާ ފަރާތްތަކަށް ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން ހުޅުވާލިއެވެ. މި ފުރުޞަތަށް ބައިނަލްއަޤްވާމީ 36 ކުންފުންޏަކުން ވަނީ ޝައުޤުވެރިކަން ފާޅުކޮށްފައެވެ.

ވަޒީރު އަމީން އިތުރަށް ވިދާޅުވި ގޮތުގައި، މި ޚިދުމަތް ފެށުމުން އެއް ރަށުން އަނެއް ރަށަށް ނުވަތަ މާލެއަށް ގެންނަންޖެހޭ ބަލިމީހުންގެ ކަންތައްތައް ފަސޭހަވެގެންދާނެއދާނެއެވެ. އަދި ރޭގަނޑު ޓޫރިސްޓުން އުފުލުމުގައި ހުރި ދަތިތަކަށްވެސް ޙައްލު ލިބިގެންދާނެއެވެ.

ދަތުރުފަތުރާބެހޭ ވުޒާރާއިން ކުރިން ބުނެފައިވާ ގޮތުގައި، ހެލިކޮޕްޓަރުގެ ޚިދުމަތް ދޭން ނިންމާފައިވަނީ އިމަރޖެންސީ ހާލަތްތަކުގައި ޚިދުމަތް ދިނުމަށާއި، ރާއްޖޭގެ ފަތުރުވެރިކަމުގެ ސިނާޢަތް ކުރިއެރުވުމަށެވެ. މި ޚިދުމަތް ދިނުމަށް އެއްބަސްވާ ފަރާތަކަށް 10 އަހަރުގެ މުއްދަތަކަށް ރާއްޖޭގެ އެކި ސަރަޙައްދުތަކަށް ފަތުރުވެރިން އުފުލުމުގެ ހުއްދަ ދެވޭނެއެވެ.

ރާއްޖޭގައި ކުރިން ދެމުންދިޔަ ހެލިކޮޕްޓަރުގެ ޚިދުމަތް ހުއްޓާލާފައިވަނީ ދިމާވި ހިތާމަވެރި ހާދިސާތަކަކާ ގުޅިގެންނެވެ. އަލުން މި ޚިދުމަތް ފެށުމަށް ސަރުކާރުން ނިންމީ މިދިޔަ ޖެނުއަރީ މަހުގައެވެ. މި ނިންމުން ނިންމާފައިވަނީ އިނގިރޭސިވިލާތުގެ ސިވިލް އޭވިއޭޝަންގެ އެހީގައި ހަދާފައިވާ ޓެކްނިކަލް އެސެސްމަންޓްތަކަކަށް ފަހުގައެވެ.
                    

މި ލިޔުން ކިޔާލުމުން

Ads by MSS