ޗެމްޕިއަންސް ލީގު: އަމިއްލަ ދަނޑުގައި ސިޓީއަށް 3 ގޯލުގެ ލީޑެއް ގެއްލުނު އިރު، ބެޔާން އިން ޕީއެސްޖީ ބަލިކޮށްފި

ޔޫއެފާ ޗެމްޕިއަންސް ލީގުގައި އަންގާރަ ދުވަހުގެރޭ އަމިއްލަ ދަނޑުގައި ޕެޕް ގާޑިއޯލާގެ މެންޗެސްޓަރ ސިޓީއަށް 3 ގޯލުގެ ލީޑެއް ގެއްލުނު އިރު، ބެޔާން މިއުނިކް އަތުން ބަލިވެ، ޕެރިސް-ސެއިންޓް ޖަމެއިން (ޕީއެސްޖީ) މުބާރާތުން އަލްވަދާއު ކިޔަން ޖެހިދާނެކަމުގެ ބިރު އެ ޓީމަށް ހީވެއްޖެއެވެ. 

މެންޗެސްޓަރ ސިޓީއިން އަމިއްލަ ދަނޑުގައި ޑަޗް ލީގުގެ ހަތަރުވަނައިގައި އޮތް ފެޔެނޫދުއާ ދެކޮޅަށް ނިކުތީ، ޖެހިޖެހިގެން އެ ކްލަބު 5 މެޗުން ބަލިވެފައި ވަނިކޮށް އެކަން ނިމުމަކަށް ގެނައުމަށެވެ. އެގޮތުން، ސިޓީއިން ވަނީ މެޗުގެ 44 ވަނަ މިނެޓުގައި ލީޑު ނަގާފައެވެ. އެއީ ޕެނަލްޓީއަކުން ހާލަންޑު ކާމިޔާބުކޮށްދިން ގޯލެކެވެ. 

ސިޓީއިން އެ ޓީމުގެ ލީޑު ފުޅާކުރީ ދެވަނަ ހާފުގައެވެ. މެޗުގެ 50 ވަނަ މިނެޓުގައި ސިޓީއަށް ދެވަނަ ގޯލު ކާމިޔާބުކޮށްދިނީ، ބާސެލޯނާއިން އެނބުރި އައި އިލްކޭ ގުންޑޮގަންއެވެ. އަދި އޭގެ 3 މިނެޓު ފަހުން ހާލަންޑުގެ އިތުރު ގޯލަކާއެކު ސިޓީއިން ރަގަޅު ލީޑެއް ނެގިއެވެ.

ފެޔެނޫދުގެ ފުރަތަމަ ގޯލު ފެނިގެން ދިޔައީ މެޗު ނިމެން 15 މިނެޓަށްވެފައި ވަނިކޮށެވެ. އެއީ ސިޓީގެ ކީޕަރ އެޑަސަން ކައިރިން ނައްޓާލުމަށް އެ ޓީމުގެ ކުރިޔަށް ކުޅޭ ހަޖް މޫސާ ކާމިޔާބުކުރި ގޯލެކެވެ. ފެޔެނޫދުގެ ދެވަނަ ގޯލު ކާމިޔާބުކުރީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ސެންތިއާގޯ ގިމެނޭޒްއެވެ. އަދި އެ ޓީމުން މެޗުގެ ނަތީޖާ ހަމަހަމަ ކުރީ މެޗު ނިމެން މިނެޓަކަށްވެފައި ވަނިކޮށް ޑޭވިޑް ހަންޗޯއެވެ. މިއީ ޗެމްޕިއަންސް ލީގުގެ މެޗެއްގެ ފަހު 20 މިނެޓުގެ ތެރޭގައި 3 ގޯލުގެ ލީޑެއް ބަދަލުކޮށްލި ފުރަތަމަ ފަހަރު ވެސް މެއެވެ.

މެޗަށްފަހު ވާހަކަ ދައްކަމުން ގާޑިއޯލާ ބުނީ، އެ ޓީމުގެ ކޮޅަށް ގޯލު ވަންނަނީ އެއް ޓެމްޕޯއެއްގައި ނުކުޅެވޭތީ ކަމަށާއި، މިހާރު އެ ޓީމަށް އެންމެ މުހިންމީ މެޗަކުން މޮޅުވުން ކަމަށެވެ.

މި ނަތީޖާތަކާއެކު، ޗެމްޕިއަންސް ލީގުގެ ޕޮއިންޓު ޓޭބަލްގައި ސިޓީ މިހާރު އޮތީ 15 ވަނައިގައެވެ. އެ ޓީމު މިހާތަނަށް ކުޅުނު 5 މެޗުން ލިބިފައިވަނީ 8 ޕޮއިންޓެވެ. ޕްލޭ-އޮފް މެޗުތަކާ ނުލައި މުބާރާތުގެ ގަދަ-16 އަށް ދަތުރު ކުރުމަށް ޕޮއިންޓް ޓޭބަލްގެ ގަދަ 8 ޓީމުގެ ތެރޭގައި ހިމެނެން ޖެހޭނެއެވެ. ޓޭބަލްގެ 9 ވަނައިން 24 ވަނައާއި ދެމެދު ހިމެނޭ ޓީމުތަކަށް ނޮކް-އައުޓް ބުރަށް ދަތުރު ކުރެވޭނީ ޕްލޭ-އޮފް މެޗަކަށް ފަހުއެވެ. 

އަންގާރަ ދުވަހުގެރޭ ބެޔާންއަށް ޕީއެސްޖީ ބަލިކުރެވުނު ނަމަވެސް، އެ ޓީމު ވެސް އަދި އޮތީ ލީގުގެ 11 ވަނައިގައެވެ. ބެޔާންގެ ހަމައެކަނި ގޯލު ކާމިޔާބުކޮށްދީފައިވަނީ، އެ ޓީމަށް ލިބުނު ކޯނަރެއްގައި ސައުތު ކޮރެއާގެ ޑިފެންޑަރު ކިމް މިން-ޖޭއެވެ. 

ދެވަނަ ހާފުގައި ޕީއެސްޖީގެ އުސްމާން ޑެމްބެލޭއަށް ރަތް ކާޑެއް ދެއްކުމާ ގުޅިގެން، މެޗުގެ ނަތީޖާ ބަދަލު ކުރުމަށް އެ ޓީމަށް ބޮޑެތި ގޮންޖެހުންތަކާ ކުރިމަތިވިއެވެ. އެ ޓީމު މިހާތަނަށް ޗެމްޕިއަންސް ލީގުގައި 5 މެޗު ކުޅެފައިވާއިރު، ކާމިޔާބު ކުރެވިފައިވަނީ އެންމެ 3 ގޯލެވެ. އަދި 4 ޕޮއިންޓާއެކު 26 ވަނައިގައި އޮތުމުން، މުބާރާތުގައި އިތުރަށް ކުރިޔަށް ދިއުމާމެދު އޮތީ ވަރަށް ނާއުއްމީދީ ގޮތަކަށެވެ.