25 އަހަރު ކުރިން ގެއްލުނު މީހަކު ހޮސްޕިޓަލަކުން ފެނިއްޖެ

ކެލިފޯނިއާގެ މީހަކު 25 އަހަރު ކުރިން ގެއްލުނު ފަހުން، އޭނާގެ ދައްތަ ނޫސް މަޖައްލާއެއްގައި ޝާއިޢުކޮށްފައިވާ ފޮޓޯއެއް ފެނުމާ ގުޅިގެން ހޮސްޕިޓަލަކުން ފެނިއްޖެކަމަށް އިދާރާތަކުން ބުނެފިއެވެ.

މި ހާދިސާ ހިނގާފައިވަނީ އެ މީހާގެ ދައްތަ ބުރާސްފަތި ދުވަހު އިދާރާތަކަށް ގުޅައި،  ޔޫއެސްއޭ ޓުޑޭގައި ޝާއިޢުކޮށްފައިވާ ލިއުމެއްގައި އޭނާގެ އަޚްއާ އެއްގޮތް މީހެއްގެ ފޮޓޯއެއް ފެނުނު ކަމަށް ބުނުމާ ގުޅިގެންނެވެ. މި މަޢުލޫމާތު ލަސެން ކައުންޓީ ޝެރިފްގެ އޮފީހުން ދީފައިވެއެވެ.

އެމީހާގެ އަޚް ގެއްލިފައިވަނީ 1999 ވަނަ އަހަރު ކެލިފޯނިއާގެ ޑޮއިލް އިންނެވެ. މިއީ ނެވާޑާގެ ރީނޯއާ ކައިރި ސަރަ ސަރަޙައްދެކެވެ. ފުލުސް އޮފީހުން ބުނާ ގޮތުގައި އޭނާ ގެއްލިފައިވަނީ އަމިއްލަ އިޚްތިޔާރުގައެވެ.

ޔޫއެސްއޭ ޓުޑޭގައި ޝާއިޢުކޮށްފައިވާ ލިއުމުގައި، ލޮސް އެންޖެލެސް ސަރަޙައްދުގެ ހޮސްޕިޓަލެއްގައި ވާހަކަ ނުދެއްކޭ މީހަކު ހުރިކަމަށާއި، އޭނާ ދެނެގަތުމަށް އާންމުންގެ އެހީތެރިކަމަށް އެދިފައިވާކަމަށް ޝެރިފްގެ އޮފީހުން ބުނެފައިވެއެވެ.

ލަސެން ކައުންޓީ ޝެރިފްގެ ޑެޕިއުޓީ ޑެރެކް ކެނެމޯރ ހޮސްޕިޓަލާ ގުޅުމުން، އެ މީހާ ޖުލައި މަހު ލޮސް އެންޖެލެސް ސަރަޙައްދުގެ އެހެން ހޮސްޕިޓަލަކަށް ބަދަލުކޮށްފައިވާކަން އެނގުނެވެ. ލޮސް އެންޖެލެސް ޕޮލިސް ޑިޓެކްޓިވްއެއް ދެވަނަ ހޮސްޕިޓަލަށް ގޮސް އެ މީހާގެ އިނގިލީގެ ނިޝާން ނެގުމުން، އެއީ 1999 ގައި ގެއްލުނު މީހާކަން ކަށަވަރުވިއެވެ.

ކެނެމޯރ މި ޚަބަރު އެ މީހާގެ ދައްތައަށް ދިނުމާއެކު، އަވަހަށް އާއިލާ އެއްވެ ބައްދަލުވާނެ ކަމަށް އިދާރާތަކުން ބުނެފައިވެއެވެ. ނަމަވެސް، އެ މީހާގެ ޒާތީ މަޢުލޫމާތު ހާމަކޮށްފައެއް ނުވެއެވެ.

ލަސެން ކައުންޓީ ޝެރިފްގެ އޮފީހުގެ ކެޕްޓަން މައިކް ކާނީ އޭބީސީ ނިއުސްއަށް ބުނެފައިވަނީ އެ މީހާގެ ދައްތަ ވަރަށް އުފާވެފައިވާ ކަމަށާއި، އެ މައްސަލަ ބަލައި ދިންކަމާމެދު ވަރަށް ޝުކުރުވެރިވެފައިވާ ކަމަށެވެ. އަދި އާއިލާގެ އެހެން މެންބަރުންނަށް މި ޚަބަރު ދިނުމަށް އަވަސްވެގަތް ކަމަށެވެ.