ޚަބަރު
އިޒްރޭލް ޕާސްޕޯޓް މަނާކުރުމުން އިޤްތިޞާދަށް ކުރާނެ އަސަރު ބޮޑު: މަޓާޓޯ

މަޓާޓޯ ގެ އިސް ވެރިން ފޮޓޯ: މަޓާޓޯ
ހައްދުފަހަނައަޅާފައިވާ ޔަހޫދީ އިސްރާއީލުގެ ވެރިންގެ ޕާސްޕޯޓް މަނާކުރުމާއެކު، އެ ދައުލަތުގެ ޕާސްޕޯޓުގައި ރާއްޖެ އަންނަ އެހެނިހެން މީހުންނަށް ހިފެހެއްޓުންތަކެއް ގެންގުޅެންޖެހޭކަމަށް މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓަރސް (މަޓާޓޯ) އިން ބުނެފިއެވެ.
ޔަހޫދީ ޒަޔަނިސްޓު އިސްރާއީލުގެ ޕާސްޕޯޓުގައި ރާއްޖެއަށް އެތެރެނުވެވޭ ގޮތް ހެދުމަށް އިމިގްރޭޝަން ޤާނޫނަށް ހުށަހަޅާފައިވާ އިސްލާހާ ގުޅިގެން ސަލާމަތީ ޚިދުމަތްތަކާބެހޭ ކޮމިޓީން ދަނީ ކަމާގުޅުންހުރި އެކި އިދާރާތަކާ ބައްދަލުކުރަމުންނެވެ. މި ބައްދަލުވުންތަކުގައި މަޓާޓޯގެ ރައީސް ޢަބްދުﷲ ޤިޔާސް ރިޔާޒް ވިދާޅުވެފައިވަނީ ޔަހޫދީ ދައުލަތުގެ ޕާސްޕޯޓް މަނާކުރުމުން ކުރާނެ އަސަރާ ގުޅޭ ދިރާސާއެއް މިހާތަނަށް ހެދިފައިނުވާ ކަމަށެވެ.
މަޓާޓޯގެ ރައީސް ވިދާޅުވީ ރާއްޖޭގެ ފަތުރުވެރިކަމުގައި ޔަހޫދީ ދައުލަތަކީ ވަރަށް ކުޑަ މާކެޓެއް ކަމަށާއި، އެ ދައުލަތުންވެސް ރާއްޖެ ބޯއިކޮޓް ކުރާއިރު ކުރިއަށް އޮތް 10 އަހަރުގައިވެސް އެ ދައުލަތުގެ ފަތުރުވެރިން ރާއްޖެއަށް އަންނާނެކަމަށް ނުބެލެވޭ ކަމަށެވެ. ނަމަވެސް، ޑުއަލް ސިޓިޒަންޝިޕް އޮންނަ ފަތުރުވެރިންނާއި، ރާއްޖެއަށް އެންމެ ގިނަ ފަތުރުވެރިން އަންނަ އެއް ޤައުމު ކަމަށްވާ ރަޝިއާގައިވެސް ޔަހޫދީ ދައުލަތުގެ ޑުއަލް ޕާސްޕޯޓް ގެންގުޅޭ މީހުން ގިނަކަން ފާހަގަކުރެއްވިއެވެ.
އަދި ޔަހޫދީ ދައުލަތަށް ވާގިވެރިވާ ޤައުމުތަކުން ފިޔަވަޅު އަޅައިފިނަމަ އޭގެ އަސަރު ރާއްޖޭގެ އިގްތިސާދަށް ކުރާނެ ކަމަށް ވިދާޅުވިއެވެ. އެހެންކަމުން، ޔަހޫދީ ދައުލަތުގެ ވެރިންގެ ޕާސްޕޯޓް މަނާކުރުމަށްފަހު އެ ދައުލަތުގެ ޕާސްޕޯޓުގައި ރާއްޖެ ވަންނަ ފަރާތްތަކަށް ހިފެހެއްޓުންތަކެއް ހުންނަންޖެހޭކަމަށް ގަބޫލުކުރައްވާ ކަމަށްވެސް ޤިޔާސް ވިދާޅުވިއެވެ.
މި މައްސަލައާ ގުޅިގެން ސަލާމަތީ ޚިދުމަތްތަކާބެހޭ ކޮމިޓީގެ މުގައްރިރު އަދި އޭދަފުށި ދާއިރާގެ މެންބަރު އަޙްމަދު ސަލީމް ވިދާޅުވެފައިވަނީ މިއީ ޤައުމުގެ އިގްތިސާދާ ގުޅުންހުރި ކަމަކަށްވާތީ ކަމާގުޅުންހުރި ހުރިހާ ބޭފުޅުންނާ ބައްދަލުކުރަމުންދާ ކަމަށެވެ.