ޗެމްޕިއަންސް ލީގުގައި ލެވަންޑޯސްކީ 100 ގޯލު ހަމަކޮށްފި

އަންގާރަ ދުވަހުގެރޭ ފްރާންސްގެ ބްރެސްޓް ކޮޅަށް މެޗުގެ 10 ވަނަ މިނެޓުގައި ކާމިޔާބުކުރި ޕެނަލްޓީއާއެކު، ސްޕެއިންގެ ބާސެލޯނާއަށް ކުޅެމުން އަންނަ ރޮބަޓް ލެވަންޑޯސްކީ ޗެމްޕިއަންސް ލީގުގައި 100 ގޯލު ހަމަކޮށްފިއެވެ. ލެވަންޑޯސްކީގެ އިތުރުން މި ޝަރަފު ދެން އޮތީ ކްރިސްޓިއާނޯ ރޮނާލްޑޯ އާއި ލިއޮނެލް މެސީގެ އަތުގައެވެ.

އުމުރުން 36 އަހަރުގެ ލެވަންޑޯސްކީ ޗެމްޕިއަންސް ލީގުގައި 100 ގޯލު މި ހަމަކުރީ ޖުމްލަ 125 މެޗުން، ތަފާތު 37 ޓީމެއްގެ ކޮޅަށް ގޯލުތައް ކާމިޔާބުކޮށްގެންނެވެ. އަދި މި އަދަދު ހަމަކުރުމަށް އޭނާއަށް ހޭދަވެފައި މިވަނީ މުބާރާތުގެ 10،541 މިނެޓެވެ. އެއީ ކޮންމެ 105 މިނެޓް 25 ސިކުންތަކުން ގޯލެކެވެ.

މީގެ އިތުރުން، ލެވަންޑޯސްކީ އަކީ މުބާރާތުގައި ތަފާތު 3 ޓީމަކާއެކު ހެޓްރިކް ހަދާފައިވާ ފުރަތަމަ ކުޅުންތެރިޔާއެވެ. އޭނާ 2022 ވަނަ އަހަރު ބާސެލޯނާއަށް ބަދަލުވުމަށްފަހު އެ ކުލަބުގެ ޖާޒީގައި ފުރަތަމަ ކުޅުނު ޗެމްޕިއަންސް ލީގުގެ މެޗުގައި ހެދި ހެޓްރިކާއެކު، މި ޝަރަފު ލިބިގެން ދިޔައެވެ. މި މުބާރާތުގައި ދެން އޭނާ ހެޓްރިކް ހަދާފައިވަނީ، ބޮރޫޝިއާ ޑޯޓްމަންޑް އަދި ބެޔާން މިއުނިކާއެކުއެވެ. 

މެސީ އާއި ރޮނާލްޑޯގެ ފަހުން، ޗެމްޕިއަންސް ލީގުގައި 100 ގޯލު ކާމިޔާބު ކުރުމުގެ ޝަރަފު ލިބުނު ނަމަވެސް، ލެވަންޑޯސްކީ ވަނީ އެ ކުޅުންތެރިނަށް ވުރެން ކުރިން މުބާރާތުގައި 80 ގޯލު ހަމަކޮށްފައެވެ. އޭނާ މުބާރާތުގައި ކުޅުނު 100 ވަނަ މެޗުގައި ބެންފީކާއާ ދެކޮޅަށް ބެޔާންގެ ޖާޒީގައި ހެދި ހެޓްރިކާއެކު، އެ އަދަދަށް ގޯލު ހަމަކުރިއެވެ. މެސީއަށް މި އަދަދު 102 މެޗުން ހަމަކުރެވުނު އިރު، ރޮނާލްޑޯއަށް މި އަދަދު ހަމަކުރެވުނީ 116 މެޗުންނެވެ.

ޗެމްޕިއަންސް ލީގުގައި ތިންވަނައަށް ލެވަންޑޯސްކީ އެންމެ ގިނަ ގޯލު ކާމިޔާބުކޮށްފައިވަނީ ސްޕެއިންގެ ވަރުގަދަ ރެއާލް މެޑްރިޑްއާ ދެކޮޅަށެވެ. އޭގެ ތެރެއިން 4 ގޯލަކީ 2012/13 ސީޒަނުގައި މުބާރާތުގެ ސެމީފައިނަލްގެ ހޯމް މެޗުގައި ކާމިޔާބުކުރި ގޯލު ތަކެކެވެ. އެއީ މުބާރާތުގެ ސެމީފައިނަލް މެޗެއްގައި އެއް ކުޅުންތެރިއަކު އެންމެ ގިނަ ގޯލުޖަހާފައިވާ އަދަދު ވެސް މެއެވެ.