ޙައްޖުވެރިންގެ ތިންވަނަ ފްލައިޓް މަދީނާއިން ފުރައިފި: މިރޭ ރާއްޖެ އަންނާނެ

މިއަހަރުގެ ބަރަކާތްތެރި ޙައްޖުގެ އަޅުކަން ފުރިހަމަކުރުމަށްފަހު، ރާއްޖެއިން ދިޔަ ޙައްޖުވެރިންގެ ތިންވަނަ ގްރޫޕް އެނބުރި ރާއްޖެ އައުމަށް މިއަދު ފުރައިފިއެވެ.

މަދީނާގެ ޕްރިންސް މުޙައްމަދު ބިން ޢަބްދުލްޢަޒީޒް އިންޓަރނޭޝަނަލް އެއާޕޯޓުން ފުރި މި ފްލައިޓަކީ ސައުދިއާ އެއާލައިންގެ ދަތުރެކެވެ. މި ފްލައިޓުގައި 260 އަށްވުރެ ގިނަ ޙައްޖުވެރިން ރާއްޖެއަށް ދަތުރުކުރަމުންދެއެވެ. ޙައްޖުވެރިން ގޮވައިގެން މި ފްލައިޓް މަދީނާއިން ނައްޓާލާފައިވަނީ ސައުދީ ގަޑިން މިއަދު ހެނދުނު 09:00 ގައެވެ.

މި ދަތުރުގައި ސްރީލަންކާގެ ކޮލަމްބޯއަށް ޓްރާންސިޓް ކުރުމަށްފަހު، ޙައްޖުވެރިންނަށް ރާއްޖެއަށް އާދެވޭނެ ކަމަށް އަންދާޒާކުރެވެނީ މިރޭ ރާއްޖެ ގަޑިން 20:00 ހާއިރުއެވެ.

މިއަހަރު ރާއްޖެއިން ޙައްޖަށް ދިޔަ ޙާޖީންގެ އެންމެ ފަހު ގްރޫޕް ރާއްޖެ އައުމަށް ހަމަޖެހިފައިވަނީ މާދަމާއެވެ. ޤައުމީ އެއާލައިން "މޯލްޑިވިއަން" ގެ ފްލައިޓެއްގައި ކުރާ މި ދަތުރު ފެށުމަށް ތާވަލުކޮށްފައިވަނީ ސައުދީ ގަޑިން މާދަމާ ހަވީރު 04:00 ގައެވެ. މި ފްލައިޓް ރާއްޖެއަށް ޖައްސާނެ ކަމަށް ލަފާކުރެވެނީ މާދަމާ ރޭ މެންދަމު 12:00 ހާއިރުއެވެ. މާދަމާގެ ފްލައިޓާއެކު، މިއަހަރު ރާއްޖެއިން ޙައްޖަށް ދިޔަ ހުރިހާ ޙައްޖުވެރިން އެނބުރި ޤައުމަށް އައިސް ނިމޭނެއެވެ.

މިއަހަރުގެ ޙައްޖުގެ ދަތުރުގައި ކޮންމެ ގްރޫޕެއްވެސް ސައުދީ އަރަބިއްޔާގައި ޖުމްލަ ތިން ހަފުތާ ހޭދަކޮށްފައިވެއެވެ. މައްކާގައި ޙައްޖުގެ މަނާސިކުތައް ފުރިހަމަކުރުމަށްފަހު، ހުރިހާ ޙާޖީންވެސް ވަނީ މަދީނާގައި ދެ ދުވަސް މަޑުކޮށް، މަސްޖިދުއް ނަބަވީއަށް ޒިޔާރަތްކޮށްފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ ޙައްޖުވެރިންގެ ކަންކަން ވީހާވެސް އޮމާންކޮށް ކުރިއަށް ގެންދިއުމަށް ގިނަ މަސައްކަތްތަކެއް ކޮށްފައެވެ. މިގޮތުން ޙައްޖުވެރިން އެނބުރި އަންނަ ވަގުތު ވެލާނާ އިންޓަރނޭޝަނަލް އެއާޕޯޓުން އެ ފަރާތްތަކަށް މަރުޙަބާ ކިޔުމާއި، ލަގެޖު އުފުލުމުގެ އިންތިޒާމުތައްވެސް ވަނީ ހަމަޖައްސާފައެވެ.

ތިންވަނަ ފްލައިޓް: ޙައްޖާޖީން ރާއްޖެދިޔުމަށް މަދީނާ އެއަރޕޯޓުގައި. pic.twitter.com/37XK5EYX0v

— Maldives hajj mission بعثة ا لحج ا المالديفية (@hajjmission_mv) June 8, 2026