އަންނަ އަހަރަށް ސަރުކާރުން ހުށައެޅި ބަޖެޓް ރައްޔިތުންގެ މަޖިލީހުން ފާސްކޮށްފި

އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށައެޅި 56.6 ބިލިއަން ރުފިޔާގެ ބަޖެޓް އެމަޖިލީހުން ފާސްކޮށްފިއެވެ.

ސަަރުކާރުން، އަންނަ 2025 ވަަނަ އަހަރަށް ލަފާކޮށް ހުށައަޅައިފައިވާ ބަޖެޓް މަޖިލީހުން ފާސްކޮށްފައިވަނީ 70 މެމްބަރުންގެ ވޯޓާއި އެކުއެވެ. ބަޖެޓް ފާސްކުރުމާއި ދެކޮޅަށް ވޯޓު ދެއްވައިވައިފައިވަނީ އިދިކޮޅު އެމްޑީޕީގެ 11 މެމްބަރުން ކަން ފާހަގަކޮށްލަން ޖެހެއެވެ.

މިއަންނަ އަހަރަށް ލަަފާކޮށް މަޖިލީހަށް ހުށައެޅި ބަޖެޓް ސަރުކާރުން މަޖިލީހަށް ހުށައަޅައިފައިވަނީ މިފާއިތުވި އޮކްޓޯބަރު މަހުގެ 31 ވަނަ ދުވަހުއެވެ.

ބޯހިޔާވަހިކަމަށް ބޮޑު އިސްކަމެއް ދީ އެކުލަވައިލައިފައިވާ ބަޖެޓްގައި ބޯހިޔާވަހިކަމުގެ އައު މަޝްރޫޢުތަކަށް ޚާއްސަކޮށް 1.8 ބިލިއަން ރުފިޔާ ހިމަނައިފައިވާއިރު، ޖުމްލަ 3 ބިލިއަނަށްވުރެ ގިނަ ރުފިޔާ ގެދޮރުވެރިކަަމަށް ޚާއްސަކޮށްފައިވާ ކަން ފާހަގަކޮށްލަން ޖެހެއެވެ.

މިއަންނަ އަހަރުގެ ޚަރަދުތަކަށް ހިނގާނެ ކަމަށް ލަފާކޮށް ބަޖެޓުގައި 49.2 ބިލިއަން ރުފިޔާ ވަނީ ހިމަނައިފައެވެ. އޭގެތެރޭގައި ރިކަރަންޓް ޚަރަދުގެ ގޮތުގައި ހިމަނައިފައިވާ 35.9 ބިލިޔަން ރުފިޔާ އަދި ކެޕިޓަލް ޚަރަދުގެ ގޮތުގައި ހިމަނައިފައިވާ 13.3 ބިލިޔަން ރުފިޔާ ހިމެނެއެވެ. 

އަންނަ އަހަރުގެ ބަޖެޓުގައި ޕަބްލިކް ސެކްޓަރ އިންވެސްޓްމަންޓް ޕްރޮގްރާމް، ޕީއެސްއައިޕީއަށް ހިނގާނެ ކަމަށް ލަފާކޮށްފައިވަނީ 12.4 ބިލިޔަން ރުފިޔާއެވެ. އަދި ޖުމްލަ އާމްދަނީއާއި ހިލޭ އެހީގެ ގޮތުގައި ދައުލަތަށް ލިބޭނެކަމަށް ލަފާކޮށްފައިވަނީ 39.7 ބިލިޔަން ރުފިޔާއެވެ.

ދަރަނި އަނބުރާ ދައްކަން އަންނަ އަހަރުގެ ބަޖެޓުގައި 3.9 ބިލިއަން ރުފިޔާ ހިމަނައިފައިވެއެވެ.

ބަޖެޓްގެ ބަހުސް މަރުޙަލާގައި ސަރުކާރަށް ނިސްބަތްވާ މެމްބަރުން ވަނީ ބަޖެޓަށް ވަރަށް ބޮޑަށް ތާއީދު ކުރައްވައި ވާހަކަފުޅު ދައްކަވައިފަައެވެ. އެެންމެ ބޮޑަށް އެބޭފުޅުން ފާހަގަ ކުރައްވައިފައިވަނީ ބަޖެޓުގައި ބޯހިޔާވަހިކަމަށް އިސްކަން ދީފައިވާ މިންވަރެެވެ.

އިދިކޮޅު މެމްބަރުންގެ ފާޑުކިޔުންތައްވެސް ވަރަށް ބޮޑަށް ލިބިގެން ދިޔަ ބަޖެޓާއި މެދު ސަރުކާރުން ބުނެފައިވަނީ މި ބެޖެޓަކީ ޒިންމާދާރު ބަޖެޓެއް ކަމަށެވެ. އެގޮތުން އަންނަ އަހަރަށް ލަފާކުރަނީ 9.4 ބިލިޔަން ރުފިޔާގެ ޑެފިސިޓެއް ކަމަށާއި، މިއީ ފަހުގެ ތާރީޚުގައި ނިސްބަތުން ޑެފިސިޓް އެންމެ ކުޑަ ބަޖެޓުކަން ސަރުކާރުުން ވަނީ ފާހަގަކޮށްފައެވެ.