ސްޕޭސްއެކްސް އިން ސްޓާލިންކްގެ އިތުރު 24 ސެޓެލައިޓް ޖައްވަށް ފޮނުވާލައިފި

ސްޕޭސް އެކްސްޕްލޮރޭޝަން ޓެކްނޮލޮޖީސް ކޯޕަރޭޝަން ނުވަތަ ސްޕޭސްއެކްސްއިން ސްޓާލިންކުގެ އިތުރު 24 ސެޓެލައިޓް، ފްލޮރިޑާގެ ސްޕޭސް ކޯސްޓް އިން ޖައްވަށް ފޮނުވާލައިފިއެވެ. 

މި ސެޓެލައިޓުތައް ޖައްވަށް ފޮނުވާލާފައިވަނީ ފެލްކަން-9 ރޮކެޓް ބޭނުންކޮށްގެން، ބުދަ ދުވަހު، ޖީއެމްޓީ ގަޑިން ފަތިހު 4:41 ގައެވެ. މި ރޮކެޓު ލޯންޗުކޮށްފައިވަނީ ނާސާގެ ކެނެޑީ ސްޕޭސް ސެންޓަރުންނެވެ. 

ފެލްކަން-9 ރޮކެޓަކީ ދުނިޔޭގެ އޯބިޓަށް ސެޓެލައިޓާއި ޑްރެގަން ކާގޯ ސްޕޭސް ކްރާފްޓާއި އަދި ކްރޫ ޑްރެގަން ސްޕޭސްކްރާފްޓް ފޮނުވުމަށް ބޭނުންކުރާ ރޮކެޓެކެވެ. 

ޖައްވަށް ފޮނުވާލި ފެލްކަން-9 ގެ ފުރަތަމަ ބައި އަނބުރާ ދުނިޔެއަށް އައިސްފައިވަނީ، ރާވާފައިވާގޮތަށް ލޯންޗުކުރިތާ ގާތްގަނޑަކަށް 8 މިނެޓު ފަހުން، އެޓްލާންޓިކް ކަނޑުގައި އޮތް ސްޕޭސްއެކްސްގެ ޑްރޯންޝިޕް، 'އަ ޝޯޓް ފޯލް އޮފް ގްރެވިޓާސް' ގައި ޖެއްސުމަށްފަހުއެވެ. 

ސްޕޭސްއެކްސް އިން މި އަހަރުގެ މިހާތަނަށް 115 ފަހަރަށް ފެލްކަން-9 ލޯންޗުކޮށްފައިވާކަމަށް، އެ ކުންފުނިން މައުލޫމާތު ދެއެވެ. އަދި މީގެ ތެރެއިން މި ރޮކެޓު 81 ފަހަރު ޖައްވަށް ގޮސްފައިވަނީ ސްޓާލިންކުގެ ބޭނުންތަކުގައެވެ.

ސެޓެލައިޓް ޓްރެކްކުރާ އެސްޓްރޯފިޒިސިސްޓު، ޖޮނަތަން މެކްޑޮވެލް ހާމަކޮށްފައިވާ ގޮތުގައި ސްޓާލިންކުގެ 6،700 އެއްހާ ސެޓެލައިޓް މިހާރު ޖައްވުގައި ހަރަކާތްތެރިވެއެވެ.