ބޮޑުތަކުރުފާނު މަގުގެ މަސައްކަތް ކުރިއަށްދާ ސަރަޙައްދުގެ ޖެޓީ، އާންމުން ލަފާފުރުމަށް ވަގުތީގޮތުން ހުޅުވާލައިފި

މާލޭގެ ބޮޑުތަކުރުފާނު މަގު ތަރައްޤީކުރުމުގެ ބޮޑު މަޝްރޫޢުގެ ދަށުން ބަންދުކޮށްފައިވާ ސަރަޙައްދުތަކުގެ ތެރެއިން، މާލޭގެ އިރުމަތީ ފަރާތުގައި ހިމެނޭ ޕޯސްޓް އޮފީހާއި ކުރީގެ ނަސަންދުރަ ހޮޓެލްއާ ދެމެދުގައި އޮންނަ ޖެޓީ ސަރަޙައްދު، އާންމުން ލަފާފުރުމަށްޓަކައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ވަގުތީގޮތުން ހުޅުވާލައިފިއެވެ.

އެމްޓީސީސީން ހާމަކޮށްފައިވާ ގޮތުގައި، މި ސަރަޙައްދުގެ ޖެޓީ ވަގުތީގޮތުން ހުޅުވާލަން ނިންމީ އެ ސަރަޙައްދުގެ އެއްގަމު ތޮށި ލުމުގެ މަސައްކަތުގެ ބޮޑު ބައެއް މިހާރު ނިމިފައިވުމާ ގުޅިގެން، އާންމުންނަށް ލުއިފަސޭހަކޮށްދިނުމުގެ މަގުސަދުގައެވެ. ނަމަވެސް، ކަނޑު އުޅަނދުފަހަރަށް އެ ސަރަޙައްދު ހުޅުވާލި ކަމުގައިވިޔަސް، މަގު ހެދުމުގެ އަމަލީ މަސައްކަތްތައް އަދިވެސް މެދުނުކެނޑި ކުރިއަށްދާތީ، އެ ހިސާބުގެ ބޮޑުތަކުރުފާނު މަގު އާންމު ޓްރެފިކަށާއި އެއްގަމު އުޅަނދުފަހަރަށް އަދިވެސް އޮތީ ބަންދުކުރެވިފައެވެ.

މާލޭގެ ވަށާ މަގު ފުޅާކޮށް ޒަމާނީ ފެންވަރަށް ތަރައްޤީކުރުމަށް ސަރުކާރުން ހިންގާ މި ބޮޑު މަޝްރޫޢުގެ ދަށުން، ހެންވޭރު ފެރީ ޓާމިނަލުން ފެށިގެން ރައީސް އޮފީހާ ހަމައަށް އޮންނަ ސަރަޙައްދު މިހާރު އޮތީ ބަންދުކޮށްފައެވެ. މި މަޝްރޫޢުގެ ދަށުން މަގު ފުޅާކުރުމަށްޓަކައި އެއްގަމުތޮށި ކުރިން އޮތް ވަރަށްވުރެ ބޭރަށް ޖެއްސުމުގެ ބޮޑެތި މަސައްކަތްތަކެއް އެމްޓީސީސީން ދަނީ ކުރަމުންނެވެ. މި މަސައްކަތްތަކާ ގުޅިގެން މީގެ ކުރިން ބޭނުންކުރަމުން އައި ހެންވޭރު ޖެޓީ ސަރަޙައްދުތަކުން ލަފާފުރުން އޮތީ މަނާކޮށްފައެވެ.

އަލަށް ހުޅުވާލި ވަގުތީ ޖެޓީ ބޭނުންކުރާ ފަރާތްތަކުން ސަލާމަތީ ގޮތުން ރައްކާތެރިކަން ކަށަވަރުކުރުމަށާއި، މަސައްކަތްކުރާ ސައިޓުގައި ތިބޭ މުވައްޒަފުން ދޭ އިރުޝާދުތަކާ އެއްގޮތަށް އަމަލުކުރުމަށް އެމްޓީސީސީން ވަނީ އިލްތިމާސްކޮށްފައެވެ.

ސަރުކާރުން ހަވާލުކޮށްގެން އެމްޓީސީސީން ކުރިއަށްގެންދާ މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މާލޭގެ ތޮއްޖެހުން ކުޑަކުރުމަށް ކުރިއަށްގެންދާ މުހިންމު މަސައްކަތެކެވެ. މި މަޝްރޫޢުގެ ފުރަތަމަ ފިޔަވަހީގެ މަސައްކަތްތައް ހިނގަމުންދާ މި މަހުގެ ނިޔަލަށް އެއްކޮށް ނިންމާލުމަކީ އެ ކުންފުނީގެ އެންމެ ބޮޑު އަމާޒެވެ.

ކަސްޓަމަރުންގެ ސަމާލުކަމަށް! pic.twitter.com/0A3xpAS6cX

— MTCC Plc (@MTCCPlc) June 10, 2026