ފާއިތުވި 24 ގަޑިއިރުތެރޭ އިޒްރާއިލުން ފަލަސްޠީނުގެ 33 މީހަކު ޝަހީދުކޮށްލައިފައިވޭ

ފާއިތުވި 24 ގަޑިއިރުތެރޭ އިޒްރާއިލުން ފަލަސްޠީނުގެ 33 މީހަކު ޝަހީދުކޮށްލައިފައިވާ ކަމަށް ފަލަސްޠީނުގެ ޞިއްޙީ ވުޒާރާއިން ބުނެފިއެވެ.

ފަލަސްޠީނުގެ ޞިއްޙި ވުޒާރާ އާއި ހަވާލާދީ އަލްޖަޒީރާގައި ބުނެފައިވަނީ އިޒްރާއިލުން ފަލަސްޠީނުގެ ރައްޔިތުންނަށް އަމާޒުކޮށް ދޭން ފެށި ހަމަލާތައް ދޭން ފެށިފަހުން ޝަހީދުވި މީހުންގެ ޢަދަދު 44،282 އަކަށް އަރައިފައިވާއިރު އޭގެ ތެރޭގައި ފާއިތުވި 24 ގަޑިއިރު ތެރޭ ޝަހީދުކޮށްލި 33 މީހުންވެސް ހިމެނޭ ކަމަށެވެ.

ހަމަލާތަކުގެ ސަބަބުން ޝަހީދުވަމުންދާ މީހުންގެ ޢަދަދު ދުވަހެއް ދުވަހަކަށް މަތިވަމުންދާއިރު އިޒްރާއިލް ސިފައިން ފަލަސްޠީނުގެ ރައްޔިތުން ހައްޔަރުކުރުން ވެސް ހުއްޓައެއް ނުލައެވެ.

އެގޮތުން ހުޅަނގު އައްސޭރީގައި އެންމެ ފަހުން އިޒްރާއިލް ސިފައިން ހިންގި ޢަސްކަރީ ރެއިޑް ތަކުގައި އިޒްރާއިލް ސިފައިން 15 މީހަކު ހައްޔަރުކޮށްފައިވެއެވެ.

އިޒްރާއީލާއި ހިޒްބުއްﷲ ހަނގުރާމަ ހުއްޓާލުމުގެ އެއްބަސްވުމާ ގުޅިގެން ބައިނަލްއަޤްވާމީ ސަމާލުކަން ބޮޑުތަނުން ލުބުނާނުގެ މަސްރަޙަށް އަމާޒުވެފައިވާއިރު، އިޒްރާއީލުގެ ސިފައިން ދަނީ ހިފާފައިވާ ހުޅަނގު އައްސޭރީގައި އަނެއްކާވެސް އަނިޔާވެރި ރެއިޑްތަކެއް ހިންގާފައެވެ.

 ރެއިން ފެށިގެން ހިފާފައިވާ ސަރަހައްދުން  ކުޑަކުއްޖަކާއި ކުރީގެ ބައެއް ގައިދީން ހިމެނޭ ގޮތަށް ފަލަސްޠީނުގެ 15 މީހަކު ހައްޔަރުކޮށްފައިވާ ކަމަށް ފަލަސްތީނުގެ ޕްރިޒަނަރސް ސޮސައިޓީން ބުނެފައިވެއެވެ.

އެމީހުން ހައްޔަރު ކުރުމަށް ހިންގި މިލިޓަރީ ރެއިޑްތަކުގައި ފަލަސްތީނުގެ ގިނަ ގެތަކަށް ގެއްލުން ދީފައިވާ ކަމަށާއި އެއީ ބައިތްލަހްމް، ހިބްރޫން، ނާބުލުސް، ޤަލްކިލިޔާ، ރާމަﷲ އަދި ތުއްބަސްގެ އެކި ހިސާބުތަކުގައި ހުރި ގެތަށްކަމަށް އަލްޖަޒީރަގައި ބުނެފައިވެއެވެ.

 އޮކްޓޯބަރު މަހުގެ ހަތް ވަނަ ދުވަހުން ފެށިގެން އިޒްރާއީލުގެ ސިފައިން ގާތްގަނޑަކަށް ކޮންމެ ދުވަހަކު ހުޅަނގު އައްސޭރީގައި ރެއިޑްތައް ހިންގާފައިވާއިރު، 11،800 އަށް ވުރެ ގިނަ މީހުން ހައްޔަރުކޮށްފައިވާ ކަމަށް ޕްރިޒަނަރސް ސޮސައިޓީން ބުނެ އެވެ. ހައްޔަރު ކުރި ގިނަ މީހުންނަކީ ދައުވާއެއް ނެތި ބަންދުކޮށްފައި ތިބި މީހުންނެވެ.