ނިޔާވި އަޙްމަދު އާސިފަށް، ސަބް އިންސްޕެކްޓަރ އޮފް ޕޮލިސްގެ ރޭންކް އަރުވައިފި

ދިވެހި ފުލުހުންގެ ޚިދުމަތުގައި އިޚުލާސްތެރިކަމާއެކު ދިގު މުއްދަތަކަށް ޚިދުމަތްކުރެއްވި ސީނިއާ ސާޖަންޓް އަޙްމަދު އާސިފް، ރަސްމީ ވާޖިބު އަދާކުރައްވަމުން ގެންދަވަނިކޮށް ކުއްލި ގޮތަކަށް ނިޔާވުމާ ގުޅިގެން، އޭނާގެ ޚިދުމަތުގެ އަގުވަޒަންކުރުމުގެ ގޮތުން "ސަބް އިންސްޕެކްޓަރ އޮފް ޕޮލިސް" ގެ ރޭންކް މިއަދު އަރުވައިފިއެވެ.

ފުލުހުންގެ މުއައްސަސާއިން މައުލޫމާތު ދެއްވި ގޮތުގައި، އަޙްމަދު އާސިފް ނިޔާވީ ރޭ ދަންވަރުގެ ވަގުތެއްގައި ފުލުހުން ކުރިއަށްގެންދިޔަ ހާއްސަ އޮޕަރޭޝަނެއްގައި ހަރަކާތްތެރިވި "ޕޮލިސް ލޯންޗް 57" ގައި މަސައްކަތް ކުރައްވަމުން ގެންދަވަނިކޮށެވެ. އޮޕަރޭޝަންގެ ތެރެއިން އޭނާ ގެއްލިގެން ހޯދަމުން ދަނިކޮށް ފެނިފައިވަނީ މޫދު އަޑިންނެވެ. އާސިފް ވަނީ މީގެ ކުރިން ފުލުހުންގެ ޚިދުމަތުގައި ނަމޫނާ މަސައްކަތްތަކެއް ދައްކަވައި، މަސައްކަތަށް ނުހަނު ބޮޑު ފަރުވާތެރިކަމެއް ބަހައްޓަވާފައެވެ.

ފުލުހުންގެ ޚިދުމަތުން ވިދާޅުވި ގޮތުގައި، އަޙްމަދު އާސިފަށް މަރުގަބޫލުގައި މި ދިން މަގާމުގެ ކުރިއެރުމަކީ، މުޖުތަމައުގެ އަމަންއަމާންކަން ދެމެހެއްޓުމަށާއި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގައި އޭނާ އަދާކުރެއްވި އިޚުލާސްތެރި ދައުރާއި، ކުރެއްވި މަތިވެރި ޚިދުމަތުގެ އަގުވަޒަންކުރުމުގެ ގޮތުން ދެވުނު މަތިވެރި ޝަރަފެކެވެ. އޭނާ ދެއްކެވި ނަމޫނާއާއި ކޮށްދެއްވި އަގުހުރި ޚިދުމަތްތަކުގެ ހަނދާންތައް އަބަދުވެސް އާކުރެވޭނީ ނުހަނު އިހުތިރާމާއެކު ކަމަށްވެސް އެ މުއައްސަސާއިން ފާހަގަކުރެއްވިއެވެ.

އަޙްމަދު އާސިފްގެ ވަކިވެދިއުމަކީ ފުލުހުންގެ މުއައްސަސާއަށާއި، އޭނާ ވަފާތެރިކަމާއެކު ޚިދުމަތްކުރެއްވި މި ގައުމަށް ލިބުނު ފުން ހިތާމައެއްގެ ގޮތުގައި ފުލުހުން ވަނީ ސިފަކުރައްވާފައެވެ.

މި ހިތާމަވެރި ދަނޑިވަޅުގައި، ދިވެހި ފުލުހުންގެ ޚިދުމަތުގެ ފަރާތުން ވަނީ ނިޔާވި ސަބް އިންސްޕެކްޓަރ އޮފް ޕޮލިސް އަޙްމަދު އާސިފްގެ އާއިލާއަށާއި، ލޯބިވާ ފަރާތްތަކަށް، އަދި ރަހުމަތްތެރިންނާއި އެކުގައި މަސައްކަތްކުރެއްވި އެންމެހާ މުވައްޒަފުންނަށް އިޚުލާސްތެރި ތައުޒިޔާ ފޮނުއްވާފައެވެ.