ކުރީގެ އިމިގްރޭޝަން ކޮންޓްރޯލަރ ޝަމްޢާންގެ މައްސަލައިގެ ތަފްސީލު ފުލުހުން ހާމަކޮށްފި

މޯލްޑިވްސް އިމިގްރޭޝަންގެ ކުރީގެ ކޮންޓްރޯލަރ ޖެނެރަލް މުޙައްމަދު ޝަމްޢާން ވަޙީދު، މަގާމުގެ ނުފޫޒު ބޭނުންކޮށްގެން ބިދޭސީންގެ އަތުން ރިޝްވަތުގެ ގޮތުގައި ބޮޑެތި އަދަދުތަކުން ފައިސާ ނަގައި، އެ ފައިސާ ލޯންޑަރ ކުރި ކަމަށް ބުނާ މައްސަލައިގެ ތަފްސީލީ ރިޕޯޓެއް ދިވެހި ފުލުހުންގެ ޚިދުމަތުން މިއަދު އާންމުކޮށްފިއެވެ.

ފުލުހުން ނެރުނު ބަޔާނުގައި  ވާގޮތުން، މި މައްސަލައިގެ ތަހުގީގު ހިންގާފައިވަނީ ރާއްޖޭގެ ގާނޫނުތަކާއި އިޖުރާއަތްތަކާ އެއްގޮތްވާ ގޮތުގެ މަތިންނެވެ. މި ތަހުގީގުން ހާމަވެފައިވާ މުހިންމު ބައެއް ކަންކަމުގެ ތެރޭގައި:

ރޭވުންތެރި އޮޕަރޭޝަނާއި ނުފޫޒު ފޯރުވުން:

2025 މާރިޗު 11 ވަނަ ދުވަހު އިމިގްރޭޝަނުން ހިންގި އޮޕަރޭޝަނެއްގެ ހަފުތާއެއް ކުރިން، ޝަމްޢާންގެ އޮފީހުގައި އެކަމާ ގުޅޭ މަޝްވަރާތައް ބާއްވާފައިވާކަން ފުލުހުންނަށް ވަނީ އެނގިފައެވެ. އެ ރޭ ހައްޔަރުކުރި ބިދޭސީންގެ މައުލޫމާތު ޝަމްޢާނަށް ލިބުމާއެކު، އޭގެ ތެރެއިން އެކަކު ދޫކޮށްލުމަށް "ސްޕޮންސަރުގެ" ނަމުގައި އީމެއިލަކުން ފޮނުވި ސިޓީއަކީ އަވަސް މައްސަލައެއްގެ ގޮތުގައި ބަލައި، އެ މީހާ ދޫކޮށްލުމަށް ޝަމްޢާން އިރުޝާދު ދެއްވި ކަމަށް ތަހުގީގަށް ވަނީ ކަށަވަރުވެފައެވެ.

500,000 ރުފިޔާގެ ރިޝްވަތާއި ފައިސާ ފޮޮށި:

ތަހުގީގަށް ހޯދިފައިވާ ގޮތުގައި، ދޫކޮށްލި ބިދޭސީ މީހާ ގޮވައިގެން އިމިގްރޭޝަންގެ ދެ މުވައްޒަފަކު މާލެ ތެރޭގައި ދަތުރުކޮށް، ފައިސާގެ މުއާމަލާތްތަކެއް ހިންގިއެވެ. މި ފައިސާގެ އަދަދު ކަށަވަރު ކުރުމަށް ޝަމްޢާނަށް ގުޅާފައިވާ އިރު، އެއްބަސްވެފައިވަނީ 500,000 (ފަސްލައްކަ) ދިވެހި ރުފިޔާ އަށެވެ. ހަމަ އެ ރޭ ދަންވަރު 3:00 އެހައިކަންހާއިރު، އިމިގްރޭޝަންގެ ދެ މުވައްޒަފުން ފައިސާ ހުރި ކޮތަޅެއް ހިފައިގެން ޝަމްޢާން ދިރިއުޅޭ އެޕާޓްމަންޓަށް ވަދެ، ތިން މިނެޓު ފަހުން އެ ކޮތަޅާ ނުލައި ނުކުތް މަންޒަރު ފުލުހުންނަށް ވަނީ ހޯދިފައެވެ.

ބޭންކް އެކައުންޓަށް ޖަމާކުރި ފައިސާ:

މި ހާދިސާ ހިނގިތާ ދެ ދުވަސް ފަހުން، 2025 މާރިޗު 13 ވަނަ ދުވަހު، ޝަމްޢާންގެ ނަމުގައި ބޭންކް އޮފް މޯލްޑިވްސްގައި ހުޅުވާފައިވާ ދެ އެކައުންޓަކަށް ޖުމްލަ 259,837.35 ރުފިޔާ ޖަމާކޮށްފައިވާކަން ބޭންކް ރެކޯޑްތަކުން ވަނީ ފެނިފައެވެ.

ތަހުގީގަށް ހުރަސްއެޅުމާއި ސިޔާސީ ތުހުމަތުތައް:

ޝަމްޢާންގެ ފަރާތުން މީޑިއާގައި މި ތަހުގީގަކީ ސިޔާސީ ނުފޫޒުން ހިންގާފައިވާ ކަމެއް ކަމަށް ބުނި ނަމަވެސް، ފުލުހުން ވަނީ އެކަން ހަރުކަށިކޮށް ދޮގުކޮށްފައެވެ. ފުލުހުން ފާހަގަކުރި ގޮތުގައި ޝަމްޢާންގެ ފޯނުގައި ހުރި މައުލޫމާތުތައް ބެލުމަށް ފޯނުގެ ލޮކް ކޯޑު ދިނުމަށް އޭނާ ވަނީ މުޅި ތަހުގީގު މަރުހަލާގައި އިންކާރުކޮށްފައެވެ. އަދި އޭނާގެ ފޯނުގައި ކޮރަޕްޝަންގެ ހެކި ހުރި ކަމަށް ބުނެ މިހާރު ވާހަކަ ދެއްކެވި ނަމަވެސް، ބަންދުން ދޫކޮށްލި ފަހުން މިނިވަނެއްގެ ގޮތުގައި ހުރި އިރުވެސް އެފަދަ އެއްވެސް މައުލޫމާތެއް ރަސްމީ އެއްވެސް މުއައްސަސާއަކަށް އޭނާ ހުށަހަޅާފައި ނުވާކަމަށް ފުލުހުން ބުނެއެވެ.

މި މައްސަލައިގެ ތަހުގީގު ނިންމައި، ޕްރޮސިކިއުޓަރ ޖެނެރަލްގެ އޮފީހުން ދައުވާ އުފުލުމާ ގުޅިގެން ކުރިއަށްދިޔަ ޝަރުއީ މަރުހަލާތަކަށް ފަހު، ކްރިމިނަލް ކޯޓުން މިހާރު ވަނީ މި މައްސަލައިގައި ހުކުމް އިއްވާފައެވެ. ފުލުހުން ބަޔާން ނިންމާލަމުން ވިދާޅުވީ، ކޯޓުގެ ނިންމުމަކާމެދު ހިތްހަމަނުޖެހޭނަމަ އޮތް ގާނޫނީ މަގަކީ ޝަރުއީ ނިޒާމުގެ ތެރެއިން އިސްތިއުނާފު ކުރުން ކަމަށެވެ.