ކޮރަޕްޝަނާ ދެކޮޅަށް މަސައްކަތް ކުރުމަށް އަބަދުވެސް ރާއްޖެއިން ދެމިއޮންނާނެ: ވަޒީރު އިޙްސާން

ކޮރަޕްޝަނާ ދެކޮޅަށް މަސައްކަތް ކުރުމަށް އަބަދުވެސް ރާއްޖެއިން ދެމިއޮންނާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު އިޙްސާން މިހެން ވިދާޅުވީ އޯއައިސީގެ މެމްބަރު ޤައުމުތަކުން ބޭއްވި އެންޓި ކޮރަޕްޝަން ލޯ އެންފޯސްމެންޓް އެޖެންސީގެ ދެވަނަ މިނިސްޓްރިއަލް ބައްދަލުވުމުގައި ވާހަކަފުޅު ދައްކަވަމުންނެވެ.

މި ޒަމާނުގެ އެންމެ މުހިންމު އެއް މައްސަލައެއް ކަމުގައިވާ ކޮރަޕްޝަނާ ދެކޮޅަށް އެކުގައި މަސައްކަތްކުރުމާ ބެހޭގޮތުން މަޝްވަރާކުރުމަށް އޯއައިސީގެ މެމްބަރު ޤައުމުތަކުގެ މުހިންމު ޖަލްސާގައި ވާހަކަދެއްކުމަކީ ދިވެހިރާއްޖެއަށް ލިބޭ ޝަރަފެއް ކަމަށް ވަޒީރު އިޙްސާން ވިދާޅުވިއެވެ. 

 “ކޮރަޕްޝަނަކީ އަޅުގަނޑުމެންގެ މުޖުތަމަޢުތަކުގެ ފޭރާން ފަނާކޮށް، ތަރައްޤީއަށް ހުރަސްއަޅައި، ވެރިކަން ބަލިކަށިކުރާ ކަމެއް، މުސްލިމް ޤައުމުތަކުގެ ހައިސިއްޔަތުން، އަޅުގަނޑުމެންގެ ދީނުގައި އަމުރުކުރައްވާފައިވާ ފަދައިން ހާމަކަން ބޮޑު ގޮތެއްގައި ކަންކަން ކުރުމާއި، ޢަދުލުވެރިކަމާއި އަމާނާތްތެރިކަމުގެ އުސޫލުތައް ދެމެހެއްޓުމަކީ އަޅުގަނޑުމެންގެ މައްޗަށް ލާޒިމު ކަމެއް” ވަޒީރު އިޙްސާން ވިދާޅުވިއެވެ.

ހުރިހާ ފެންވަރެއްގައިވެސް ކޮރަޕްޝަނާ ދެކޮޅަށް ހަރުކަށި ފިޔަވަޅުތައް އެޅުމުގައި ދިވެހިރާއްޖެ ދެމިއޮންނާނެ ކަމަށް ވަޒީރު އިޙްސާން ވިދާޅުވިއެވެ. 

ދެމެހެއްޓެނިވި ތަރައްޤީ ހާސިލުކުރުމަށާއި ރައްޔިތުންގެ ދުޅަހެޔޮކަން ރައްކާތެރިކުރުމަށް މި މަސައްކަތަކީ ކޮންމެހެން ކުރަންޖެހޭ ކަމެއްކަން ޤަބޫލުކުރައްވާ ކަމަށް ވަޒީރު އިޙްސާން ވިދާޅުވިއެވެ.

 “އެހެންނަމަވެސް، އަޅުގަނޑުމެންގެ ޤައުމުތަކުގެ މެދުގައި ވަރުގަދަ އެއްބާރުލުމެއް ނެތި މި މަސައްކަތް ކާމިޔާބެއް ނުވާނެ” ވަޒީރު އިޙްސާން ވިދާޅުވިއެވެ.

އޯއައިސީއަކީ  ކޮރަޕްޝަނާ ދެކޮޅަށް ހަރުދަނާ ފިޔަވަޅުތައް އެޅުމުގައި އެންމެ ރަނގަޅު ގޮތްތައް ޙިއްސާކުރުމަށް ލިބިފައިވާ ވަރުގަދަ މަންސައެއް ކަމަށް ވަޒީރު ވިދާޅުވިއެވެ. 

 އައު ގޮތްތަކާއި ޓެކްނޮލޮޖީއަކީ ކޮރަޕްޝަނާއި ދެކޮޅަށް ކުރާ މަސައްކަތުގައި މުހިންމު ވަސީލަތްތަކެއް ކަމަސް ވަޒީރު އިޙްސާން ވިދާޅުވިއެވެ. އަދި ޑިޖިޓަލް ހާމަކަން ބޮޑު ނިޒާމުތަކާއި، އީ-ގަވަރނަންސް ޕްލެޓްފޯމްތަކާއި، އާންމު ޖަވާބުދާރީވުމުގެ ނިޒާމުތަކުން ކޮރަޕްޝަނަށް ފުރުސަތު ލިބޭ މިންވަރު މަދުކުރެވިދާނެ ކަމަށްެވެސް ވަޒީރު އިޙްސާން ވިދާޅުވިއެވެ.

 “ހަމައެހާމެ މުހިންމު ކަމަކީ ޒުވާނުންގެ ދައުރު، އަޅުގަނޑުމެންގެ ޒުވާން ޖީލުތަކުގައި ތެދުވެރިކަމާއި އިންސާފުގެ އަގުތައް އަށަގެންނެވުމުގެ ތެރެއިން، އަޅުގަނޑުމެން އުފައްދަނީ އަޚްލާޤީ ވެރިކަމަށް ވަފާތެރި، ދެމިހުންނަނިވި މުޖުތަމަޢުތައެއް، މިއަދުގެ ބައްދަލުވުމުގައި އަޅުގަނޑުމެންގެ އަޒުމާއި، ފާސްކުރެވުނު ޤަރާރުތަކާއި، އަދި މައްކަތުލް މުކައްރަމާ މުޢާހަދާގެ އަލީގައި، އޯއައިސީގެ މެމްބަރު ޤައުމުތަކަށް މި ދުނިޔެވީ ހަނގުރާމައިގައި އެކުގައި މަސައްކަތްކުރެވިދާނެ” ވަޒީރު އިޙްސާން ވިދާޅުވިއެވެ.

ވަޒީރުގެ ވާހަކަފުޅުގައި ކޮރަޕްޝަނާ ދެކޮޅަށް ކުރެވޭ ޖަމާޢީ މަސައްކަތުގައި ދިވެހިރާއްޖެއިން ދެމިއޮންނާނެ ކަމުގެ ޔަޤީންކަން އަރުވާކަމަށް ވިދާޅުވިއެވެ.