އެމެރިކާއާއި އީރާނުގެ ސުލްހައިގެ އެއްބަސްވުން ވަނީ ވަރަށް ގާތްވެފަ: ޕާކިސްތާން

އެމެރިކާއާއި އީރާނާ ދެމެދު ގާއިމުކުރާ ސުލްހައިގެ އެއްބަސްވުމުގެ އެންމެ ފަހުގެ މަރުހަލާއަށް އާދެވި، ދެ ފަރާތުން އެއްބަސްވާ ފައިނަލް ލިޔުމަކަށް ވާސިލްވެފައިވާ ކަމަށް ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ޝަރީފް ވިދާޅުވީ، ސުލްހަ މިހާ ގާތްވި ދުވަހެއް މީގެ ކުރިން އައިސްފައި ނުވާ ކަމަށާއި، މިހާރު ކުރިއަށްދަނީ އެއްބަސްވުން ނިންމުމަށްޓަކައި ދެ ފަރާތާއެކު ކުރަންޖެހޭ އެންމެ ފަހުގެ މަސައްކަތްތައް ކަމަށެވެ.

މި އެއްބަސްވުމާ ގުޅޭގޮތުން އީރާނުގެ ޚާރިޖީ ވަޒީރު އައްބާސް އަރަގްޗީ ވެސް ވަނީ އުންމީދީ ވާހަކަތަކެއް ދައްކަވާފައެވެ. އަރަގްޗީ ވިދާޅުވީ އެއްބަސްވުމަކަށް އައުމަށް މީގެ ކުރިން ދުވަހަކުވެސް ގާތްނުވާ މިންވަރަށް މިހާރު ގާތްވެފައިވާ ކަމަށެވެ. ނަމަވެސް، އެއްބަސްވުމުގެ ތަފްސީލުތަކާ މެދު މީޑިއާތަކުން އަމިއްލައަށް ގޮތްގޮތަށް ވާހަކަ ނުފެތުރުމަށް އޭނާ އިލްތިމާސް ކުރެއްވިއެވެ. އީރާނުގެ ޚާރިޖީ ވަޒީރުގެ މި ބަޔާން އެމެރިކާގެ ރައީސް ޑޮނަލްޑް ޓްރަމްޕް ވަނީ އޭނާގެ ސޯޝަލް މީޑިއާ ޕްލެޓްފޯމް ކަމަށްވާ 'ޓްރޫތު ސޯޝަލް' ގައި ރިޕޯސްޓް ކުރައްވާފައެވެ.

އެއްބަސްވުމުގެ ތަފްސީލުތަކާ ގުޅޭގޮތުން އީރާނުގެ ރަސްމީ ނޫސް އޭޖެންސީ 'އިރްނާ' އިން ރިޕޯޓްކޮށްފައިވާ ގޮތުގައި، އީރާނުގެ ނިއުކްލިއާ ޕްރޮގްރާމާއި ހޯރްމުޒް ކަނޑުއޮޅީގެ ކޮންޓްރޯލާ ގުޅޭގޮތުން އީރާނުން އައު ދޫދިނުންތަކެއް ނުދޭނެއެވެ. އަދި އެއްބަސްވުމާއެކު އީރާނުގެ ހިފަހައްޓާފައިވާ ފައިސާތައް ވަގުތުން ދޫކޮށްލާނެ ކަމަށް އެ ރިޕޯޓުގައިވެއެވެ. ނަމަވެސް އެމެރިކާގެ އޮފިޝަލުން މި ވާހަކަތައް ދޮގުކުރެއެވެ. އެމެރިކާގެ އޮފިޝަލަކު ބުނީ މަޝްވަރާ ކުރެވެމުންދާ އެއްބަސްވުމުގެ ދަށުން އީރާނުގެ ނިއުކްލިއާ ޕްރޮގްރާމް އުވާލައި، ނިއުކްލިއާ މާއްދާތައް ނައްތާލަން ޖެހޭނެ ކަމަށެވެ.

އެމެރިކާގެ ނައިބު ރައީސް ޖޭޑީ ވެންސް ބުނި ގޮތުގައި، އީރާނުގެ އެއްވެސް ފައިސާއެއް ވަގުތުން ދޫނުކުރާނެއެވެ. އޭނާ ބުނީ އެއްބަސްވުން ބައްޓަންކޮށްފައިވަނީ އެމެރިކާއާއި އެކުވެރި ގައުމުތަކުގެ ކަންބޮޑުވުންތަކަށް އިސްކަންދޭ ގޮތަށް ކަމަށާއި، އީރާނުން އެގައުމުގެ އިލްތިޒާމްތައް ފުރިހަމަކުރުމުން ނޫނީ އިގްތިސާދީ މަންފާއެއް ނުލިބޭނެ ކަމަށެވެ. މި އެއްބަސްވުމަކީ މުޅި ސަރަހައްދުގެ މަސްލަހަތު ބަދަލުކޮށްލާނެ، ދެމެހެއްޓެނިވި ސުލްހައަކަށް މަގުފަހިވާނެ ކަމެއްގެ ގޮތުގައި ވެންސް ސިފަކުރެއްވިއެވެ.

މި މަޝްވަރާތައް ބާރުސްޕީޑުގައި ކުރިއަށް މިދަނީ މި ހަފްތާގައި އެމެރިކާއާއި އީރާނާ ދެމެދު ހަމަލާތަކެއް ބަދަލުކުރުމަށްފަހުގައެވެ. ރައީސް ޓްރަމްޕް ވަނީ އީރާނުގެ ތެޔޮ އެކްސްޕޯޓް ކުރާ މައި މަރުކަޒު ކަމަށްވާ ޚާރްގް އައިލެންޑް ހިފާނެ ކަމުގެ އިންޒާރު ދެއްވުމަށްފަހު، އެއްބަސްވުމަކަށް އާދެވިދާނެ ކަމުގެ އުންމީދުގައި އީރާނަށް ދޭން އުޅުނު ހަމަލާތަކެއް މަޑުޖައްސާލާފައެވެ. ޓްރަމްޕް ވިދާޅުވި ގޮތުގައި މި ހަފްތާ ބަންދު ތެރޭގައި އެއްބަސްވުމުގައި ސޮއިކުރެވޭނެ ކަމަށް އޭނާ އަދިވެސް ގަބޫލުކުރައްވައެވެ.

މި އެއްބަސްވުން ފައިނަލް ކުރުމަށްޓަކައި އީރާނުގެ އެތެރޭގެ ގިނަ މުއައްސަސާތަކެއްގެ ރުހުން ބޭނުންވާނެއެވެ. އޭގެ ތެރޭގައި އީރާނުގެ އަސްކަރިއްޔާ، އައިއާރްޖީސީ، ޕާލަމެންޓް އަދި އެންމެ ފަހުން އެގައުމުގެ އެންމެ މަތީ ލީޑަރުގެ ރުހުން ހޯދަން ޖެހޭނެއެވެ. އެހެންކަމުން، މިހާރު މަޝްވަރާ ކުރެވެމުންދާ 'މެމޮރެންޑަމް އޮފް އަންޑަސްޓޭންޑިންގް' އަކީ ހަމައެކަނި ކުރިއަށް ހުރި މުހިންމު މަޝްވަރާތަކުގެ ފެށުމެއް ކަމަށް މަސްރަހު ދިރާސާކުރާ ފަރާތްތަކުން ދެކެއެވެ.