އީރާނާއި އެމެރިކާއާ ދެމެދު ސުލްހައިގެ އެއްބަސްވުމަކާ ގާތަށް އާދެވިއްޖެ: އައްބާސް އަރަގްޗީ

އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމަ ދާއިމީކޮށް ހުއްޓާލުމަށް ކުރެވޭ މަސައްކަތުގެ ދަށުން، ދެ ފަރާތުގެ ދެމެދުގައި އެއްބަސްވުމަކަށް އާދެވުމާ މިހާ ގާތްވި ވަގުތެއް މީގެ ކުރިން އައިސްފައި ނުވާ ކަމަށް އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވެއްޖެއެވެ.

މިއީ އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން އިސްނަގައިގެން ކުރިއަށްގެންދާ މަޝްވަރާތަކުގައި ބޮޑު ކުރިއެރުމެއް ލިބިފައިވާކަން ހާމަކޮށްދޭ އެންމެ ސާފު އިޝާރާތެވެ.

އީރާނުގެ ޕްރެސް ޓީވީއަށް ދެއްވި ބަސްދީގަތުމެއްގައި އަރަގްޗީ ވިދާޅުވީ، މިހާރު މަޝްވަރާ ކުރެވެމުންދާ އެއްބަސްވުން އެކުލެވިގެންވަނީ ދެ މަރުހަލާއަކަށް ކަމަށެވެ. ފުރަތަމަ މަރުހަލާގައި ހިމެނެނީ އިސްރާއީލުން ލުބުނާނުގައި ހިންގާ އުދުވާންތައް ހުއްޓާލުމާއި، ހަނގުރާމައިގެ އަމަލުތައް މެދުކަނޑާލުމުގެ ފަހުމުނާމާއެއްގައި ސޮއިކުރުމެވެ. ދެވަނަ މަރުހަލާގައި އީރާނުގެ ނިއުކްލިއާ ޕްރޮގްރާމާއި، ދަތިކުރުމުގެ ފިޔަވަޅުތައް އުވާލުމާއި، އަދި ހިފަހައްޓާފައިވާ އީރާނުގެ ފައިސާ ދޫކޮށްލުމާ ގުޅޭގޮތުން ތަފްސީލީ މަޝްވަރާތައް ކުރިއަށްދާނެއެވެ.

އަރަގްޗީ އިތުރަށް ވިދާޅުވީ ހޯމްޒް ކަނޑުއޮޅީގެ ސިޔާދަތީ ބާރު އޮންނާނީ އީރާނާއި އޮމާންގެ އަތްމަތީގައި ކަމަށާއި، ނަމަވެސް ކުރިއާ ހިލާފަށް އެތަނުގެ އިދާރީ ކަންކަމަށް ބަދަލުތަކެއް އަންނާނެ ކަމަށެވެ. މީގެ އިތުރުން، އީރާނުގެ މަޖިލީހުގެ ރައީސް މުހައްމަދު ބާގިރު ގާލީބާފް އެކްސްގައި ކުރެއްވި ޕޯސްޓެއްގައި ވިދާޅުވީ ވެވޭ އިލްތިޒާމްތަކަށް ފުރިހަމައަށް އަމަލުކުރަންޖެހޭނެ ކަމަށާއި، ކުރިއަށް އޮތް އެއްބަސްވުމުގައި އުޒުރުތަކަށް ޖާގައެއް ނޯންނާނެ ކަމަށެވެ.

އެމެރިކާގެ އިސް އޮފިޝަލަކު ވިދާޅުވި ގޮތުގައި އެއްބަސްވުމަކާ ވަރަށް ގާތަށް އާދެވިފައިވީ ނަމަވެސް، އަދި މުޅިން ނިމުމަކަށް ނާދެއެވެ. މި އެއްބަސްވުމުގެ ދަށުން އީރާނުގެ ނިއުކްލިއާ ޕްރޮގްރާމް އުވާލައި، ނިއުކްލިއާ މާއްދާތައް ހަވާލުކުރުމުން ބަދަލުގައި ދަތިކުރުމުގެ ފިޔަވަޅުތަކަށް ބޮޑެތި ލުއިތަކެއް ދެވޭނެއެވެ. ނަމަވެސް، އެމެރިކާގެ ނައިބު ރައީސް ޖޭޑީ ވެންސް ބުނާ ގޮތުގައި، އީރާނުން އެއްބަސްވުމުގެ ޝަރުތުތަކަށް އަމަލުކުރަން ފެށުމުގެ ކުރިން އެއްވެސް ފައިސާއެއް ދޫނުކުރެވޭނެއެވެ.

ރައީސް ޑޮނަލްޑް ޓްރަމްޕް އެކްސިއޯސް ނިއުސްއަށް ބުނި ގޮތުގައި، ކުރިއަށް އޮތް ހަފުތާ ބަންދުގެ ތެރޭގައި މި އެއްބަސްވުމުގައި ސޮއިކުރެވޭނެ ކަމަށް އޭނާ ގަބޫލުކުރެއެވެ. ވައިޓް ހައުސްއިން ބުނާ ގޮތުގައި މި އެއްބަސްވުމުގެ މައިގަނޑު ޝަރުތުތަކުގެ ތެރޭގައި އީރާނުގެ ނިއުކްލިއާ ޕްރޮގްރާމް ނައްތާލުމާއި، ހޯމްޒް ކަނޑުއޮޅި އަލުން ހުޅުވާލުމާއި، އަދި ސަރަހައްދީ ހަނގުރާމަވެރި ޖަމާއަތްތަކަށް އެހީތެރިވުން ހުއްޓާލުން ހިމެނެއެވެ.

މި އެއްބަސްވުމުގެ ދެލިކޮޕީ ފައިނަލް ކުރުމުގެ ކުރިން އީރާނުގެ އެކި މުއައްސަސާތަކުގެ ލަފާ ހޯދަންޖެހެއެވެ. މީގެ ތެރޭގައި އަސްކަރީ މަރުކަޒީ އިދާރާ، އައިއާރުޖީސީ، ޕާލަމަންޓް އަދި އެންމެ ފަހުން އީރާނުގެ އެންމެ މަތީ ވެރިޔާގެ ރުހުން ހޯދަންޖެހޭނެ ކަމަށް ރިޕޯޓްތައް ބުނެއެވެ. މި މަޝްވަރާތައް ކުރިއަށްދަނީ މި ހަފުތާގައި އެމެރިކާ އާއި އީރާނާ ދެމެދު ހަމަލާތަކެއް ބަދަލުކުރެވި، މަސްރަހު ވަރަށް ބޮޑަށް ނުތަނަވަސްވެފައިވާ ދަނޑިވަޅެއްގައެވެ.