ރައްޔިތުންގެ މަޖިލީހުން ދަރަންޏާ ބެހޭ ބިލު ފާސްކޮށްފި

ރައްޔިތުންގެ މަޖިލީހުން ދައުލަތުގެ ދަރަންޏާ ބެހޭ ބިލު މިއަދު ފާސްކޮށްފިއެވެ. 

ސަރުކާރުގެ ފަރާތުން ހުށައެޅި މިބިލު މަޖިލީހަށް ހުށައަޅުއްވައިފައިވަނީ ފުނަދޫ ދާއިރާގެ ޕީއެންސީގެ މެންބަރު މުޙައްމަދު މަމްދޫޙެވެ.

ދަރަންޏާ ބެހޭ ބިލު ފާސްކުރުމަށް މަޖިލީހުގައި ވޯޓަށް އެހުމުން ވޯޓުގައި ބައިވެރިވި 81 މެމްބަރުންގެ އިއްތިފާޤުން ވަނީ ފާސްވެފައެވެ.

ސަރުކާރުގެ ފަރާތުން ހުށަހެޅި މިބިލުގައި ވަނީ އެ ޤާނޫނަށް އަމަލުކުރާތާ ހަ މަސް ދުވަހުގެ ތެރޭގައި ޑެޓް މެނޭޖްމެންޓް އޮފީހެއް، މާލީ ވުޒާރާގެ ދަށުން ހިންގަން ފަށަން ވާނެ ކަމަށް ބުނެފައެވެ.

އަދި މާލީ ވުޒާރާގެ ދަށުން މިހާރު ހިންގާ ޑެޓް މެނޭޖްމެންޓުގެ ހުރިހާ ޒިންމާތަކާއި މުވައްޒަފުންނާއި މުދަލާއި ވަސީލަތްތަކާއި އިމްތިޔާޒުތައް ޑެޓް މެނޭޖްމެންޓް އޮފީހަށް ބަދަލުވާނެ ކަމަށް ވެސް ބިލްގައި ބަޔާންކޮށްފައިވެއެވެ.

އެ އޮފީސް ހިންގާނީ ސިޔާސީ ނުފޫޒުން އެއްކިބާވެ، ޕްރޮފެޝަނަލް ކަމާ އެކުގައި ކަމަށް ދަރަންޏާ ބެހޭ ބިލުގައި ބުނެފައިވެއެވެ. ނަމަވެސް އެ އޮފީހުގެ ކަންކަމާ ގުޅޭ ގޮތުން ރައްޔިތުންގެ މަޖިލީހަށް ޖަވާބުދާރީ ވާން ޖެހޭނީ މާލީ ވަޒީރު ކަމަށް ވެސް ވަނީ ބުނެފައެވެ.

އޭގެ އިތުރުން ދައުލަތުގެ ދަރަންޏާ ބެހޭ ބިލުގައި ވަނީ ސޮވްރިން ގެރެންޓީ ދޭ ގޮތްތަކާއި ލޯކަލް ކައުންސިލްތަކާއި ސަރުކާރު ހިއްސާވާ ކުންފުނިތަކުން ދަރަނި ނެގުމުގައި ޢަމަލުކުރާނެ ގޮތްތައް ވެސް ބަޔާން ކޮށްފައެވެ. 

އަދި ދައުލަތުގެ ދަރަންޏާ ގުޅޭ މަޢުލޫމާތުތައް އެކްސްޓާނަލް އޮޑިޓަރެއް މެދުވެރިކޮށް އޮޑިޓެއް ހަދަން ޖެހޭނެކަމަށްވެސް ބުނެފައިވެއެވެ. ބިލްގައި ވަނީ ދައުލަތުގެ ދަރަނީގެ ސްޓްރެޓެޖީ ރައީސްއަށް ހުށަހަޅައި ކޮންމެ އަހަރެއްގެ ޖުލައި މަހުގެ 15 ކުރިން ފާސް ކުރަން ޖެހޭނެކަމަށެވެ.