ކަނޑުމަގުން މުދާ ބޭރުކުރުމުގެ ކްލިއަރެންސް މަރުހަލާއަށް އެވްރެޖްކޮށް 10 ދުވަސް ހޭދަވޭ: ކަސްޓަމްސް

މޯލްޑިވްސް ކަސްޓަމްސް ސާވިސްއިން ކުރިއަށްގެންދިޔަ "ޓައިމް ރިލީޒް ސްޓަޑީ 2025" ރިޕޯޓުގެ ހޯދުންތަކުން ދައްކާގޮތުގައި، ކަނޑުމަގުން ރާއްޖެއިން ބޭރަށް މުދާ ފޮނުވުމުގައި ފުރިހަމަކުރަންޖެހޭ އެކި މަރުހަލާތަކަށް އެވްރެޖްކޮށް 10 ދުވަސް ހޭދަވެއެވެ.

މި ދިރާސާގައި މުދާ ބޭރުކުރުމުގެ މަރުހަލާގެ ވަގުތު ގުނަން ފަށާފައިވަނީ ކަސްޓަމްސްއަށް ޑިކްލަރޭޝަން ހުށަހަޅާ ވަގުތުން ފެށިގެން، މުދާ ބަރުކޮށްގެން ބޯޓު ފުރާ ވަގުތާ ހަމައަށެވެ. އެގޮތުން، މި މުޅި މަރުހަލާއަށް އެވްރެޖްކޮށް ހޭދަވަނީ 10 ދުވަހާއި، 10 ގަޑިއިރާއި، 14 މިނެޓު ކަމަށް ކަސްޓަމްސްއިން ވިދާޅުވެއެވެ.

ކަސްޓަމްސްއިން ފާހަގަކުރާ ގޮތުގައި، މި ދިރާސާގެ މައިގަނޑު ބޭނުމަކީ އިދާރީ އިސްލާހުތަކާއި ޑިޖިޓަލް ނިޒާމުތައް މެދުވެރިކޮށް މުދާ ފޮނުވުމުގައި ހިނގާ ވަގުތު ކުރުކުރެވޭނެ ގޮތްތައް ދެނެގަތުމެވެ.

ދިރާސާގެ މުހިންމު ހޯދުންތައް:

• ޑިކްލަރޭޝަން އަދި ފައިސާ ދެއްކުން: ޑިކްލަރޭޝަން ހުށަހެޅުމުން ފެށިގެން އެސެސްމަންޓް ނިމުމަށް 15 ގަޑިއިރާއި 6 މިނެޓު ހޭދަވާއިރު، ފައިސާ ދެއްކުމުގެ މަރުހަލާއަށް 17 ގަޑިއިރާއި 31 މިނެޓު ހޭދަވެއެވެ.
  
• އޮފް-ޝޯ މަރުހަލާ: އޮފް-ޝޯ ރިކުއެސްޓަށް 1 ދުވަހާއި 16 ގަޑިއިރާއި 55 މިނެޓު، އަދި އެޕްރޫވަލްއަށް 1 ދުވަހާއި 9 ގަޑިއިރާއި 47 މިނެޓު ހޭދަވެއެވެ.
  
• އިންސްޕެކްޝަން: ސަރުކާރުގެ އެކި އިދާރާތަކުން ކުރަންޖެހޭ އިންސްޕެކްޝަންތަކަށް އެވްރެޖްކޮށް 1 ދުވަހާއި، 9 ގަޑިއިރާއި، 35 މިނެޓު ހޭދަވެއެވެ.
  
• ބުކިން އަދި ބޯޓު ފުރުން: ބުކިން ފޯމަށް ހުއްދަ ލިބުމަށް 1 ދުވަހާއި، 13 ގަޑިއިރާއި، 57 މިނެޓު ހޭދަވެއެވެ.

ކަސްޓަމްސްގެ ތަފާސްހިސާބުތަކުން ދައްކާ ގޮތުގައި މުޅި ސިލްސިލާގައި އެންމެ ގިނަ ވަގުތު ހޭދަވަނީ އެންމެ ފަހު މަރުހަލާ ކަމަށްވާ މުދާ ބަރުކޮށް ބޯޓު ފުރުމުގެ މަރުހަލާގައެވެ. މި މަރުހަލާއަށް އެކަނިވެސް 2 ދުވަހާއި، 12 ގަޑިއިރާއި، 3 މިނެޓު ހޭދަވާކަމަށް ރިޕޯޓުގައި ފާހަގަކޮށްފައިވެއެވެ.

މި ދިރާސާގެ ހޯދުންތަކާއެކު، ރާއްޖޭގެ އެކްސްޕޯޓް މަރުހަލާ އިތުރަށް ހަލުވިކުރުމަށް ކުރަންޖެހޭ މަސައްކަތްތައް ދެނެގަނެވިގެންދާނެ ކަމަށް ކަސްޓަމްސްއިން އުންމީދު ކުރެއެވެ.

📊Key finings of the “Maldives Time Release Study 2025”

📑 🚢 From Declaration submission to vessel departure:

Total export clearance time shows an average of 10 days, 10 hours and 14 minutes.

➡️ Swipe through to explore the timeline for each clearance stage. pic.twitter.com/NxBpZYk78y

— Maldives Customs Service (@CustomsMv) June 13, 2026