މުލީގައި ތަރައްޤީކުރާ ހޮސްޕިޓަލް އިމާރާތުގެ ފައުންޑޭޝަން މަސައްކަތް ފަށައިފި

މުލަކަތޮޅު މުލީގައި ތަރައްޤީކުރުމަށް ހަމަޖެހިފައިވާ 50 އެނދުގެ އައު ހޮސްޕިޓަލް އިމާރާތުގެ ފައުންޑޭޝަންގެ އަމަލީ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ފަށައިފިއެވެ.

މި މަޝްރޫޢުގެ އަމަލީ މަސައްކަތް ރަސްމީކޮށް ފެށިގެންދިޔައީ، މިދިޔަ އަހަރުގެ މެއި މަހުގެ 20 ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރަށަށް ކުރެއްވި ދަތުރުފުޅުގެ ތެރެއިންނެވެ. އެމްޓީސީސީން މިއަދު ހާމަކުރި ގޮތުގައި، މިހާރު ކުރިއަށްދަނީ ހޮސްޕިޓަލް އިމާރާތުގެ ފައުންޑޭޝަން އެޅުމުގެ މުހިންމު މަރުޙަލާއެވެ.

މި މަޝްރޫޢަކީ މުލަކަތޮޅުގެ ސިއްޙީ ނިޒާމު ހަރުދަނާކޮށް، ރައްޔިތުންނަށް ފެންވަރު ރަނގަޅު ޚިދުމަތްތަކެއް ފޯރުކޮށްދިނުމަށް ސަރުކާރުން ކުރިއަށްގެންދާ 171 މިލިއަން ރުފިޔާގެ ބޮޑު މަޝްރޫޢެކެވެ. ޖުމްލަ 32,000 އަކަފޫޓަށްވުރެ ބޮޑު ސަރަޙައްދެއްގައި ތަރައްޤީކުރާ މި ހޮސްޕިޓަލަކީ 4 ފަންގިފިލާގެ ޒަމާނީ އިމާރާތެކެވެ.

ހޮސްޕިޓަލްގެ އައު އިމާރާތުގައި ހިމެނޭނެ މައިގަނޑު ޚިދުމަތްތަކުގެ ތެރޭގައި:

• ކޮންސަލްޓޭޝަން ރޫމްތަކާއި އޮޕަރޭޝަން ތިއޭޓަރު
  
• އިމަޖެންސީ ރޫމް (އީ.އާރް) އަދި އެން.އައި.ސީ.ޔޫ
  
• ކުޑަކުދިންގެ ވޯޑާއި ޕްރައިވެޓް ރޫމްތައް
  
• ޑެންޓަލް، ފިޒިއޮތެރަޕީ އަދި ރޭޑިއޮލޮޖީގެ ޚިދުމަތް
  
• މީޓިންގ ރޫމްތަކާއި ކުޑަކުދިން ކުޅޭނެ ޚާއްސަ ސަރަޙައްދެއް

މީގެ އިތުރުން، އިދާރީ މަސައްކަތްތަކަށް ޚާއްސަ ވަކި އޮފީސް އިމާރާތެއްވެސް މި މަޝްރޫޢުގެ ދަށުން ބިނާކުރެވޭނެއެވެ.

މުލަކަތޮޅަކީ ގާތްގަނޑަކަށް 7,400 މީހުންގެ އާބާދީއެއް އޮތް އަތޮޅެކެވެ. މިހާރު އެ އަތޮޅުގެ ރައްޔިތުން ބަރޯސާވާ މުލީ ރީޖަނަލް ހޮސްޕިޓަލަކީ 30 އަހަރަށްވުރެ ގިނަ ދުވަސްވީ ބާ އިމާރާތެކެވެ. ވޭތުވެދިޔަ ދިގު މުއްދަތުގައި އެ ހޮސްޕިޓަލުގެ ތަރައްޤީއަށް އެދެވޭ މަސައްކަތްތަކެއް ކުރެވިފައި ނުވިނަމަވެސް، މި އައު އިމާރާތާއެކު މުޅި އަތޮޅުގެ ސިއްޙީ ޚިދުމަތަށް އިންގިލާބީ ބަދަލެއް އައިސް، ރައްޔިތުންނަށް ބޮޑެތި ލުއިފަސޭހަތަކެއް ލިބިގެންދާނެ ކަމަށް ސަރުކާރުން ބުނެއެވެ.

Project Update: Construction Of M.Muli Regional Hospital New Building

Foundation footing strip casting, reinforcement and lean casting works are currently ongoing.

Follow more updates at: https://t.co/SfVAzkW2pp#MTCCProjects #TeamMTCC #RayyithungeKunfuni… pic.twitter.com/bvNdyWuscj

— MTCC Plc (@MTCCPlc) June 11, 2026