ރައްޔިތުންގެ މަޖިލީހުން ދައުލަތުގެ ފިސްކަލް ޒިންމާގެ ބިލު ފާސްކޮށްފި

ރައްޔިތުންގެ މަޖިލީހުން ދައުލަތުގެ ފިސްކަލް ޒިންމާގެ ބިލު މިއަދު ފާސްކޮށްފިއެވެ.

ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި މިބިލު މަޖިލީހަށް ހުށައަޅުއްވައިދެއްވައިފައިވަނީ ތުލުސްދޫ ދާއިރާގެ ޕީއެންސީ މެންބަރު އިބްރާހިމް ނަސީމެވެ.

މި ބިލު ފާސްކުރުމަށް ވޯޓަށް އެހުމުން ޖަލްސާގައި ބައިވެރިވި 81 މެމްބަރުންގެ އިއްތިފާޤުން މިބިލު ވަނީ ފާސްވެފައެވެ.

ބިލު ހުށައެޅުމުގެ މަޤްސަދެއް ކަމުގައި ބުނެފައިވަނީ އެކަށީގެންވާ ގޮތެއްގައި ތަންފީޒުކުރެވޭނެ ފިސްކަލް ހަމަތަކާ ގުޅޭ އާ ނިޒާމެއް ތަޢާރަފްކޮށް ދައުލަތުގެ ފިސްކަލް އެންމެހާ ކަންކަން ހިންގަނީ ފިސްކަލް ޑިސްޕްލިން ގާއިމް ކުރެވޭނެ ފަދައިން ދެމެހެއްޓެނެވި ދެފުށް ފެންނަ އަދި ޒިންމާދާރު ގޮތެއްގައި ކަށަވަރު ކުރުންކަމަށެވެ.

 ދައުލަތުގެ ފިސްކަލް ޕޮލިސީ ހިންގަނީ "އިންޓާޖެނެރޭޝަނަލް އިކުއިޓީ" ނުވަތަ ކުރިއަށް އޮތް ޖީލުތަކަށް އިންސާފުވެރި ގޮތަކަށް ގާއިމް ކުރެވޭނެ ހަމައަކުން ދެމެހެއްޓެނިވި ގޮތެއްގައިކަން ކަށަވަރު ކުރުމާ ގުޅޭ އުސޫލުތަކާއި ދައުލަތުގެ މެދު ރާސްތާ ފިސްކަލް ސްޓްރެޓެޖީ އެކުލަވާލައި ތަންފީޒު ކުރުމާ ގުޅޭ އުސޫލުތައް ސަރުކާރުން ހުށައަޅައިފައިވާ މިބިލުގައި ބަޔާންކޮށްފައިވެއެވެ. 

މީގެއިތުރުން ދައުލަތުގެ ފިސްކަލް ނިޒާމު ދެމެހެއްޓެނިވި، ދެފުށް ފެންނަ އަދި ޒިންމާދާރު ގޮތެއްގައި ހިންގުމާއި ގުޅޭ ހަމަތަކާއި އަމާޒުތަކާއި އުސޫލުތައް ބަޔާންކޮށްފައިވެއެވެ.

އެ ބިލުގައި ދައުލަތުގެ ފިސްކަލް ޕޮލިސީ ހިނގާނުހިނގާ ގޮތް ރައްޔިތުންގެ މަޖިލީހުން ބެލުމަށް މަގުފަހި ކުރުމުގެ ގޮތުން ދައުލަތުގެ ފިސްކަލް ނިޒާމު ހިންގުމާ ގުޅޭ ގޮތުން ހާސިލު ކުރެވޭ ނަތީޖާތައް ރައްޔިތުންގެ މަޖިލީހާ ހިއްސާ ކުރުން ވެސްެ ހިމަނައިފައިވެއެވެ.

 އަދި ދައުލަތުގެ ފިސްކަލް ކަންކަމާ ގުޅޭ ގޮތުން ސަރުކާރު ޖަވާބުދާރީ ކުރުވުމާއި ބެހޭ އުސޫލުތައް ވެސް ބިލުގައިވެއެވެ.

މި ބިލު ޤާނޫނަކަށްވުމާ އެކު، ދައުލަތުގެ ހަރަދަށް ޒިންމާވާ ޤާނޫނު އުވިގެންދާނެއެވެ.