ރައްޔިތުންގެ މަޖިލީހުން އާބަން ޑިވެލޮޕްމަންޓް ބިލު ފާސްކޮށްފި

ރައްޔިތުންގެ މަޖިލީހުން އާބަން ޑިވަލޮޕްމެންޓް ބިލު މިއަދު ފާސްކޮށްފިއެވެ. 

ސަރުކާރުގެ ފަރާތުން މިބިލު މަޖިލީހަށް ހުށައެޅުއްވީ ވިލިނގިލީ ދާއިރާގެ ޕީއެންސީގެ މެމްބަރު ޢާޒިމް ޢަބްދުލް ޢަޒީޒެވެ.

އާބަން ޑިވަލޮޕްމެންޓް ބިލު ފާސްކުރުމަށް ވޯޓަށް އެހުމުން 70 މެމްބަރަކު ފާސްކުރުމަށް ވޯޓު ދެއްވި އިރު 11 މެމްބަރަކު ވަނީ ފާސްކުރުަމަށް ނުފެންނަ ކަމަށް ވޯޓު ދެއްވައިފައިވެއެވެ.

ސަރުކާރުން ހުށައެޅުއްވެވި އާބަން ޑިވަލޮޕްމެންޓް ބިލުގައި ބުނެފައިވަނީ އާބަން ސަރަހައްދުތައް ކަނޑައެޅުމާއި އާބަން ސަރަހައްދުތައް ތަރައްޤީކޮށް ހިންގުމާބެހޭ ޤައުމީ ސިޔާސަތު ކަނޑައަޅާނީ ވަޒީރުންގެ މަޖިލީޙުގެ ލަފާގެ މަތިން ރައީސުލްޖުމްހޫރިއްޔާ ކަމަށެވެ.

އަދި މި ސިޔާސަތު ކަނޑައަޅާ އާންމު ކުރަންވާނެ ކަމަށާއި، އަދި ސިޔާސަތު ތަންފީޒުކުރެތޯ ބެލުމުގެ ޒިންމާ އަދާކުރާނީ ވަޒީރު ކަމަށް ބަޔާންކޮށްފައިވެއެވެ.

މީގެއިތުރުން އާބަން ސަރަހައްދުތަކުގެ އޭރިޔާ ޑިވެލޮޕްމަންޓް މާސްޓާ ޕްލޭން ތައްޔާރުކޮށް އެފަދަ ސަރަހައްދުތައް ތަރައްޤީކުރާ ފަރާތްތަކަށް ތަރައްޤީކުރުމުގެ ހުއްދަތައް ދިނުމާއި އެފަރާތްތަކުން އެ ސަރަހައްދުތަކުގައި ކުރިއަށްގެންދާ ތަރައްޤޯގެ މަސައްކަތްތައް ވިލަރެސްކުރުމަށްޓަކައި "އާބަން ޑިވެެލޮޕްްމަންޓް އޮތޯރިޓީ"ގެ ނަމުގައި ސަރުކާރުގެ އިދާރާއެއް އުފެދޭނެ ކަމަށް ބިލުގައި ބަޔާންކޮށްފައިވެއެވެ. 

ރާއްޖޭގައި 7 އާބަން ސެންޓަރުތައް ގާއިމުކުރުމަކީ ރައީސް ޑރ މުޙައްމަދު މުޢިއްޒުގެ ރިޔާސީ ވަޢުދުފުޅު ތަކުގެ ތެރޭގައި ހިމެނޭ ކަމެކެވެ.