ގުރައިދޫއިން އައްޑޫއާ ކުޅުނު މެޗުން ވެސް ޕޮއިންޓެއް ހޯދާ، ދެވަނަ ބުރާ ގާތަށް ޖެހިލައިފި

ނަންޓީ ޕްލަސް ގޯލްޑް ކަޕްގައި އައްޑޫ ސިޓީ އާއި ގުރައިދޫ ބައްދަލުކުރި މެޗު 1-1 އިން އެއްވަރުވެ، ދެވަނަ ބުރުން ޖާގައެއް ހޯދުމާއި ގާތަށް ގުރައިދޫއިން ޖެހިލައިފިއެވެ. އެ ޓީމުން ފުރަތަމަ މެޗުގައި ހޯދި 3 ޕޮއިންޓާއެކު، ގްރޫޕް-ސީގެ އެއްވަނައިގައި މިހާރު އޮތީ ޖުމްލަ 4 ޕޮއިންޓާއެކުއެވެ.

ގުރައިދޫއިން 3 ޕޮއިންޓު ހޯދީ ފުޓުބޯޅައިގެ ދިގު ތާރީހެއް އޮތް ހުރާ 3-1 އިން ބަލިކުރުމަށްފަހުއެވެ. އަނެއްކޮޅުން އައްޑޫގެ ފުރަތަމަ މެޗުގައި ކުރެންދޫއާ ދެކޮޅަށް ނިކުތްއިރު، އެ މެޗުން ވެސް އެއްވަރުވެފައިވަނީ 1-1 އިންނެވެ. އެހެންކަމުން، 2 ޕޮއިންޓާއެކު ގްރޫޕްގެ ދެވަނައިގައި މިހާރު އޮތީ އައްޑޫއެވެ. 

އައްޑޫ އާއި ގުރައިދޫ ބައްދަލު ކުރިމެޗުގެ ގޯލުތައް ފެނިގެން ގޮސްފައި ވަނީ މެޗުގެ ވަރަށް ކުރީކޮޅުއެވެ. އެގޮތުން މެޗުގެ ފުރަތަމަ ގޯލު 13 ވަނަ މިނެޓުގައި ކާމިޔާބުކުރީ އައްޑޫއެވެ. އެއީ ގަލޮޅު ދަނޑަށް ފަރިތަ، އެ ޓީމުގެ ކެޕްޓަން އަލީ ނާފިއު (ކަޅޭ) ގޯލު ކުރިމައްޗަށް ހުރަސް ކުރި ރީތި ބޯޅައަކުން މުޙައްމަދު އިންޝާލް ކާމިޔާބުކުރި ގޯލެކެވެ. ސްލައިޑް ކުރުމަށްފަހު އެއް ޓަޗުން އިންޝާލް އެ ބޯޅަ ފޮނުވާލީ ގޯލުގެ މަތީ ކަނަށެވެ.

އެ ގޯލަށްފަހު މާގިނައިރުތަކެއް ނުވަނީސް ގުރައިދޫއިން މެޗުގެ ނަތީޖާ ހަމަހަމަކުރިއެވެ. މެޗުގެ 22 ވަނަ މިނެޓުގައި މި ގޯލު ކާމިޔާބުކޮށްދިނީ އެ ޓީމުގެ ކަނާއަތް ފަޅިން ކުޅެމުންދިޔަ ވިޝާން އަބްދުލް މަޖީދުއެވެ. އޭނާ ގޯލު ކުރިމައްޗަށް ހުރަސް ކުރަން މަސައްކަތްކުރި ބޯޅަ، އައްޑޫގެ ކީޕަރުގެ ބޯ މަތިން ގޮސް އޮއްސުނީ ގޯލުގެ ތެރެއަށެވެ.

މި މުބާރާތުގައި ބުރާސްފަތި ދުވަހުގެ ހަވީރު ބައްދަލުކުރާނީ ކުރެންދޫ އާއި ހުރާއެވެ. އެ މެޗުން މޮޅުވާ ޓީމަކަށް، ގްރޫޕް-ސީ އިން ދެވަނަ ބުރުގެ ޖާގައެއް ލިބުމާ ގާތަށް ޖެހިލާނެއެވެ. މި މެޗަށް ނިކުންނަ އިރު ކުރެންދޫއަށް ޕޮއިންޓެއް ލިބިފައިވާއިރު، ހުރާ އޮތީ އެއްވެސް ޕޮއިންޓެއް ނުލިބި ގްރޫޕުގެ 4 ވަނައިގައެވެ.

ބުރާސްފަތި ދުވަހުގެރޭ ބައްދަލު ކުރާނީ ނައިފަރާއި އަލިފުއްޓެވެ. މި ދެ ޓީމު ވެސް ވަނީ ފުރަތަމަ މެޗު ކާމިޔާބުކޮށްފައެވެ. އަދި ގޯލުގެ ތަފާތުން ގްރޫޕް-ޑީގެ ކުރީގައި އަލިފުށި އޮތް އިރު، ނައިފަރު އޮތީ ދެވަނައިގައެވެ.