ޕެރިސް އޮލިމްޕިކްސްގައި ދުއްވާނެކަމަށް ބުނި އިލެކްޓްރިކް ޓެކްސީ މަޝްރޫޢު ފެއިލްވެ ޞިނާޢަތަށް ގޮންޖެހުންތަކެއް ކުރިމަތިވެއްޖެ

މިއަހަރު ބޭއްވުމަށް ހަމަޖެހިފައިވާ ޕެރިސް އޮލިމްޕިކްސްގައި އިލެކްޓްރިކް އުދުހޭ ޓެކްސީ ޚިދުމަތެއް ތަޢާރަފުކުރުމަށް ރޭވިފައިވީ ނަމަވެސް، އެ މަޝްރޫޢު ފެއިލްވެއްޖެއެވެ. ޖަރުމަނުވިލާތުގެ ވޮލޮކޮޕްޓަރ ކުންފުނިން ވަޢުދުވެފައިވީ އެ ކުންފުނީގެ "ވޮލޯސިޓީ" ނަމަކަށް ކިޔާ ދެ މީހުން އުފުލޭ އިލެކްޓްރިކް އުޅަނދު މެދުވެރިކޮށް މުބާރާތުގެ ތެރޭގައި ފަސިންޖަރުން އުފުލުމަށެވެ. ނަމަވެސް އެކަން ވުޖޫދަށް ނާންނަ ހިނދު، އެ ކުންފުނިން ވަނީ ޑެމޮންސްޓްރޭޝަން ފްލައިޓްތަކެއް އެކަނި ކުރިއަށް ގެންގޮސްފައެވެ.

މި ސުންގަޑި ފަހަނައަޅައި ދިއުމަކީ ލަދުވެތި ކަމަކަށްވީ ނަމަވެސް، މިކަމުގެ ފުރަގަހުގައި މާ ސީރިއަސް މައްސަލައެއް ކުރިމަތިވެފައިވެއެވެ. އެއީ ވޮލޮކޮޕްޓަރ ކުންފުނި ދެމެހެއްޓުމަށްޓަކައި އިތުރު އިންވެސްޓްމަންޓެއް ހޯދުމަށް ކުއްލި ގޮތަކަށް މަސައްކަތްކުރަން ޖެހުމެވެ. ސަރުކާރުން 100 މިލިއަން ޔޫރޯ (83 މިލިއަން ޕައުންޑް؛ 106 މިލިއަން ޑޮލަރު) ދަރަންޏަށް ނެގުމަށް ކުރެވުނު މަސައްކަތް އޭޕްރީލް މަހު ނާކާމިޔާބުވިއެވެ.

މިހާރު އުއްމީދުތައް ބިނާވެފައިވަނީ ޗައިނާގެ ޖީލީ ކުންފުންޏަށެވެ. ބްލޫމްބަރގްގެ ރިޕޯޓެއްގައި ބުނާ ގޮތުން، ޖީލީއިން 95 މިލިއަން ޑޮލަރުގެ ފަންޑިންގ ދިނުމާ ބަދަލުގައި ވޮލޮކޮޕްޓަރުގެ 85 އިންސައްތަ ހިއްސާ ގަތުމަށް މަޝްވަރާކުރަމުންދެއެވެ. މި ޑީލް ސަބަބުން މުސްތަޤުބަލުގައި އުފެއްދުންތެރިކަން ޗައިނާއަށް ބަދަލުކުރަން ޖެހިދާނެއެވެ.

ވޮލޮކޮޕްޓަރަކީ ދުނިޔޭގެ އެކި ކަންކޮޅުތަކުގައި އިލެކްޓްރިކް ވަރޓިކަލް ޓޭކް-އޮފް އެންޑް ލޭންޑިންގ (އީވީޓީއޯއެލް) އުޅަނދު ތަރައްޤީކުރަމުންދާ ޑަޒަނަކަށްވުރެ ގިނަ ކުންފުނިތަކުގެ ތެރެއިން އެއް ކުންފުންޏެވެ. މި އުޅަނދުތަކުން ވަޢުދުވަނީ ހެލިކޮޕްޓަރެއްގެ ފްލެކްސިބިލިޓީ ދިނުމަށެވެ. ނަމަވެސް އޭގެ އަގާއި، އަޑުގަދަކަމާއި، ތިމާވެށްޓަށް ކުރާ އަސަރު ކުޑަކޮށެވެ.

ނަމަވެސް، މި އައު ބާވަތުގެ އުޅަނދުތައް ރެގިއުލޭޓަރީ އޮތޯރިޓީތަކުން ފާސްކުރުމަށާއި އުފެއްދުންތެރިކަމުގެ ޤާބިލުކަން އިތުރުކުރުމަށް ބޮޑެތި ޚަރަދުތަކެއް ކުރަން ޖެހުމާ ގުޅިގެން، ބައެއް އިންވެސްޓަރުން ވަނީ މި ދާއިރާއިން ފަހަތައްޖެހިފައެވެ.މިގޮތުން އެންމެ ފާހަގަކޮށްލެވޭ އެއް ކުންފުންޏަކީ ލިލިއަމްއެވެ.

ޖަރުމަނުވިލާތުގެ މި ކުންފުނިން ވަނީ އީވީޓީއޯއެލް ކޮންސެޕްޓަށް އައު ގޮތެއް ތަޢާރަފުކޮށްފައެވެ. ލިލިއަމްގެ އުޅަނދުގައި ބޭނުންކުރަނީ 30 އިލެކްޓްރިކް ޖެޓެވެ. މި ޖެޓުތައް އެއްފަހަރާ ބަދަލުކޮށްގެން އުދުހުމާއި ކުރިއަށް ދަތުރުކުރުމުގެ ޤާބިލުކަން ލިބިގެންދެއެވެ.

މި ކޮންސެޕްޓަށް ވަރަށް ބޮޑު ތަރުހީބެއް ލިބި، ދުނިޔޭގެ އެކި ކަންކޮޅުތަކުން 780 ޖެޓަށް އޯޑަރު ލިބިފައިވާކަމަށް ކުންފުނިން ބުނެފައިވެއެވެ. ރިމޯޓް  ކޮންޓްރޯލް ސްކޭލް މޮޑެލްއެއް ބޭނުންކޮށްގެން މި ޓެކްނޮލޮޖީ ދައްކުވައިދީފައިވެއެވެ. އަދި ފުރަތަމަ ފުލް-ސައިޒް ޖެޓުތައް އުފެއްދުމުގެ މަސައްކަތް ފެށި، 2025 ގެ ކުރީކޮޅު ޓެސްޓުކުރަން ފެށުމަށް ވަނީ ރޭވިފައެވެ.

މި އަހަރުގެ ޖުލައި މަހު ބޭއްވުނު ފާންބަރޯ އެއަރޝޯގައި ލިލިއަމްގެ ސީއޯއޯ ސެބަސްޓިއަން ބޮރެލް ވަނީ އިތުބާރާއެކު ވާހަކަދައްކާފައެވެ. "އަޅުގަނޑުމެން ހަމަގައިމުވެސް ފައިސާ ހޭދަކުރަމުން މިދަނީ. އެކަމަކު މިއީ ރަނގަޅު ނިޝާނެއް. އެއީ އަޅުގަނޑުމެން އުޅަނދު އުފައްދަމުންދާތީ. މި އަހަރު ނިމޭއިރު އުފެއްދުމުގެ މަރުޙަލާގައި ތިން އުޅަނދު ހުންނާނެ. އަދި އަޅުގަނޑުމެން ވަނީ 1.5 ބިލިއަން ޔޫރޯ ހޯދާފަ،" އޭނާ ބީބީސީއަށް މައުލޫމާތުދިނެވެ.

ނަމަވެސް އޭގެ ފަހުން ފައިސާ ހުސްވެގެން ދިޔައެވެ. ލިލިއަމްއިން ވަނީ ޖަރުމަނު ޑިވެލޮޕްމަންޓް ބޭންކު ކޭއެފްޑަބްލިއުއިން 100 މިލިއަން ޔޫރޯގެ ލޯނެއް ނެގުމަށް މަސައްކަތްކޮށްފައެވެ. ނަމަވެސް އެކަމަށް ޤައުމީ އަދި ސްޓޭޓް ސަރުކާރުތަކުގެ ގެރެންޓީ ބޭނުންވި ހިނދު، އެ ގެރެންޓީ ނުލިބުނެވެ.

ނޮވެމްބަރު މަހުގެ ކުރީކޮޅު، ކުންފުނިން ވަނީ އޭގެ މައި އޮޕަރޭޓިންގ ވިޔަފާރިތައް ވަކިކުރުމުގެ މަރުޙަލާއަށް ވައްދައި، ނަސްޑަކް ސްޓޮކް އެކްސްޗޭންޖުން އޭގެ ހިއްސާތައް ވަކިކޮށްފައެވެ.

މިވަގުތު، އައު އުޅަނދުގެ މަސައްކަތް ކުރިއަށްދަނީ ކުންފުނި ވިއްކާލުމަށް ނުވަތަ އައު އިންވެސްޓްމަންޓެއް ހޯދުމަށް ރީސްޓްރަކްޗަރިންގ ސްޕެޝަލިސްޓުންނާއެކު މަސައްކަތްކުރަމުންނެވެ. ނަމަވެސް އައު އީ-ޖެޓް އުފެއްދުމުގެ މަރުޙަލާއަށް ގެންދިއުމަކީ ކުރިއަށްވުރެ ބޮޑު ގޮންޖެހުމަކަށް ވެފައިވެއެވެ.