ބުރުޒުމަގުގައި ޕާކުކޮށްފައި އޮތް ކާރެއްގައި އަލިފާން ރޯކޮށްލި މައްސަލާގައި ދެ މީހަކު ހައްޔަރުކޮށްފި

މާލޭގެ ބުރުޒުމަގު، ސިނަމާލެ 1 ޕާކިންގ ޒޯންގައި ޕާކުކޮށްފައި އޮތް ކާރެއްގައި އަލިފާން ރޯކޮށްލި މައްސަލާގައި ދެ މީހަކު ހައްޔަރުކޮށްފިއެވެ. މި މައްސަލައިގެ ތުހުމަތުގައި ހައްޔަރުކޮށްފައިވަނީ މާލެ، މ. އަރާރައިކުރި، ޚާލިދު މަޙްމޫދު (35 އަހަރު) އާއި އއ. މާމިގިލި، ބްލޫ ވިންޑް، ޙަސަން ނަސީމް (31 އަހަރު) އެވެ.

މި ހާދިސާ ހިނގާފައިވަނީ  ނޮވެމްބަރު މަހުގެ 25 ވަނަ ދުވަހުގެ ރޭ 18:25 ހާއިރުއެވެ. ޚާލިދު މަޙްމޫދު އާއި ޙަސަން ނަސީމް މި މައްސަލައިގެ ތުހުމަތުގައި ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ.

ފުލުހުން މި މައްސަލަ ގެންދަނީ ތަޙުޤީޤު ކުރަމުންނެވެ. މި މައްސަލައާ ގުޅޭ އިތުރު މަޢުލޫމާތު ހާމަކުރެވޭނީ ތަޙުޤީޤު ނިމުމުންކަމަށް ފުލުހުން ވަނީ ބުނެފައެވެ.