އެމެރިކާއާއި އީރާނާ ދެމެދު ހަނގުރާމަ ހުއްޓާލުމުގެ 14 ނުކުތާގެ އެއްބަސްވުމެއްގެ ތަފްސީލު ހާމަކޮށްފި

އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމަ ހުއްޓާލުމަށްޓަކައި އެކުލަވާލާފައިވާ 14 ނުކުތާގެ ފަހުމުނާމާއެއްގެ ތަފްސީލު އެމެރިކާ ސަރުކާރުގެ އިސް އޮފިޝަލަކު ހާމަކޮށްފިއެވެ.

 ރައީސް ޑޮނަލްޑް ޓްރަމްޕްގެ ސަރުކާރުން ނޫސްވެރިންނަށް މައުލޫމާތު ދެމުން ހާމަކުރި މި ތަފްސީލުތަކަކީ މި އެއްބަސްވުމާ ގުޅޭގޮތުން މިހާތަނަށް ލިބުނު އެންމެ ސާފު މައުލޫމާތެވެ.

މި އެއްބަސްވުމުގައި ރަސްމީކޮށް ސޮއިކުރުމުގެ ރަސްމިއްޔާތު އަންނަ ހުކުރު ދުވަހު ބޭއްވުމަށް ވަނީ ތާވަލުކުރެވިފައެވެ. ނަމަވެސް، މިހާތަނަށް އެމެރިކާއިން ނުވަތަ އީރާނުން ވެސް މި އެއްބަސްވުމުގެ އަސްލު ކޮޕީއެއް އާންމުކޮށްފައެއް ނުވެއެވެ. އަދި އީރާނުގެ އޮފިޝަލުން އެމެރިކާއިން ހާމަކުރި މި ތަފްސީލުތައް އަދި ކަށަވަރުކޮށްދީފައެއް ނުވެއެވެ.

އެއްބަސްވުމުގެ މައިގަނޑު އަސާސްތައް
އެމެރިކާގެ އޮފިޝަލް ވިދާޅުވި ގޮތުގައި، މި ފަހުމުނާމާގެ ދަށުން ލުބުނާނު ހިމެނޭހެން ހުރިހާ ފްރަންޓެއްގައި ކުރިއަށްދާ ހަނގުރާމަ ވަގުތުން ހުއްޓާލެވޭނެއެވެ. މީގެ އިތުރުން، އެމެރިކާއިން އީރާނާ ދެކޮޅަށް އަޅާފައިވާ ކަނޑުގެ ބްލޮކޭޑް ނައްތާލައި، ހޯރްމޫޒް ކަނޑުއޮޅި އާންމު ދަތުރުފަތުރަށް ހުޅުވާލުމަށް ވަނީ ހަމަޖެހިފައެވެ.

މި ފަހުމުނާމާގައި ސޮއިކުރުމާއެކު، އީރާނުގެ ނިއުކްލިއަރ ޕްރޮގްރާމާއި، ދަތިކުރުމުގެ ފިޔަވަޅުތައް އުވާލުމާއި، އަދި ހިފަހައްޓާފައިވާ އީރާނުގެ ފައިސާ ދޫކޮށްލުމާ ގުޅޭގޮތުން 60 ދުވަހުގެ މަޝްވަރާތަކެއް ފެށޭނެއެވެ. އަދި އީރާނު އަލުން ބިނާކުރުމަށްޓަކައި 300 ބިލިއަން ޑޮލަރުގެ އިގްތިސާދީ އެހީގެ ޕްލޭނެއް އެކުލަވާލުމަށް ވެސް ވަނީ ހިމަނާފައެވެ.

މުހިންމު ބައެއް ނުކުތާތައް
އެމެރިކާއިން ހާމަކުރި 14 ނުކުތާގެ ތެރޭގައި ހިމެނޭ ބައެއް މުހިންމު ކަންތައްތަކަކީ:1. ދެ ގައުމުން އެއް ގައުމު އަނެއް ގައުމުގެ މިނިވަންކަމާއި އިސްތިގުލާލަށް އިހުތިރާމްކުރުން. 2. އެމެރިކާއިން އީރާނުގެ ތެލާއި ހަކަތައިގެ ސިނާއަތަށް އަޅާފައިވާ ފިޔަވަޅުތަކަށް ވަގުތުން ލުއިދިނުން. 3. އީރާނުން ނިއުކްލިއަރ ހަތިޔާރު ނުއުފައްދާނެ ކަމުގެ ޔަގީންކަން ދިނުން. 4. އެންމެ ފަހުގެ އެއްބަސްވުން އދ. ގެ ސަލާމަތީ މަޖިލީހުގެ ގަރާރަކުން ބާރުވެރިކުރުވުން.

އޮފިޝަލް އިތުރަށް ބުނީ، މިހާރުވެސް ދެ ގައުމުން އިލެކްޓްރޯނިކްކޮށް މި ފަހުމުނާމާގައި ސޮއިކޮށްފައިވާ ކަމަށެވެ. ނަމަވެސް އަންނަ ހުކުރު ދުވަހު ބާއްވާ ރަސްމީ ސޮއިކުރުމުގެ ކުރިން ކޮންމެ ފަރާތަކަށް ވެސް އެއްބަސްވުމުން ވަކިވުމުގެ އިޚްތިޔާރު އޮންނާނެ ކަމަށް އޭނާ ފާހަގަކުރިއެވެ.