ވިލިމާލޭގައި "މާލޭ ޓެކްސީ ލައިން" ގެ ޚިދުމަތް ފަށައިފި

މާލެ ސަރަހައްދުގެ ދަތުރުފަތުރުގެ ނިޒާމު ހަރުދަނާކުރުމަށް ސަރުކާރުން ކުރިއަށްގެންދާ މަޝްރޫޢުގެ ދަށުން، "މާލޭ ޓެކްސީ ލައިން"ގެ ޚިދުމަތް މިއަދު ވިލިމާލޭގައި ރަސްމީކޮށް ފަށައިފިއެވެ.

މި ޚިދުމަތް ރަސްމީކޮށް ފަށްޓަވައިދެއްވީ އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދެވެ. މިކަމަށްޓަކައި މިއަދު ވިލިމާލޭ ފެރީ ޓަރމިނަލް ސަރަހައްދުގައި ބޭއްވި ޚާއްސަ ރަސްމިއްޔާތެއްގައި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ މެނޭޖިންގ ޑިރެކްޓަރ އަޙުމަދު ސައުދީ އާއި ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު މުޙައްމަދު އިސްމާޢީލްގެ އިތުރުން ސަރުކާރުގެ އިސް ބޭފުޅުން ބައިވެރިވެވަޑައިގެންނެވިއެވެ.

"މާލޭ ޓެކްސީ ލައިން" އަކީ މާލެ ސަރަހައްދަށް ޒަމާނުއްސުރެ ދިމާވެފައިވާ ޓެކްސީ ނުލިބުމުގެ މައްސަލައަށް ދާއިމީ ހައްލެއް ހޯދައިދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އިސްނަންގަވައިގެން ފެއްޓެވި ޚިދުމަތެކެވެ. ވިލިމާލޭގައި މި ޚިދުމަތް ދިނުމަށް ބޭނުންކުރަނީ ތިމާވެއްޓާއި ރައްޓެހި، އެކަމަށް ޚާއްސަކޮށްގެން ރާއްޖެ ގެނެސްފައިވާ އުޅަނދުތަކެކެވެ.

Hon. Minister of Economic Development, Transport and Trade officially inaugurated the Malé Taxi Line Service in Villimalé at a special ceremony held today.

MP for Villimalé Constituency Hon. Mohamed Ismail, our Managing Director, DCP (Retd) Ahmed Saudee, together with senior… pic.twitter.com/GJUXB0sNMK

— MTCC Plc (@MTCCPlc) June 18, 2026

މި ރަސްމިއްޔާތުގައި ވާހަކަދައްކަވަމުން އެމްޓީސީސީގެ އެމްޑީ ސައުދީ ވިދާޅުވީ، މި ޚިދުމަތުގެ ސަބަބުން ވިލިމާލޭގެ ރައްޔިތުންނަށް އެއް ތަނުން އަނެއް ތަނަށް ދަތުރުކުރުމުގައި ބޮޑެތި ލުއިތަކެއް ލިބިގެންދާނެ ކަމަށެވެ. އަދި ޚާއްސަ އެޕްލިކޭޝަންގެ އިތުރުން، ޓެކްސީ ހޮޓްލައިން '1655' އަށް ގުޅައިގެންވެސް ފަސޭހަކަމާއެކު ޓެކްސީ ބުކް ކުރެވޭނެ އިންތިޒާމު ހަމަޖެހިފައިވާކަން އޭނާ ފާހަގަކުރެއްވިއެވެ.

ވިލިމާލޭގެ ހަނި ގޯޅިތަކަށް އުޅަނދުތަކަށް ނުވަދެވޭ މައްސަލައަށް އަލިއަޅުއްވާލައްވަމުން ސައުދީ ވިދާޅުވީ، އަލަށް ފެށި މި ޚިދުމަތް ފަރުމާކޮށްފައިވަނީ އެފަދަ ގޯޅިތަކަށްވެސް ފަސޭހައިން ވަދެވޭނެ ފަދަ އިންތިޒާމުތަކަކާއެކު ކަމަށެވެ. މިއީ ވިލިމާލޭ ރައްޔިތުންގެ ވަރަށް ބޮޑު ޝަކުވާއަކަށް ލިބުނު ހައްލެއް ކަމަށްވެސް އޭނާ ވިދާޅުވިއެވެ.

24 ގަޑިއިރު މެދުނުކެނޑި ޚިދުމަތް ލިބޭ ގޮތަށް ފަރުމާކޮށްފައިވާ "މާލޭ ޓެކްސީ ލައިން" ގެ ޚިދުމަތް މާލެއާއި ހުޅުމާލޭގައި ފަށާފައިވަނީ މިއަހަރުގެ އޭޕްރިލް މަހުގެ 2 ވަނަ ދުވަހުއެވެ. މި ޚިދުމަތް ވިލިމާލެއަށް ފުޅާވެގެން ދިއުމަކީ މުޅި މާލެ ސަރަހައްދުގެ ދަތުރުފަތުރުގެ ނިޒާމަށް ލިބުނު ކުރިއެރުމެކެވެ.