ލިންކްޑިން: ކުޑަކުދިންނަށް ޝައުގުވެރިވާ ވަރުގެ މަޢުލޫމާތެއް ނުހުރޭ

އޮސްޓްރޭލިއާގެ ގާނޫނު ހެދުމާބެހޭ މަޖިލީހަށް ލިންކްޑިން އިން ވަނީ 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރުމަށް ހުށަހަޅާފައިވާ ބިލުގައި ލިންކްޑިން ހިމެނުމުގެ ބޭނުމެއް ނެތް ކަމަށް ބުނެފައެވެ. މައިކްރޯސޮފްޓްގެ ދަށުން ހިންގާ މި ކުންފުނިން ބުނެފައިވަނީ ލިންކްޑިންގައި ކުޑަކުދިންނަށް ޝައުގުވެރިވާ ވަރުގެ މަޢުލޫމާތެއް ނުހުންނަ ކަމަށެވެ.

އޮސްޓްރޭލިއާގެ ސަރުކާރުން ވަނީ ކުޑަކުދިން ސޯޝަލް މީޑިއާ ބޭނުންކުރުން ހުއްޓުވުމަށް "ދުނިޔޭގައި އެންމެ ކުރިއަރާފައިވާ" ގާނޫނު ތަޢާރަފުކުރާނެ ކަމަށް ބުނެފައެވެ. ނަމަވެސް މެޓާ، ގޫގުލް، ސްނެޕްޗެޓް އަދި ޓިކްޓޮކް ފަދަ ޒުވާނުންގެ މެދުގައި މަޤްބޫލު ޕްލެޓްފޯމްތަކުން ވަނީ މި ގާނޫނަށް ގޮންޖަހާފައެވެ.

އޮސްޓްރޭލިއާގެ ބޮޑުވަޒީރު އެންތަނީ އަލްބަނީޒް ވިދާޅުވެފައިވަނީ މި ގާނޫނު ހުށަހަޅާފައިވަނީ ސޯޝަލް މީޑިއާގެ ސަބަބުން ކުޑަކުދިންނަށް ކުރިމަތިވާ ގެއްލުންތައް ހުއްޓުވުމަށް ކަމަށެވެ. އަދި މިއީ "އޮންލައިންގައި ދަރިންގެ ރައްކާތެރިކަމާމެދު ކަންބޮޑުވާ" މައިންބަފައިންނަށް ކަމަށް ވެސް  ވިދާޅުވިއެވެ.

އެހެން ގައުމުތަކުން ވެސް މި ގާނޫނާމެދު ޝައުގުވެރިކަން ފާޅުކޮށްފައިވާއިރު، އިނގިރޭސިވިލާތުން ވަނީ މިފަދަ ގާނޫނެއް ތަޢާރަފުކުރުމަށް ތައްޔާރަށް ތިބިކަން ހާމަކޮށްފައެވެ.

އޮސްޓްރޭލިއާގެ ސެނެޓް އެންވަޔަރަންމަންޓް އެންޑް ކޮމިއުނިކޭޝަންސް ލެޖިސްލޭޝަން ކޮމިޓީން ވަނީ މި ބިލާ ގުޅޭގޮތުން ކޮމެންޓުކުރުމަށް އެންމެ ދުވަހެއްގެ މުއްދަތު ދީފައެވެ. އަދި ކޮމިޓީގެ ރިޕޯޓުގައި ބުނެފައިވަނީ ޒުވާނުން މި ގާނޫނު ތަންފީޒުކުރުމުގައި ބައިވެރިކުރުން ފަދަ ކަންކަމަށް ރިޢާޔަތްކޮށް މި ބިލު ފާސްކުރަން ފެންނަ ކަމަށެވެ.