ވިޔަފާރި / ޚަބަރު
މިފްކޯއިން މަސްވެރިންނަށް 918 މިލިއަން ރުފިޔާ ދޫކޮށްފި

ރާއްޖޭގައި މަސްވެރިކަން ކުރާ އުޅަންދެއް ފޮޓޯ:ލިންކްޑްއިން
ކޫއްޑޫ ފިޝަރީޒް ކޮންޕްލެކްސްއާއި އައްޑޫ ފިޝަރީޒް ކޮންޕްލެކްސްއަށް މަސްވެރިން ކިރާފައިވާ މަހަށް ދައްކަންޖެހޭ ހުރިހާ ފައިސާއެއް ދައްކާ ޚަލާސްކޮށްފައިވާކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން އިއްޔެ ހާމަކޮށްފިއެވެ.
މިފްކޯއިން ބުނާގޮތުގައި، 2023 ވަނަ އަހަރުގެ ނޮވެމްބަރ 17 އިން 2024 ވަނަ އަހަރުގެ ނޮވެމްބަރ 15 ވަނަ ދުވަހާ ހަމައަށް މަސްވެރިންނަށް ޖުމްލަ 918 މިލިޔަން ރުފިޔާ ދޫކޮށްފައިވެއެވެ. މިއީ 50،588 މެޓްރިކް ޓަނުގެ މަހަށް ދައްކާފައިވާ ފައިސާއެވެ.
އެހެންނަމަވެސް، އޮކްޓޯބަރ 28 އިން ނޮވެމްބަރ 15 އާ ދެމެދު ފެލިވަރަށް ކިރުވާފައިވާ މަހަށް ފައިސާ ދޫކުރުމުގެ މަސައްކަތް މިހާރުވެސް ކުރިއަށްދާކަމަށް މިފްކޯއިން ބުނެފައިވެއެވެ. މި ވަގުތު މިފްކޯގެ ބެކްލޮގްގައި މަސްވެރިންނަށް ދައްކަންޖެހޭ ފައިސާގެ އަދަދަކީ 30 މިލިޔަން ރުފިޔާއެވެ.
މިހާރުގެ ސަރުކާރު ވެރިކަމާ ހަވާލުވިއިރު، މަސްވެރިންނަށް ދައްކަންޖެހޭ ގާތްގަނޑަކަށް 250 މިލިއަން ރުފިޔާ ހުރިކަމަށާއި، މި ހުރިހާ ފައިސާއެއް މިހާރު ދައްކާ ޚަލާސްކޮށްފައިވާކަމަށް މިފްކޯއިން ފާހަގަކޮށްފައިވެއެވެ. އަދި މީގެ އިތުރުން، މަސްވެރިން މިފްކޯއަށް ކިރުވާ މަހަށް އެންމެ ލަސްވެގެން 2 ހަފްތާގެ ތެރޭގައި ފައިސާ ދޫކުރުމަށް ސަރުކާރުން ނިންމާފައިވާކަމަށާއި، މިކަމަށް މަސައްކަތް ކުރަމުންދާކަމަށްވެސް މިފްކޯއިން ބުނެފައިވެއެވެ.